Marko 16 - KUNYANYA VUVU YƆ

Yesu yɛ kuyɔyɔɔ dɔni bekpo ʋa mɛ

¹ Agi Lizemɔniwe le liza ɛ, Maria Magdalene, Maria Yakobo yene, ani Salomɛ bedzi bawa flafla ʋa tɔ bɛzɛɛsra ɛki Yesu yɛ okpo ye.

² Lipadzruwe le livlɛ lɛ fififĩ gi liwo le liitu i, bɛtrɛ ní ɔdrɔ lɔ su.

^3-4 Beʋi bahanuglɔ ba ní kudeo me si, “Nyaŋwɛ atrámli likla nɛ ní ɔdrɔ lɔ onu iiki blɔ abla ɛ?” (Li ze likla ʋidi). Pɔ̀ gi bedi ikpɛ ɛ, bɛmɔ si bemli likla nɛ ɛzanɔ kooko.

⁵ Lɛ loso beti eku ní ɔdrɔ lɔ mɛ ɛ; níklɔ bɛmɔ ɔyasɔʋi ɔtɔ gi ɛkpɛ liwu pititi itɔ ɔ xe odi ní kaŋaa mɛ ɛ. Liki si lifu liku ba.

⁶ Asi ba si, “Lifu likíku mlo.” “Mete si Yesu gi onu Nazaret ɔnɛɛ, gi bɛkú ní osetsase lo su i, yɛ mlɛpɛ́ ɛ. Ɔ́ma niya a bɛyɔni yɛ! Mledi niya gi bɛplɛ yɛ ɛ.

⁷ Abla ɛ, mlatrɛ tɔ mlazɛɛsi yɛ badɔkpasi ba, ni Petro si: ‘Eku ɔtɔ aki mlɔ atrɛ ní Galilea; níklɔ mlamɔ yɛ, ŋwisi kiliɛ gi asi mlɔ kinɛ ɛ.’ ”

⁸ Lɛ bese do ní ɔdrɔ lɔ mɛ gi bezesugu ni lifu i. Bédo liboeboe asi ɔnɔnɔ, lɛ ese linu si lifune liku ba.

Yesu ebu isu ya abasɛ Maria Magdalene

⁹ Gi Yesu ayɔ ádɔ ní bekpo ʋa mɛ Lipadzruwe le livlɛ lɛ ɛ, ebu isu ya abasɛ Maria Magdalene ɔniliɛ klɔ mɛ gi akpikpini ifuɛfuɛ zimizi tigloele le edono e akpɛ ɔtɔ.

¹⁰ Yɛ azɛɛsi yɛ bagaglɔnɛ ba. Bɛzɛɛwa awowoe la xe bezee bemi ye e;

¹¹ lɛ gi benu u gi apani si i Yesu ɔlɛ ligbã gi yɛ amɔ yɛ ɛ, bázɛ yɛ aʋa aŋa a.

Yesu ebu isu ya abasɛ yɛ badɔkpasi tiaʋa

¹² Lɛ ya kede e, Yesu ebu isu ya ní kizeze me dzedze me abasɛ yɛ badɔkpasi tiaʋa gi beze ní kudeo aʋa ɛ.

¹³ Bedziba edo liboe le ɛsi badɔkpasi gɔgɔ ba, pɔ̀ bázɛ lɛ aʋa ɛɛŋa a.

Yesu ebu isu ya abasɛ yɛ badɔkpasi liɔfɔ ni tole ba

¹⁴ Gɔgɔɛ, Yesu ebu isu ya abasɛ yɛ badɔkpasi liɔfɔ ni tole ba gi bɛzɛŋa bidɔ mɛ ɛ. Aka aŋu mɛ aki ba lɛ ese linu si kuziŋa kúze ba awla a; lɛ bɛkɔ ina gagla si bátrazɛ banama gi bɛmɔ yɛ si ɔlɛ ligbã́ nɛ ɛ, aʋa ɛɛŋa a.

¹⁵ Asi ba si, “Mlatrɛ ní kelea petee me tɔ mlapani Liboe Gbã nɛ aki ɔnɔ kakaa elu.

¹⁶ Ɔniliɛ klɔ gi azɛ aŋa a xe bɛkpɛ kuni ɛki yɛ ɛ, biazɛ yɛ ligbã́; pɔ̀ ɔniliɛ klɔ gi ɔ́zɛ ŋa ɛ, biabu ye lipɔ.

¹⁷ Banama gi bɛziŋa ɛ, biaki ba kigagla tɔ biabitɛ enugutseboe la: biakpikpini ifuɛfuɛ zimizi ne kudono ní mɛ linyi ne me; biagu kunugu yo ni binemi vuvu ʋɛ.

¹⁸ Xe bevu bagblaga lo bɛŋwɛ aɖi kakaa ɛ, batrámɔ kutse; biatrɔ awla ní banyanya ba aʋa, gi biahaya.”

Befeke Yesu itsini lifunu ne

¹⁹ Agi Yesu apani aki ba pɔ ɛ, befeke ye tsini lifunu ne lɛ eze ní Aya yɛ kaŋaa mɛ ɛ.

²⁰ Lɛ yɛ badɔkpasi ba bɛzɛpani liboe le ní ɔkɔ kakaa a; lɛ Ɔkaɛ eze nì ba gi atrɔ likla lɛ aʋa aki ba si ba kiboedoe kinu anukwarɛ gani enugutseboe ala gi bɛbitɛ mɛ ɛ.