Kubububasɛ yɔ 1 - KUNYANYA VUVU YƆ

¹ Eboe ala gi Aya ebu ɛbasɛ gani Yesu Kristo aʋa a, tɔ ɔbasɛ yɛ banɔsumu ba, eboe ala gi lilɛ si aba la mɛ ní lipoe kpekpemi itɔ mɛ ɛ. Aki si bete la gani yɛ ɔxwɛdzɛ gi akpɛ ní Yohanes yɛ ɔnɔ sumu ye klɔ ɔ.

² Lɛ Yohanes aŋa katsalia, lɛ apani ní kidɔ kakaa gi amɔ ɛ su, si lɛ ya linu Aya yɛ liboe le ni liboe lɛ gi lido edɔ ní Yesu Kristo onu u.

³ Biakrira ɔniliɛ gi izɛkla kuboedoplɛɔ liɔ ya mɛ eboe la ɛ, lɛ biakrira banama gi beenu kɔ mɛ eboe la a, xe bizeenu kutu iiki eboe ala gi bɛŋwlimi kpɛ ní kɔ mɛ ɛ. Lɛ ese linu si lipoe le lina pɔ.

Kunɔpanɔ kwidɔ ní Yohanes klɔ ɛki isɔli ha tigloele le

⁴ Keplekpaa lia kɛdɔ ní mɛ Yohanes klɔ ɛki Isɔli ha tigloele le ní Asia yɛ keweku ya: Lipomɛpɛpɛ ni kusuyɔ ki mlɔ dɔni yɛ ɔniliɛ gi ɔlɛ ɛ, gi eze e, xe atrába ɛ klɔ, ni dɔni ifuɛfuɛ tigloele le gi ilɛ ní yɛ likusigbo le ɔtɔ nɔ ɛ klɔ,

⁵ ani dɔni Yesu Kristo, gi onu anukwarɛɛ yɛ katsalia klɔ ɔ, yɛ gi onu obi tɔpu u, yɛ gi ayɔ adɔ ni bekpo ʋa mɛ ɛ, kɔpɔni kesea ʋa bekusi ba ba ɔʋaŋaɛ klɔ! Yɛ ɔniliɛ gi alɔ blɔ ɔ, xe akɔ yɛ ìka lɛ eplo blɔ eboe zimizi na ní blɔ su i,

⁶ Yɛ abitɛ blɔ si kuze yɛ kaʋaŋaa ni yɛ kusumu yo baka gi kwiazesumu Yɛka Aya a, yɛ linɛ linu kusudra ani kigagla dɔni kanɔmɛ tsinɔ kanɔmɛ! Atɔ liba lɛ mɛ.

⁷ Dike, atrába ní aplɛ la mɛ, lɛ ɔnɔ kakaa ámɔ yɛ, banama gi bɛsɔ́ yɛ bidɔ mɛ kyɛ ɛ, lɛ banima petee ní kesea aʋa biabemi ɔkpɛ yɛ! Ee, atɔ liba lɛ mɛ.

⁸ “Mɛ menu Alfa ni Omega.” Nite Ɔka Aya apani, “yɛ gi ɔlɛ ɛ, xe eze e, xe atrába ɛ, kigaglaɛ petee onetee.”

Bebu Kristo ebasɛ Yohanes

⁹ Mɛ menu Yohanes, mlɔ onemi lɛ ŋwisi ɔnɔ gi ɔlɛ ni Yesu kude e, menu mlɔ ɔgaglɔnɛ ní litɔplɛplɛkese ni ikù kpɛkpɛ ní ɔziã mɔmɔ nɔ gi izɛɛba banama gi benu yɛ kaʋaŋaa mɛ banɛ ba aʋa ɛ. Meze ní Patmos kunisi yo kese katɔ aʋa kɔkpɛ Aya yɛ liboe le ani katsalia kuŋaŋa ki Yesu loso o.

¹⁰ Meze ní Ɔfuɛfuɛ Dradra lɔ mɛ ní Ɔkaɛ yɛ liwe le aʋa, lɛ menu ole gagla ɔtɔ ní mɛ kedea, ŋwisi kakuklui keeyi kinɛ, lɛ ɛpani si:

¹¹ “Kidiliɛ gi wɔmɔ ɛ, ŋwlimi kɛ kpɛ ní keplekpa mɛ, tɔ kɔ ka tsisi isɔli ha tigloele le gi ilɛ ní Efeso ni Smirna ni Pergamo kɔpɔni Tiatira ni Sardis ani Filadelfia kɔpɔni Laodikea.”

¹² Mekyi, si mídi ɔniliɛ gi eegu kunugu yo ni me e. Agi mekyi i, mamɔ sika kani ise tigloele,

¹³ lɛ ní kani yɛ ise le kusi i, mamɔ ɔnutɔ gi ɔlɛ ŋwisi “Ɔnɔɛ Yebi ye” kinɛ ɛ, gi akpɛ liwu gblamadzaɛtɔ ɔ, gi liplee na yɛ kuklikpɔɔ ɔ, lɛ akɔ sika yɛ lisaba ɛtɔ akɔ anya yɛ kakɔa mɛ ɛ.

¹⁴ Yɛ litukpo le ni yɛ siya sɛ sixwa pititi ŋwisi ɖeti pititi yɛ kinɛ ɛ, ŋwisi amukla kinɛ ɛ, lɛ yɛ bimbi ʋe bilɛ ŋwisi kifu binemi kinɛ ɛ,

¹⁵ lɛ yɛ ikli lɛ izeŋle ŋwisi ɔla gi bebu ní kifu ligble le me kinɛ ɛ, lɛ yɛ ole lo eeyì ŋwisi inipe glegle gi iidɔ limu ne lɛ ozi lo kinɛ ɛ.

¹⁶ Lɛ evu badzidziebi tiegloele ní yɛ kaŋawla mɛ ɛ, lɛ ihɛ nunu gblamadza inugu tiʋa edo edɔni yɛ onugu lo me. Yɛ aŋu na mɛ eekle ŋwisi kemizea liwo le kinɛ ɛ.

¹⁷ Gi mamɔ yɛ ɛ, madɔ ní yɛ ikli lɛ onu ŋwisi ɔnɔ gi etse kinɛ ɛ. Lɛ akɔ yɛ ɔŋawla lɔ atrɔ ní mɛ aʋa lɛ apani si, “Wukíse lifu u, mɛ menu Ɔtɔpu yɛ ni Ɔgɔgɔɛ.

¹⁸ Mɛ malɛ ligbã́, metse, pɔ̀ di ke, malɛ ligbã́ nɛ kɔtsinɔ ní kanɔmɛ anɔmɛ, lɛ safi ʋa gi bɛki mɛ kigagla ní kutseo ni bekpo ʋa mɛ aʋa ɛ, balɛ ní mɛ awla.

¹⁹ “Lɛ loso ŋwlimi plɛ kidiliɛ gi wɔmɔ ɔ, gi kilɛ abla a ni kidiliɛ gi kitraba kɛ mɛ lɛ kede e.

²⁰ Badzidziebi tiegloele ba gi wɔmɔ ní mɛ kaŋawla mɛ ɛ, ani sika yɛ kani yɛ ise tigloele le e, lɛ eboe kpokpo la ese enu si: Badzidziebi tiegloele ba benu Aya yɛ baxwɛdzɛ kí isɔli ha tigloele le, lɛ kani ise tigloele le inu isɔli ha tigloele e.