Mateo 4 - KUNYANYA VUVU YƆ

Ozimizi ye efeke Yesu edi

¹ Lɛ Aya yɛ Ɔfuɛfuɛ nɔ ɛgbani Yesu i tsinɔ ní ɔyaya klɔ tɔ Ozimizi ye ofeke ye odi i.

² Agi Yesu aza kuʋɛ ewe avitene elesi ni kemize pɔ́ ɛ, kuʋɛ kwiku ye.

³ Lɛ Ozimizi ye aba yɛ klɔ ɔ; lɛ asi yɛ si, “Xe Aya Yebi wonu i, kɔlɔ ki tɔ akla la ya edzì bidɔŋaŋa aki wɔ.”

⁴ Pɔ̀ Yesu ebu lɛ onu si, “Aya Liboe le lipani si, aní lìklãtata tete aʋa ɔnɔ aaze ligbã́. Pɔ̀ ɔnɔ aaze ligbã ní liboe kakaaɛ lɛ gi Aya aapani onu u.”

⁵ Lɛ Ozimizi ye atsini Yesu ní Yerusalem, ɔma dradra lɔ mɛ ɛ; lɛ atrɔ yɛ ní lisɔligba lɛ lɛ ɔpiɔpiɔ klɔ kee e.

⁶ Niklɔ asi Yesu si, “Xe Aya Yebi wonu i, pí atɔ dɔ kesea; lɛ ese linu si Aya Liboe le lipani i plɛ si, ‘Aya aaki yɛ baxwɛdzɛ ba ɔsã ní wɔ su gi biasɔli wɔ ní ba kuwlaa mɛ ɛ, nite si wɔ́trakɔ ɔkli isa likla a.’ ”

⁷ Yesu ebu le onu si, “Pɔ̀ Aya Liboe le lipani dzɛ si, ‘Ɔkaɛ gi onu wɔ Aya ɛ, wukífeke ye edi i.’ ”

⁸ Lɛ dzɛ ɛ, Ozimizi ye atsini Yesu ní lito gyɔgyɔ ɛtɔ aʋa a. Lɛ ebu kelea mɛ bèkusi ʋa pɔ́ ani ba kuʋidi yo abasi yɛ.

⁹ Lɛ Ozimizi ye asi yɛ si, “Xegi wodu aklamasi kese xe wɔkpɔ̀ mɛ ɛ, maakɔ bekusi ʋa ya petee ɔki wɔ ɔ.”

¹⁰ Lɛ Yesu ebu lɛ onu si, “Sɛ ní mɛ su, Wɔ Satana, Liboe le lipani si, ‘Ɔkaɛ gi onu wɔ Aya ɛ, yɛ ko wɔasumu; lɛ yɛ lixwɛ ko wɔawa a!’ ”

¹¹ Nite si Ozimizi ye asɛ ní Yesu su; lɛ Aya yɛ baxwɛdzɛ ba bɛba ɛki yɛ kupɔnɔ ɛ.

Yesu ekpese yɛ axwɛ na ní Galilea

¹² Agi Yesu enu si bɛkpɛ Yohanes ni ligba lɛ ɛ, atrɛ ní Galilea.

¹³ Asɛ ní Nazaret lɛ adzɛ eze ní Kapernaum, gi onu ɔma ɔtɔ ní Galilea limu ne kutu ní Zebulon ni Naftali kuseo me e.

¹⁴ Nite yɛ kigaglaɛ kize, atɔ Yesaya Aya yɛ oboedoplɛɛ yɛ liboe le liba lɛ mɛ si,

¹⁵ “Zebulon kesea ni Naftali kesea, kuse gi kuli axu la kudeo aʋa ɛ ní Yordan kewetu ya, Galilea, banama gi bénu Yudanɛ ma ba kese!

¹⁶ Banama gi balɛ ní litumu ne me e, biamɔ kuklekle ʋidi. Lɛ banama gi bali ní kutseo litumu ne kesea aʋa a, kuklekle kwiaba ba aʋa a.”

¹⁷ Dɔnɔ ní lipoe lɛ klɔ aʋa ɛ, Yesu ekpese kusɔli si, “Mlekyi kede akpɛ mlɔ eboe zimizi na, lɛ ese linu si lifunu ne kaʋaŋaa ketii pɔnɔ!”

Yesu axwa yɛ badɔkpasi tɔpu ba

¹⁸ Agi Yesu azɛɛga aza ní Galilea limu ne kutu yɔ ɛ, amɔ beneminyime tiaʋa gi benu bakpábu i. Simon gi bɛzɛxwa fɛ si Petro e, ni yenemi ye Andrea. Bezee bu akpa la nì dzikle.

¹⁹ Lɛ Yesu asi ba si, “Mlekuni mɛ kude tɔ mabasɛ mlɔ banima kubúbú yo.”

²⁰ Kyɔŋ lɛ bɛyurɔ ba dzikle lɛ bekuni yɛ kude e.

²¹ Yesu atrɛ ní ɔtɔ nɔ lɛ azɛɛmɔ beneminyime tiaʋa dzedze e. Ba beze Yakobo ni Yohanes, gi benu Zebedeo yɛ bebi ba. Beze ní ba katapokpa me ni ba ɔkaɛ gi bɛzɛlulɔ ba dzikle ye e. Niteme si Yesu axwa ba kyɛ.

²² Kyɔŋ klɔ ko e, bɛsɛ ní katapokpa ni ba ɔkaɛ su lɛ bekuni ni Yesu kude e.

Yesu abasɛ bidɔ, apani Liboe Gbã nɛ, lɛ ayɔni banyanya ʋa kyɛ ɛ

²³ Yesu aklanɔ ní Galilea petee. Abasi bidɔ ní Yudanɛ ma itsa klɔ. Apani Kaʋaŋaa su Liboe Gbã nɛ, lɛ ayɔni banama su gi bànya ede ede na eze e.

²⁴ Benu Yesu unu ní Siria kesea petee me nite si banima bɛmani banyanya ba petee ní yɛ klɔ dɔni ikɔ ikɔ lɛ. Bɛzɛnyà bànya ede ede: kusutà, ifuɛfuɛ zimizi, kukpakpanya ani ɔnɔse kapɛ tiele kutsetse. Lɛ Yesu ayɔni ba petee e.

²⁵ Anɔkpi la ɛdɔ Galilea, Dekapolis, Yerusalem, Yudea ani kuseo liɔ klɔ gi kuli ní Yɔdan kewetu ya ɛ, ekuni yɛ kude.