Kubububasɛ yɔ 10 - KUNYANYA VUVU YƆ

Aya yɛ ɔxwɛdzɛɛ ni keplekpa sisami ya

¹ Lɛ mamɔ Aya yɛ ɔxwɛdzɛ gagla dzedze gi eeple dɔni lifunu ne e. Aplɛ la ɛklani yɛ ŋwisi liwu kinɛ ɛ, lɛ ɔkũ yɛ ɔlɛ ní yɛ litukpo le, yɛ aŋu na mɛ eekle ŋwisi liwo le kinɛ ɛ, lɛ yɛ ikli lɛ ilɛ ŋwisi igbase gi iisɔ kinɛ ɛ,

² evu keplekpa sisami gi bɛdra ɛ, ní yɛ kawla mɛ. Edu yɛ kaŋa mɛ ɔkli lɔ ní axu la aʋa, lɛ akɔ yɛ kaba ɔkli lɔ edu ní kesea aʋa ɛ,

³ lɛ akpɛ ozi ni ole gagla ɔtɔ, ŋwisi kiliɛ gi gyata yɛ izɛfami kinɛ ɛ. Lɛ gi akpɛ ozi lo e, dzeni ye egu tegloele ŋwisi kunububu kinɛ ɛ.

⁴ Lɛ gi dzenigugu tiegloele ʋa ba ile le ipani i, mapɛ si miŋwlimi ba liboe le plɛ ɛ: pɔ̀ lɛ menu ole ɔtɔ ɛdɔ ní lifunu ne gi ɛɛpani si, “Dà bidɔ ní eboa la gi dzenigugu tiegloele ba bɛpani i onu, atɔ wukíŋwlimi na ɛplɛ ɛ.”

⁵ Lɛ Aya yɛ ɔxwɛdzɛ liɛ, gi mamɔ ɔ, xe ɔlɛɛ kedu ya ní axu la ni kesea aʋa ɛ, emuni yɛ kaŋawla ní lifune.

⁶ Lɛ atàni ɔniliɛ gi ɔlɛ ligbã́ nɛ kɔtsini kanɔmɛ anɔmɛ ɛ, ɔniliɛ gi yɛ abitɛ lifunu ne ni kidɔ kakaa a, gi kikpasi ni bɛ mɛ ɛ, ani kesea ni kidɔ kakaa a, gi kilɛ ní ka aʋa a, kɔpɔni axu la ni kidɔ kakaa a, gi kikpasi ní la mɛ ɛ, lɛ apani si “Batrázizi lipoe tɔtɔ tɔɔ ɔ!

⁷ Xe lipoe le lina si Aya yɛ ɔxwɛdzɛ gloele e ome yɛ kakuklui ya ɛ, Aya aagu yɛ eboe kpokpo la ŋwisi kiliɛ gi asi yɛ banɔsumu ba gi benu beboedoplɛ ba ɛ.”

⁸ Lɛ ole ɔklɔ gi menu adɔ ni lifunu ne e, egu kunugu ni me dzɛ si, “Trɛ tɔ zɛɛzɛ keplekpaʋia lia gi bɛdra ɛ, gi kalɛ ní Aya yɛ ɔxwɛdzɛɛ ɛ, gi ɔlɛɛ kedu ya ní axu la ni kesea aʋa ɛ awla.”

⁹ Lɛ matrɛ ní Aya yɛ ɔxwɛdzɛ klɔ ɔ, xe meʋi ye si ɔkɔ keplekpaʋia ɔkimɛ ɛ. Lɛ asi mɛ si, “Izɛ, tɔ tà ka, kianyasi ní wɔ lipo le me, pɔ̀ kiaze ŋanaŋana ní wɔ onugu lo me ŋwisi kibú kinɛ ɛ.”

¹⁰ Lɛ mazɛ keplekpaʋia ní Aya yɛ ɔxwɛdzɛɛ awla a, lɛ matà ka ɛ. Kezee ŋanaŋana ní mɛ onugu lo me ŋwisi kibu ye kinɛ ɛ, pɔ̀ gi matà ka ɛ, kɛnyasi ní mɛ lipo le me.

¹¹ Lɛ bɛsi mɛ si, “Lilɛ kí wɔ si pani liboe plɛ dzɛ ní banɔ glegle, ni kuse glegle, siya ede ede ni bekusi ede ede su.”