Kubububasɛ yɔ 11 - KUNYANYA VUVU YƆ

Banɔ tiaʋa gi bɛŋa katsalia ɛki Aya a

¹ Lɛ bɛki mɛ kiseʋi gi kilɛ ŋwisi bidɔ kigyigyeseʋi kinɛ ɛ, lɛ bɛsi mɛ si, “Trɛ tɔ zeegyigye Aya yɛ lisɔligba lɛ ni ɔdɔpɔʋisuʋɔ lɔ, tɔ kla banama gi beesumu Aya ní niklɔ ɛ.

² Pɔ̀ wukígyigye kepea aŋu na mɛ ɛ, níklɔ gi egli la ɛklanɔ ɔ; lɛ ese linu si bɛkɔ níklɔ ɛki banama gi bénu Yudanɛ ɛ, lɛ biaga lɛ biazizi ɔma ʋidi dradra lɔ badzidzi avitene ni tiaʋa a.

³ Lɛ maaki banɔ tiaʋa ba klɔ gi bɛɛŋa katsalia ɛki mɛ ɛ, kigagla tɔ biapani liboe plɛ ewe akpe tole ni alafa tiaʋa ni aviteglo, lɛ biaze ní kusa kpìkpì mɛ.”

⁴ Banɔ tiaʋa ba ya gi bɛŋa katsalia ɛ, benu kumu yɔ ise loo olif ye ise tiʋa ni kaniɛ ise tiʋa ɛlɛ gi ilɛɛ ní kesea Ɔkaɛ yɛ aŋu na mɛ ɛ.

⁵ Lɛ xe ɔnutɔ apɛ si yibitɛ liboe zimizi manɔ ní ba su i, kifu kizedo edɔni ba inugu le me, gi kizɛkani ba ahwafianɛ ma ɛ; lɛ nite banama gi bizɛɛpɛ si, bɛwa ba nyɔnyɔɛ ɛ, nite lilɛ si betse.

⁶ Kigagla kilɛ ní banɔ ba ya awla si biatsi lifune onu, tɔ dzeni ye ɔkidɔ ní ewe ala klɔ mɛ gi bɛɛpani eboe plɛ ɛ, lɛ kigagla kilɛ ní ba awla si biakyi bèni ʋa gi biadzi ika a, lɛ biaki kunya kakaa elu kwiaba kesea aʋa lipoe kakaa elu gi bɛpɛ́ ɛ.

⁷ Lɛ xegi bɛŋa ba katsalia pɔ́ ɛ, kɔ ɔnyraga liɛ klɔ gi adɔ edo ní lizokpo gluglu le me e, aata kigũ ni ba, lɛ aaŋa ba aʋa, lɛ aaye ba.

⁸ Lɛ ba bekpo ʋa biafɛ ní ɔma ʋidi lo lɔ ablɔ ʋa aʋa a, niklɔ gi bɛkla ba Ɔkaɛ ní ose lo su i. Ɔma lɔ klɔ gi bizɛxwa ní abee me si; Sodom ni Egipte e.

⁹ Lɛ kɔki ewe tata ni kapɛ ɛ, banima dɔni banɔ kakaa mɛ, limade kakaa mɛ, siya ede ede me, ni kese kakaa aʋa biamɔ ba bekpo ʋa gi bafini i, pɔ̀ bátravive ba a.

¹⁰ Lɛ kesea aʋa bezeze ba biamɔ isami ɔkpɛ ba loso, lɛ biaŋa liwe gi biatsisi ba ahanuglɔ ba bidɔ; lɛ ese linu si beboedoplɛ tiaʋa ba ya ɛ, bebu kini ɛki banama gi balɛ ligbã́ nɛ ní kesea aʋa ɛ.

¹¹ Pɔ̀ ní ewe tata ni kapɛ kede e, Aya afuɛ yɛ ligbã́ nɛ Ɔfuɛfuɛ nɔ akpɛ ní ba mɛ, lɛ bɛyɔ xe balɛɛ ní ba ikli lɛ aʋa ɛ, lɛ lifu ʋidi itɔ lidɔ ní banama gi bɛmɔ ba aʋa ɛ.

¹² Lɛ benu ole gagla ɔtɔ dɔni lifunu ne gi ɛɛpani si, “Mlemu aba niya a.” Lɛ bemu itrɛ lifunu ne ní aplɛ la mɛ ɛ, lɛ ba ahwafianɛ ma beedi ba ɛtsisi i.

¹³ Lɛ ní ɔnyɔsasa lɔ klɔ mɛ ɛ, kesea kɛhwa gaglaa, lɛ ɔma ʋidi no kapɛ liɔfɔa kɛkpa ɛdɔ kesea a, lɛ banɔ akpe tiegloele betse ní kesea kuhwahwa mɛ ɛ, lifu ne liku banɔ gɔgɔ ba nyani nyani, lɛ bɛkɔ kukpɔ̀kpɔ̀ ɛki lifunu ne Aya ɛ.

¹⁴ Baba ʋlaɛ yɛ onu aza, lɛ ɔtanɛ ɛ atrába kpekpemi.

Beme Kakuklui gloelea

¹⁵ Aya yɛ ɔxwɛdzɛ gloelee eme yɛ kakuklui ya, lɛ ile gagla iyi ní lifunu ne gi iipani si, “Kesea aʋa kukusi yo kwidzi blɔ Ɔkaɛ ni yɛ Kristo ye kunɛ ɛ, lɛ aaŋa aʋa kɔtsini kanɔmɛ anɔmɛ.”

¹⁶ Lɛ banɔtsitsi avitaʋa ni tiene ba gi bedi ní ba ekusigbo la aʋa ní Aya aŋu mɛ ɛ, bewe ba aŋu na mɛ ní kesea, lɛ bɛkpɔ̀ Aya a,

¹⁷ lɛ bɛpani si, “Kwido wɔ ɖase Ɔkaɛ, Aya kigaglaɛ petee onete e, wɔ ɔniliɛ gi wɔlɛ ɛ, xe woze e, lɛ ese linu si wɔkɔ wɔ kigagla ʋidi ye, lɛ wokpese kukusi yo kuŋa a.

¹⁸ Kesea aʋa kuseo kwiyeʋi isu, lɛ ese linu si wɔ kusuyeʋi gaglaa kɔ lipoe le lina. Lipoe le lina gi wɔaxwa litsi ni bekpo ʋa a; gi wɔatsa liʋɛ ki wɔ banɔsumu ba a, gi benu beboedoplɛ ba ɛ, ni wɔ banɔ dradra ba ani banama gi bizɛkpɛ kubùbù ní wɔ linyine su u, banuvɔ ni banɔtsitsi, tɔ wɔakyrɔ banama gi bezizi kesea ɛ.”

¹⁹ Lɛ bɛdra Aya yɛ lisumugba ɛlɛ, gi lilɛ ní lifunu ne e, lɛ ní lisumugba lɛ mɛ ɛ, bɛmɔ yɛ kunyanyaa kɔ aɖaka yɛ. Lɛ dzeni ye atsí kifu yɛ lɛ dzeni ye alàʋi lɛ egu i, lɛ kesea kɛhwa xe liwɔ ʋidi itɔ ni amukla na kyɛ bidɔ ɛ.