Marko 3 - KUNYANYA VUVU YƆ

Yesu ayɔni ɔwla tsetse klɔʋiklɔʋi onete ní Lizemɔniwe le aʋa

¹ Agi Yesu edzì atrɛ ní Yudanɛ ma ɔtsaklɔ ní lipoe dzedze me e, amɔ ɔka ɔtɔ gi yɛ ɔwla lɔ ɛklɔʋi i.

² Banɔatɔ beze niklɔ gi bɛpɛ si beebu Yesu lipɔ ɛ. Lɛ loso e bedu aŋu na ní yɛ aʋa gaglaa tɔ beedi si aayɔni ɔnyanyaɛ ní Lizemɔniwe le aʋa na a.

³ Yesu asi onyimee si, “Ga lɛɛ ní ɔtɔ nɔ ya ní banima aŋu na mɛ.”

⁴ Lɛ eʋi banima si, “Ege blɔ ɔsã nɔ ɛki kude si kubitɛ ní Lizemɔniwe le aʋa na a? Kubitɛ kidɔ gbã loo kidɔ nyani nyani na a? Kubu ɔnutɔ yɛ ligbã́ loo kuzizi le na a?” Pɔ̀ bápani liboeboe.

⁵ Yesu edi ba aklanɔ ní kusuyeʋi me pɔ̀ fɛ ɛ, ba liboe liga yɛ asigaga, lɛ ese linu si ba ina nɛ mɛ izee gagla lɛ ba linɛ lígyɔ ɔ. Lɛ asi onyimee sì: “Nina wɔ ɔwla lɔ!” Anina lɔ ko lɛ edzì iku lɔ kiku ye e.

⁶ Lɛ Farisianɛ ma bɛsɛ ní ɔtsaklɔ lɛ bɛzɛbitɛ kutsatsa nì Herodes ye baʋatrɔatɔ kyɔŋ. Lɛ bɛbitɛ kunyanya si biaye Yesu u.

Yesu ayɔni banyanya glegle atɔ ní Galilea limu ne kutu

⁷ Lɛ kede e, Yesu ni yɛ badɔkpasi ba bɛsɛ trɛ ní Galilea Limu ne kutu lɛ linɔkpi ʋidi itɔ likuni yɛ kude e.

⁸ Banima bɛdɔ Galilea, Yudea, Yerusalem ani Idumea bidɔ mɛ mɛ̀. Batɔ fɛ bɛdɔ Yordan kedaa ni ima ʋidi ilɛ gi iklani Tiro ni Sidon i. Banɔ ba ya pɔ́ bɛba Yesu klɔ lɛ ese linu si benu yɛ kiboebitɛ onu.

⁹ Linɔkpi le likeme lɛ loso e, Yesu asi yɛ badɔkpasi ba si bapɛ́ katapokpa atɔ aki yɛ tɔ banima bakípɔ yɛ akpɛ ɛ.

¹⁰ Lɛ ese linu si ayɔni banyanya glegle. niteme si banyanya dzedze ba pɔ́ bɛzɛɛŋwlɛ si bɛɛgbɔni yɛ ɛ.

¹¹ Lɛ xegi ifuɛfuɛ zimizi ne gi ize ní banɔatɔ mɛ imɔ Yesu ko e kɔ begleʋe edɔ yɛ ketu ya ni ozi tatata si, “Wɔ wonu Aya Yebi ye!”

¹² Pɔ̀ ɛ, Yesu akpɛ ɔsã gagla akí ifuɛfuɛ zimizi ne si ikísi ɔnɔnɔ ɔniliɛ gi yɛ yenu u.

Yesu akya yɛ banɔkpɛkpɛ liɔfɔ ni tiaʋa ba

¹³ Gi Yesu asɛ ní klɔ ɛ, emu ketokpa katɔ lɛ axwa banama gi apɛ ɛ, lɛ bɛba yɛ klɔ ɛ.

¹⁴ Lɛ ebu ba mɛ liɔfɔ ni tiaʋa gi aki linyi ne si, banɔkpɛkpɛ ba ɛ. Lɛ asi ba si: “Makya mlɔ si mleze ní mɛ su.” Kɔpɔnɔ ɛ, maatsisi mlɔ tɔ mlaapani liboe gbã nɛ

¹⁵ Lɛ maaki mlɔ kigaglaɛ gi mlakɔ kpikpini ifuɛfuɛ zimizi ne kudono e.

¹⁶ Banɔ liɔfɔ ni tiaʋa ba klɔ gi akya ɛ, ba benu: Simon (Yesu aki yɛ linyi si Petro).

¹⁷ Yakobo ni yenemi ye Yohanes gi benu Zebedeo yɛ bebi ba a (Yesu aki ba linyi si Boanerges gi lɛ ese linu si, “dzeni kugugu benyime”).

¹⁸ Bagɔgɔ ba benu Andrea, Filipo, Bartolomeo, Mateo, Toma, Yakobo gi onu Alfeo Yebi, Tadeo, Simon Kanaa ɔnɛ gi adimɛ nì yɛ kakàsea ɛ

¹⁹ ani Yuda Iskariot gi yɛ aba ebu Yesu akɔ ɛ.

Bebu Yesu lipɔ si Beelzebul ɔkpasi yɛ mɛ

²⁰ Lɛ kede e, Yesu atrɛ ní kepea mɛ. Dzɛ ɛ, linɔkpi ʋidi itɔ liba gi liki si Yesu ni yɛ badɔkpasi ba a, bámɔ lipoe xe biaŋa bidɔ fɛ ɛ.

²¹ Agi yɛ benete ba benu liboe le e, bekú kudeo me tɔ bɛzɛgbani yɛ, lɛ ese linu si banima bezeepani si, “Eewle!”

²² Ɔsã nɔ badɔbasɛ batɔ gi bɛdɔ Yerusalem i, bɛzeepani si, “Beelzebul yɛ ɔkpasi yɛ mɛ! Lɛ yɛ onu ifuɛfuɛ zimizi ne ɔkaɛ, lɛ yɛ ɛɛki Yesu kigaglaɛ xe ɛɛkpikpini ifuɛfuɛ zimizi ne edono o.”

²³ Lɛ Yesu axwa ba manɔ ɔ, xe egu kunugu yo aki ba ní abee ʋa me si, “Kitɛ Abosam yɛ aatani abosam yɛ kukpikpinɔ dono e?

²⁴ Xegi keduyɔyɔ kɛba keseatɔ mɛ gani kifúgɔnigɔni mɛ ɛ, kesea lia klɔ kiayaʋi.

²⁵ Xegi okú ɔtɔ ɛlɛ isu ya kpɛ paso paso ʋa mɛ ɛ, xe bɛɛgɔni i, okú lɔ klɔ aayaʋi.

²⁶ Lɛ loso e, xegi Abosam yɛ kaʋaŋaa kɛlɛ kluʋikluʋi i, katrátani kuze lipoe gblamadza, kiayaʋi kɔ kedu i.

²⁷ “Ní anukwarɛ mɛ ɛ, ɔnɔnɔ ɔ́tratani kutiku ní ɔnɔ gagla yɛ kepea mɛ ɛ xe aahali yɛ bidɔ mɛ ɛ, sani si anya ɔnɔ gagla yɛ akpɛ ɔtɔ ɔ, xe ableke aatani kiditɔ kuzuru u.

²⁸ “Mɛɛtrɔ likla ní lɛ aʋa ɛki mlɔ si Aya aakɔ̀ banima eboe zimizi kakaa ni ebusioboe kakaa gi biado e, kukɔkyɛ ba.

²⁹ Pɔ̀ ɔniliɛ gi aapani liboe zimizi kuyurɔ Aya yɛ Ɔfuɛfuɛ nɔ ɛ, batrákɔ ɛkyɛ yɛ liwewe e, lɛ ese linu si abitɛ liboe zimizi gi batrákɔ ɛkyɛ yɛ liwewe.”

³⁰ Yesu apani nite lɛ ese linu si banɔatɔ bɛpani si, “Ɔfuɛfuɛ zimizi ɔkpasi ní yɛ mɛ.”

Yesu yene ní yɛ benemi ba

³¹ Lɛ Yesu yene nì yɛ benemi ba bɛba eku u. Bɛlɛɛ ní oŋwe no lɛ bɛkpɛ odu itsisi yɛ si ɔba a.

³² Ɔnɔha ɔtɔ eze Yesu su lɛ bɛsi yɛ si, “Dike! Wone ni wɔ beneminyime ba ani wɔ benemidzɛ ba balɛɛ ní oŋwe no gi bɛɛpɛ wɔ ɛ.”

³³ Yesu ebu le onu si, “Nyaŋwɛ onu mone e? Lɛ nyaŋwɛ ba benu mɛ benemi ba a?”

³⁴ Lɛ edi banama gi bedi iklani yɛ ɛ, lɛ apani si, “Mledi! mone liɛ ya, lɛ mɛ benemi ba ba ya a!

³⁵ Ɔniliɛ gi izɛbitɛ kidiliɛ gi Aya apɛ ɛ, yɛ onu mɛ oneminyime e, nì mɛ onemidzɛɛ ani mone e.”