Kubububasɛ yɔ 14 - KUNYANYA VUVU YƆ

Yohanes amɔ Keʋesibi ya ni ka banima

¹ Lɛ gi meedi i, mamɔ keʋesibi ya gi kalɛɛ ní Zion lito le aʋa ɛ, lɛ banɔ akpe alafa tole ni avitene ni tiene, gi bɛŋwlimi yɛ linyi ne nì Yɛka yɛ linyi ne ní ba kùtu yo e, bɛpɔni yɛ.

² Lɛ menu ole ɔtɔ gi ɛdɔ ní lifunu ne ŋwisi onipe gi ɛdɔ limu kinɛ ɛ, ni dzeni kugugu gagla ɔtɔ kinɛ ɛ. Ole lo gi menu i, ɔlɛ ŋwisi ɔsangu beʋéʋe gi beeʋe ba isangu ne kinɛ ɛ.

³ Bɛzɛzà ɔdzi vuvu ɔtɔ ní likusigbo le ɔtɔ nɔ ní bidɔgbagbe tune ʋe kɔpɔni banɔtsitsi ba aŋu mɛ. Lɛ ɔnɔnɔ ɔ́tani ɔdzi nɔ kukpasi i, sani banɔ akpe alafa tole avitene ni tiene ba gi bebu idɔni kesea aʋa ɛ.

⁴ Banɔ ba ya benu banama gi bákpɛ ɔdzɛ ha, lɛ bélulu isu ya ni badzɛ ɛ, lɛ ese linu si ba isu ya idra a. Banɔ ba ya ɛ, bizeekuni Keʋesibi ya kude tsinɔ ní ɔkɔ kakaa gi izɛtrɛ ɛ. Banɔ ba ya bedzi dɔni banima kusi i, xe bɛkɔ ba ŋwisi bidɔkɔkɔ tɔpu ki Aya ni Keʋesibi ya a.

⁵ Lɛ bámɔ asia atɔtɔ ní ba onu u; lɛ ese linu si benu banɔ gi kunutsatsaa kutɔtɔ si bɛbitɛ eboe zimizi i, kúma ní ba su u.

Aya yɛ baxwɛdzɛ tiata ba

⁶ Lɛ mamɔ Aya yɛ ɔxwɛdzɛ dzedze gi eepruru ní liwɔ lɛ mɛ ɛ, gi evu liboe gbã moblo le ní awla a, si yipani iiki banama gi balɛ ní kesea aʋa a, ki kese kakaa, ki limade kakaa, ki siya lide kakaa ni banɔ kakaa.

⁷ Lɛ apani ni ole gagla si, “Mlese Aya, lɛ mlakɔ kusudraa aki yɛ; lɛ ese linu si yɛ litsixwaxwa nɛ lipoe le lina, lɛ mlesumu ɔniliɛ klɔ gi yɛ abitɛ lifunu ne e, ni kesea ani axu la kɔpɔni inide ede ede ne.”

⁸ Lɛ Aya yɛ ɔxwɛdzɛ ʋla ɛ, ekuni yɛ kude lɛ apani si, “Egleʋe, Egleʋe, Babilonia ʋidi ye Egleʋe, yɛ gi yɛ aki si kuseo petee kwiŋwɛ yɛ kihasiwawaɛ kɛ kuwleda ɛ.”

⁹ Lɛ Aya yɛ ɔxwɛdzɛ tanɛ, ekuni ba kude lɛ apani ni ole gagla si, “Xe ɔnutɔ esumu ɔnyraga yɛ ni yɛ litugu ne e, xe azɛ yɛ lixaŋu nɛ ní yɛ ketu ya loo ní yɛ kawla mɛ ɛ,

¹⁰ Aya aayeʋi isu ni ye, lɛ yɛ kyɛ aŋwɛ Aya yɛ kusuyeʋio kuda, gi bátsa ní yɛ kusuyeʋio kepliʋia mɛ ɛ. Lɛ biakɔ kifu ni kifu akla kɔwa yɛ nyɔnyɔɛ ní Aya yɛ baxwɛdzɛ dradra ba ani keʋesibi ya aŋu mɛ ɛ.

¹¹ Lɛ ba kinie xunyɔ ɛ, kwiado trɛ ní lifunu ne tsinɔ kanɔmɛ anɔmɛ. Lɛ kuzemɔni kúma elesi ni kemize ki banama gi besumu ɔnyragaɛ ni yɛ litugu ne e, loo ki banama gi bɛzɛ yɛ linyi ne lɛ lixaŋu nɛ ɛ.”

¹² Lɛ ya liziã litɔplɛplɛkese kese ni igyidodo dɔni banɔ dradra ba, gi bizeenu kutu iiki Aya isã nɛ ɛ, xe bevu kuziŋa ni Yesu me ní awla ɛ.

¹³ Lɛ menu ole ɔtɔ dɔni lifunu ne gi ɛɛpani si i, “Ŋwlimi si: Biakrira banɔ ba ya gi betse ní Ɔkaɛ mɛ ɛ, dɔni lɛ ya aʋa kɔtsinɔ ɛ.” “Ee” Ɔfuɛfuɛ nɔ ɛɛpani si, “biaazemɔni ní ba axwɛwawa la mɛ, lɛ ese linu si ba axwɛwawa la aazeni ba kude.”

Litsi ʋidi le

¹⁴ Gi meedi i, mamɔ liplɛ pititi itɔ, lɛ ɔnutɔ odi ní lɛ aʋa ŋwisi Ɔnɔɛ Yebi ye kinɛ ɛ, sika yɛ likuto le lilɛ ní yɛ litukpo le, lɛ evu ihɛ gi bizɛkɔ ɛtsa amu ní awla la a.

¹⁵ Lɛ Aya yɛ ɔxwɛdzɛ dzedze edo ádɔ ní lisɔligba lɛ mɛ ɛ, lɛ akpɛ ozi ni ole gagla atsisi ɔniliɛ klɔ gi odi ní liplɛ lɛ aʋa si, “Kɔ wɔ ihɛ tɔ tsa bidɔ mɛ; lɛ ese linu si ɔmuzáza nɔ ɛna, lɛ ese linu si kesea aʋa bidɔ mɛ biizã a.”

¹⁶ Lɛ ɔniliɛ gi odi ní liplɛ lɛ aʋa ɛ, aŋwia yɛ ihɛ atsisi ní kesea aʋa ɛ, lɛ atsa kesea aʋa bidɔkpɛkpɛ ʋɛ ɛ.

¹⁷ Lɛ Aya yɛ ɔxwɛdzɛ dzedze edo ádɔ ní lisɔligba ɛlɛ, gi lilɛ ní lifunu ne me e, gi yɛ fɛ evu kaláʋi nunu atɔ ní awla a.

¹⁸ Lɛ Aya yɛ ɔxwɛdzɛ dzedze ɔtɔ dzɛ, gi yɛ awla kigaglaɛ kilɛ ní kifu yɛ aʋa ɛ, edo ádɔ ní ɔdɔpɔʋisuʋɔ lɔ su, lɛ akpɛ ozi ni ole gagla atsisi ɔniliɛ klɔ gi evu kaláʋia ní awla la si, “Kɔ̀ wɔ kaláʋia tɔ gu kesea aʋa wain yoyoe yɛ asà la; lɛ ese linu si wain yɛ esebi la ɛzã!”

¹⁹ Lɛ Aya yɛ ɔxwɛdzɛɛ aŋwia yɛ kaláʋia atsisi ní kesea aʋa ɛ, lɛ agu kesea aʋa wain yoyoe, lɛ bɛkɔ yɛ ɛkpɛ ní Aya yɛ kusuyeʋio kɔ wain yɛ ɔka kɔ ʋidi lo me e.

²⁰ Lɛ bɛpita wain yoyoe ni ikli lɛ ní ɔma nɔ ese e, lɛ ika lɛ ido ní wain yɛ ɔka klɔ ɛ, gi idzu ŋwisi ɔnɔ liŋwladɔ̃ kinɛ ɛ, gi bɛ kidzedzee me kina itiplɛkɔ alafa tiaʋa a.