Kubububasɛ yɔ 12 - KUNYANYA VUVU YƆ

Ɔdzɛɛ ni Kenia mɛ ɔgblaga ʋidi ye

¹ Lɛ gyesi ʋidi gi abitɛ ɔnɔ kakaa yaa ɛ, aŋwi ní liwɔ lɛ mɛ. Ɔdzɛ ɔtɔ gi akpɛ liwo le ŋwisi yɛ awu la kinɛ ɛ, xe ɔdzidzi yɛ ɔlɛ ní yɛ ikli lɛ ese e, ni badzidziebi liɔfɔ ni tiaʋa gi benu likusikuto ní yɛ litukpo le e,

² limɛ lilɛ ní yɛ su, lɛ azeenimi gi si yipɔ̀ loso o.

³ Lɛ gyesi dzedze aŋwi ní lifune dzɛ ɛ, kenia mɛ ɔgblaga kyikyi ʋidi ɔtɔ gi etukpo tegloele ni asia liɔfɔ alɛ yɛ ɛ, ekume ekusikuto tegloele, tile ní yɛ litukpo kakaa.

⁴ Akɔ yɛ opi no ehe badzidziebi ʋa kapɛ tanɛa ní lifune aŋwia ɛkpɛ ní kesea. Lɛ kenia mɛ ɔgblaga yɛ ɔlɛɛ ní ɔdzɛɛ gi atrápɔ ɛ, yɛ ɔtɔ nɔ tɔ yivu obi ye tà xegi bɛpɔ yɛ ɛ.

⁵ Ɔdzɛɛ apɔ obinyime, gi yɛ atráŋa banima petee aʋa ni ɔwla gagla a. Pɔ̀ bɛʋã obi ye tsinɔ ní Aya klɔ ní Aya yɛ likusigbo le su u.

⁶ Lɛ ɔdzɛɛ ese atrɛ ní ɔyaya klɔ niklɔ gi Aya abla aplɛ aki yɛ ɛ, gi biagani yɛ ɛ, ewe akpe tole alafa tiaʋa ni aviteglo.

⁷ Lɛ kigũ kidɔ ní lifunu ne e: Mixael ni yɛ baxwɛdzɛ ba bɛta kigũ yɛ ni kenia mɛ ɔgblaga ʋidi ye, lɛ ɔgblaga ʋidi ye ni yɛ baxwɛdzɛ ba kyɛ bɛta kigũ yɛ ni ba ɛ.

⁸ Pɔ̀ kigaglaɛ kíze ní kenia mɛ ɔgblaga yɛ su ebono lɛ bɛkpikpini ba ní ba ozeklɔ ní lifunu ne e.

⁹ Lɛ bɛŋwia kenia mɛ ɔgblaga yɛ ni yɛ baxwɛdzɛ ba petee ekpɛ ní kesea ɛ. Yɛ onu ɔgblaga kokoe, gi bizɛxwa si: ozimizi ye loo Satana a, gi yɛ eemeni kelea petee e. Bɛŋwia yɛ ɛkpɛ kesea aʋa, yɛ ni yɛ baxwɛdzɛ ba petee.

¹⁰ Lɛ menu ole gagla ɔtɔ ní lifunu ne gi ɛɛpani si, “Abla ɛ, blɔ Aya yɛ kubúbú yo ni yɛ kigaglaɛ ni yɛ kaʋaŋaa kwiba, lɛ yɛ Kristo ye yɛ kigaglaɛ ki ba a. Lɛ ese linu si ɔniliɛ gi izɛɛtsa blɔ benemi ba onu i, gi izɛɛtsa ba onu ní blɔ Aya yɛ aŋu mɛ elesi ni kemize e, bɛŋwia yɛ ɛkpɛ ní kesea.

¹¹ Lɛ bɛŋa yɛ aʋa gani keʋesibi ya ka ika lɛ ani gani ba katsalia eboe la mɛ ɛ, lɛ bálɔ ba ligbã́ nɛ gbɛgbɛ si biase ní kutseo onu u.

¹² Lɛ loso e, isami iku mlo, mlɔ lifunu ne kuseo ni mlɔ banama gi mlalɛ ní kɔ mɛ ɛ. Pɔ̀ babaa ki kesea ni axu la: lɛ ese linu si Ozimizi ye eple eku ní mlɔ aʋa a! lɛ kusuyeʋio kwiku ye nyani nyani; lɛ ese linu si, ete si yɛ lipoe le lídze tɔ ɔ.”

¹³ Lɛ gi kenia mɛ ɔgblaga yɛ amɔ si, bɛŋwia yɛ ɛkpɛ ní kesea aʋa ɛ, eti ɔdzɛɛ gi apɔ obinyime e lideke.

¹⁴ Pɔ̀ bɛkɔ kadzi ʋidi atɔ ka siwlasasa sɛ ede taʋa ɛki ɔdzɛɛ, tɔ aapruru trɛ ní ɔyaya kɔ ɔkutɔ, níklɔ gi bɛbla ɛplɛ ki yɛ ɛ, xe biadi yɛ aʋa a agɔ tata ni kapɛ, níklɔ gi kenia mɛ ɔgblaga yɛ ɔ́tratani yɛ kuna ɛ.

¹⁵ Lɛ kenia mɛ ɔgblaga yɛ api kuni yo gi kwisrɛ ŋwisi onipe kinɛ ɛ, dɔni yɛ onugu lo me akpɛ nì ɔdzɛɛ kude, atɔ onipe lo aavu ye tsinɔ.

¹⁶ Pɔ̀ kesea kɛɛpɔni ɔdzɛɛ, gi kesea kɛla onugu lo me, lɛ kɛŋwɛ kuni yo gi kenia mɛ ɔgblaga yɛ api adɔ ni yɛ onugu lo me e.

¹⁷ Lɛ isu iyeʋi ɔgblaga yɛ nyani nyani ni ɔdzɛɛ, lɛ asɛ atrɛ si yizɛɛta kigũ ni ɔdzɛɛ yɛ lipo me bebi gɔgɔ ba ɛ, ba benu banama gi bizenu kutu iiki Aya yɛ isã nɛ ɛ, xe bevu Yesu yɛ katsalia mɛ ní awla ɛ.

¹⁸ Lɛ kenia mɛ ɔgblaga yɛ alɛɛ ní axu la kutu yɔ ɛ.