Kubububasɛ yɔ 13 - KUNYANYA VUVU YƆ

Ɔnyraga yɛ edo adɔ ní axu la mɛ

¹ Lɛ mamɔ ɔnyraga ɔtɔ gi eedo edɔ ní axu la mɛ ɛ. Asia liɔfɔ ni etukpo tegloele alɛ yɛ, lɛ ekusikuto liɔfɔ alɛ ní yɛ asia na aʋa a, lɛ ní yɛ litukpo kakaa aʋa ɛ, bɛŋwlimi libusionyi itrɔ.

² Lɛ ɔga liɛ gi mamɔ ɛ, ɔlɛ ko ŋwisi abosokpo ye kinɛ ɛ, pɔ̀ yɛ ikli lɛ ilɛ ŋwisi sisiblisi ye yɛ ikli kinɛ ɛ, lɛ yɛ onugu lo ɔlɛ ŋwisi gyata yɛ onugu kinɛ ɛ. Lɛ kenia mɛ ɔgblaga ʋidi ye e, akɔ yɛ kigaglaɛ, yɛ likusigbo le, ni yɛ ɔlɛɛkɔ gyɔgyɔ lɔ aki ɔnyraga yɛ ɛ.

³ Ɔgaɛ yɛ litukpo tile le e, liŋwi ŋwisi libi gi nya liaki si aatse kinɛ ɛ bɛkpɛ yɛ, pɔ̀ libi le lítse e. Lɛ kelea petee onugu ètse lɛ bekuni ɔnyraga yɛ kude e.

⁴ Lɛ banima bɛkpɛ litukpo kese ɛki kenia mɛ ɔgblaga yɛ, lɛ ese linu si akɔ yɛ kigaglaɛ aki ɔnyraga yɛ, lɛ bɛkpɛ litukpo kese ɛki ɔnyraga yɛ kyɛ lɛ beʋi si, nyaŋwɛ ɔlɛ ŋwisi ɔnyraga yɛ kinɛ ɛ? Lɛ nyaŋwɛ aatani kigũ kuta ni yɛ ɛ?

⁵ Lɛ bɛki ɔnyragaɛ onugu si obu onugu me tɔ ɔpani ebusioboe manɔ ní Aya su, lɛ bɛki yɛ kigagla badzidzi avitene ni tiaʋa si ɔbitɛ eboe ala ya.

⁶ Lɛ adra yɛ onugu lo xe ekpese ebusioboe la kupani ní Aya su u, lɛ akpɛ Aya yɛ linyi ne, nì yɛ ozeklɔ, kɔpɔni banama petee gi balɛ ní lifune e, kakpaa.

⁷ Bɛki yɛ kigaglaɛ tɔ ɔta kigũ ni banɔ dradra ba, atɔ ɔŋa ba aʋa, lɛ bɛki yɛ kigagla ní limade kakaa, ni banɔ kakaa, ni siya kakaa, kɔpɔni kese kakaa aʋa.

⁸ Lɛ kesea aʋa bezeze ba petee biasumu ye e. Ba benu banama petee gi báŋwlimi ba enyi na ákpɛ ní ligbã́ nɛ keplekpaa mɛ, dɔni kelea okpese klɔ ɔ. Keplekpaa lia kenu keʋesibi ya lia gi beye e, kanɛ.

⁹ Ɔniliɛ klɔ gi kutu kulɛ yɛ ɛ, tɔ onu!

¹⁰ Xe lilɛ si ɔnutɔ ɔtrɛ ligba ɛ, ligba lɛ ko aatrɛ. xe lilɛ si beye ɔnutɔ ni ihɛ gblamadzaa ɛ, ihɛ gblamadzaa yɛ ko biakɔ ye ye. Liboe lɛ ya liziã litɔplɛplɛkese ni igyidodo ani anukwarɛɛ dɔni banɔdradra ba klɔ.

Ɔnyraga gi edo ádɔ ní Kesea mɛ ɛ

¹¹ Lɛ mamɔ ɔnyraga dzedze gi edo adɔ ní kesea mɛ ɛ. Asia taʋa alɛ yɛ ŋwisi keʋesibi kinɛ ɛ, pɔ̀ apani ŋwisi kenia mɛ ɔgblaga ʋidi kinɛ ɛ.

¹² Lɛ awa ɔnyraga tɔpu yɛ yɛ kigaglaɛ petee su axwɛ ní yɛ onu u. Lɛ aki si kesea ni ka aʋa banima, besumu ɔnyraga tɔpu yɛ gi yɛ bɛkpɛ lìbi le e, gi nya liaki si otse xe e, pɔ̀ xe otse e.

¹³ Lɛ abitɛ enugutseboe ʋidi na, gi aki si kifu kidɔ ní lifunu ne dɔ ní kesea aʋa ní banima aŋu mɛ ɛ.

¹⁴ Kɔkpɛ gi bɛki yɛ kigaglaɛ si ɔbitɛ eboa la ya elu ní ɔnyraga tɔpu yɛ onu loso e, emeni kesea aʋa banima. Aki ba ɔsã si bedu litugu kí ɔnyraga tɔpu yɛ gi yɛ su bɛkpɛ libi le ni ihɛ gblamadza yɛ pɔ̀ xe ɔlɛ ligbã́ nɛ ɛ, tɔ bakɔ akpɛ kubùbù ní yɛ su u.

¹⁵ Lɛ bɛki yɛ kigagla si ɔki litugu inɛ gi bedu iiki ɔnyraga tɔpu yɛ, Ɔfuɛfuɛ tɔ lipani i, ani tɔ liki si beye banama petee badimɛ si beesumu ɔnyragaɛ yɛ litugu ne e.

¹⁶ Lɛ emi ní ɔnɔ kakaa aʋa, banɔtsitsi ni banuvɔ, bexonete ni bazianete, banɔdzidzi ni banɔ gi balɛ ní ba ɔtutɔ isuwla mɛ, lɛ aki si bakpɛ ɔnɔ kakaa lixaŋu ní yɛ kaŋawla mɛ loo ní yɛ ketu ya,

¹⁷ atɔ ɔnɔnɔ ɔkitani bidɔ kudzi loo tɔ ɔdà bidɔ ɔ, dzaa si ɔnyraga yɛ yɛ lixaŋu nɛ gi linu yɛ linyine e loo yɛ aŋwi na ɛ, alɛ ní ɔniliɛ klɔ ʋa su u.

¹⁸ Lɛ ya liziã kuboete. Xe kuboesenu kulɛ ní ɔnutɔ awla ɛ, ogyo ɔnyraga yɛ yɛ aŋwi na odi i, lɛ ese linu si linu ɔnɔ linyi gi lɛ aŋwi na enu alafa tieglo aviteglo ni teglo.