Marko 8 - KUNYANYA VUVU YƆ

Yesu agani banɔ akpe tiene ní bidɔŋaŋa a

¹ Ní ewe alaklɔ mɛ ɛ, linɔkpi ʋidi dzedze itɔ likpɛ likpɔ dzɛ. Lɛ gi kididɔ kize gi biaŋa ɛ, Yesu axwa yɛ badɔkpasi ba manɔ ní yɛ klɔ, lɛ asi ba si,

² “Banɔ ba ya ba liboe liga mɛ asigaga, lɛ ese linu si ewe tatá la ya gi balɛ ní mɛ su u, lɛ ba bidɔŋaŋa bɛ fɛ biblo o.

³ Xegi médi ba aʋa a, xe makpɛ ba kudeo e, biatɔ ɔpiti ní kudeo aʋa, lɛ ese linu si batɔ ba idɔ klɔ idze e.”

⁴ Yɛ badɔkpasi ba beʋi ye si, “Nifɔ ɔnutɔ aamɔ kiŋaŋa ɛki linɔkpii lɛ xe biaŋa a, xe biakè ní ɔyaya klɔ ya na a?”

⁵ Lɛ Yesu eʋi ba si, “Aklã tasɛ alɛ mlɔ awla a?” Bebu lɛ onu si, “Aklã tegloele.”

⁶ Lɛ asi linɔkpi le si beze keseatsalia. Lɛ akɔ aklã tegloele la a, xe edo Aya ɖase ní la aʋa a. Lɛ ayaʋi la mɛ xe akɔ aki yɛ badɔkpasi ba si bakɔ alɛ̀ aki linɔkpi le e. Niteme si badɔkpasi ba bɛlɛ bidɔ mɛ ɛki ba petee e.

⁷ Akpa wli wli klakla ʋi atɔ eze ní badɔkpasi ba awla. Yesu edo ɖase ní la aʋa, lɛ akɔ la aki yɛ badɔkpasi ba si bakɔ la fɛ alɛ aki linɔkpi le e.

⁸ Ɔnɔ kakaa aŋa bidɔ mɛ gi eke e. Lɛ kede e, badɔkpasi ba bɛhali bidɔ mɛ gi bɛŋa xe bigɔ ɛ, biyí kusɔʋi tugloele.

⁹ Banima ba kisrɛsrɛ mɛ kize ŋwisi akpe tiene kinɛ.

¹⁰ Gi Yesu akpɛ banima ma kude pɔ ɛ, emu eku ní katapokpaa mɛ lɛ atrɛ ní Dalmanuta bidɔ mɛ mɛ̀ ɛ.

Farisianɛ ma bɛpɛ linugutseboe dɔni Yesu iwla mɛ

¹¹ Lɛ Farisianɛ batɔ bɛba Yesu klɔ xe bekpese eboe la kuhe ni yɛ ɛ. Bezeekeni ye edi lɛ loso e, beʋi idɔni yɛ awla si ɔbitɛ linugutseboe litɔ ɔki ba tɔ beedi gi liabasɛ si Aya yɛ anya kpɛ yɛ ɛ.

¹² Pɔ̀ Yesu egu hũu lɛ apani si, “Ege lɛ loso omono kelea lia ya kɛɛpɛ linugutseboe e? Owo, Misi mlɔ anukwarɛɛ! Bátraki mlɔ gyesi liɛ ya a.”

¹³ Lɛ Yesu asɛ ní ba su u, emu eku ní katapokpaa me lɛ atsa limu ne xe atrɛ ní oge lɔ kɔlɔ ɛ.

Farisianɛ ma ni Okusi ye Herodes ba bidɔbasɛbasɛ ʋɛ

¹⁴ Yesu yɛ badɔkpasi ba bedze bákɔ aklã atɔtɔ evu sani tile gi lizee ba awla ní katapokpaa mɛ ɛ.

¹⁵ Yesu agba ba si, “Mleze ni aŋu tɔ mledi mumɔ ní Farisianɛ ma ni Okusi ye Herodes ba kunyagbãa su.”

¹⁶ Bevu liboe le edi ní batsali kusi. Lɛ bɛsi si, “Agi kúkɔ aklã tɔtɔ evu i, lɛ loso apani liboe lɛ ya te e.”

¹⁷ Agi Yesu kɔ ete liboe lɛ gi bɛzeedo onu i, eʋi ba si, “Ege lɛ loso mlɔ kugyodi yo kwitrɛ ní liklã su u? Kɔ mleʋínu eboe la ese fukɔ na a? Kitɛ xe mlɔ begyodi ʋa bɛdɔ sra sɛ nite e?

¹⁸ Bimbi bilɛ mlɔ awla pɔ̀ mlaʋímɔ na? Lɛ atukpa la alɛ mlɔ, pɔ̀ mlaʋínu na a? Mláplɛ aŋu u

¹⁹ lipoe lɛ gi makɔ aklã tetsu la aki banɔ akpe tietsu ba lò o? Bidɔ gɔgɔ ʋɛ kusɔʋi tusɛ mlɛhali i?” Bebu le onu si, “Kusɔʋi liɔfɔ ni tuʋa!”

²⁰ “Lɛ gi mayaʋi aklã tegloele la aki banɔ akpe tiene ba ɛ, bidɔ gɔgɔ ʋɛ kusɔʋi tusɛ mlɛhali i?” Bebu le onu si, “Kusɔʋi tugloele.”

²¹ Lɛ Yesu eʋi ba si, “Kɔ kɔna ni abla ɛ, mleʋínu eboe la ese dzɛ na a?”

Yesu ayɔ ni kaŋupo atɔ ní Betsaida

²² Gi bɛzɛklanɔ ɛ, bezeku Betsaida. Niklɔ banɔ batɔ bɛgbani kaŋupo atɔ ɛmanɔ ní Yesu klɔ. Lɛ bɛki yɛ litukpo si ɔgbɔni yɛ ɛ.

²³ Yesu evu kaŋupoa ɔwla lɔ lɛ agbani yɛ edono ní ɔma nɔ mɛ ɛ. Lɛ Yesu ebu sita sɛ atrɔ ní kaŋupoa bimbi ʋe aʋa a. Lɛ kede e, Yesu atrɔ awla ní yɛ aʋa lɛ eʋi ye si, “Wɔmɔ kiditɔ na a?”

²⁴ Onyimee efeke yɛ aŋu na lɛ ebú isu ya onu si, “Ee, mɛɛmɔ banima; pɔ̀ balɛ ŋwisi ise ko gi iga ɛza kinɛ ɛ.”

²⁵ Lɛ Yesu atrɔ awla la ní kaŋupoa bimbi ʋe aʋa dzɛ ɛ. Able kɔ onyimee edu yɛ aŋu na ke, lɛ yɛ bimbi ʋe bidra a, nite me si amɔ kidɔ kakaa tsrà a.

²⁶ Lɛ Yesu akpɛ yɛ kude si ɔtrɛ kepea ni ɔsã si “Kúdzitrɛ ní kamamia mɛ ɛ!”

Petro adra Yesu su

²⁷ Yesu ni yɛ badɔkpasi ba bɛsɛɛtrɛ ní kumami uliɔ klɔ gi kulɛ ní Kaisarea Filipi ɔma nɔ su mɛ ɛ. Lɛ eʋi ba ní kudeo me si, “Mlasi mɛ; nyaŋwɛ banima bizedo si, mɛ menu u?”

²⁸ Bebu le onu si, “Banɔ batɔ si wɔ wonu Yohanes kuni yo ɔkpɛkpɛ. Banɔ batɔ fɛ si wɔ wonu Eliya, lɛ banɔ dzedze batɔ fɛ si Aya yɛ oboedoplɛ tole ɔtɔ wonu u.”

²⁹ Lɛ eʋi ba dzɛ si, “Mlɔ pɔ̀ ɛ, nyaŋwɛ mlɛɛsɛ si menu u?” Petro ebu le onu si, “Wɔ wonu Kristo ye.”

³⁰ Lɛ Yesu akpɛ ɔsã aki ba si, “Mlakípani liboe lɛ ya ní mɛ su isi ɔnɔnɔ ɔ!”

Yesu apani ní yɛ kutseo su u

³¹ Lɛ Yesu ekpese yɛ badɔkpasi ba bidɔ kubasɛ si, “Lilɛ si, Ɔnɔɛ Ye Bi ye, ɔmɔ ɔziã glegle. Lɛ banɔtsitsi ba, Kusumu yo baka ba ni Ɔsã nɔ badɔbasɛ ba biadzi kede yɛ su u. Lɛ biaye ye, pɔ̀ ní ewe tata kede e, ayɔ gi aadzi ligbã a.”

³² Adra liboe le me asi ba. Lɛ loso Petro ebu ye kuka lɛ ekpese ye kutɛnɔ ɛ.

³³ Pɔ̀ Yesu ekyi edi yɛ badɔkpasi ba, lɛ aka aŋu mɛ aki Petro si, “Satana, titrɛ ní mɛ su! Wɔ begyodi ʋa bádɔ Aya kɔ ɔ; kisugya mɛ begyodi ba klɔ!”

³⁴ Lɛ Yesu axwa ɔnɔha lɔ ni yɛ badɔkpasi ba amanɔ ní yɛ isu ya su lɛ asi ba si, “Xegi ɔnutɔ apɛ si yiku ni mɛ kude e, lilɛ si odze yɛ isu ya liboe, otu yɛ osetsase lo tɔ ɔga aze ni mɛ kude e.

³⁵ Lɛ ese linu si ɔniliɛ gi aapɛ si yibu yɛ ligbã nɛ ɛ, aalila lɛ ɛ. Pɔ̀ ɔniliɛ gi yɛ ligbã nɛ lialila ɛ, ní mɛ litukpo loo ní Liboe Gbã nɛ litukpo e, aaze ligbã.

³⁶ Libi woli liaze lɛ mɛ ɛki ɔnɔ, xegi kelea mɛ bidɔ mɛ petee biadzi yɛ binɛ ɛ, pɔ aalila yɛ Esobo la na a?

³⁷ loo ege ɔnɔ aakɔ̀ atsrɛ yɛ Esobo la na?

³⁸ Xegi ɔnutɔ ese kuye ní mɛ su aloo ní mɛ liboe le su ní kele zimizia lia ya mɛ gi béte Aya ɛ, kɔ Ɔnɔɛ Ye Bi ye fɛ, aase kuye ní yɛ su xegi aba ní yɛ Ka kusudra mɛ ni yɛ baxwɛdzɛ dradra ba ɛ.”