Marko 15 - KUNYANYA VUVU YƆ

Yudanɛ ma bɛgbani Yesu i manɔ ní Pilato klɔ ɔ

¹ Keletitia livlɛ lɛ fififĩ i, kusumu yo baka ba, Yudanɛ ma banɔtsitsi ba, ɔsã nɔ badɔbasɛ ba, ani Yudanɛ ma betsixwa Ʋidi ba pɔ́ bɛkpɛ likpɔ kise ise niteme si bɛtrɔ likla ní liboe tile aʋa. Bɛkpɛ Yesu bibɔ ʋɛ, lɛ bɛgbani yɛ ɛsɛnɔ; lɛ bɛkɔ yɛ ɛkpɛ awla ɛki Pilato e.

² Pilato eʋi ye si, “Wɔ wonu Yudanɛ ma okusi ye na a?” Yesu ebú le onu si, “Ee, kiliɛ gi wɔɛpani lɛ ɛ, nite lilɛ.”

³ Kusumu yo baka ba bɛkɔ eboe glegle ní Yesu su u.

⁴ Lɛ loso e, Pilato eʋi ye dzɛ si, “Wɔtrabu isu ya onu lò o. Dani wɔenu kiliɛ gi bɛɛtsa wɔ onu i?”

⁵ Pɔ̀ Yesu ɔ́pani liboeboe, nite si litu Pilato kugyɔ ɔ.

Pilato atsa kutsépia akí Yesu

⁶ Ní Kutseolidɔzawe kakaa aʋa ɛ, lize ligoʋi ki Pilato si ɔyurɔ ɔnɔ tole gi ɔlɛ ligba a, gi banima biaʋi i ɔki ba.

⁷ Ni lipoe lɛ klɔ mɛ ɛ, onyime ɔtɔ gi bɛzɛxwa si Baraba ɛ, eze ní banɔatɔ gi bɛyɔ kedu u, xe beye banɔ ɔ, xe lɛ loso bɛkpɛ ba ligba ɛ, ba kusi.

⁸ Linɔkpi le litsa lɛ banima beʋi idɔnɔ Pilato awla si ɔbitɛ kiliɛ gi izɛbitɛ ɛki ba a.

⁹ Lɛ eʋi ba si, “Mlɛpɛ si miyurɔ Yudanɛ ma okusi ye ki mlɔ na a?”

¹⁰ Etè mɔmɔmɔ si kusumu yo baka ba bɛkɔ Yesu ikpɛ yɛ awla kɔkpɛ gi bɛkɔ kaŋuzã ní Yesu su loso o.

¹¹ Pɔ̀ kusumu yo baka ba bɛfuɛ ɛkpɛ linɔkpi le me si, beʋi si, Pilato tɔ ɔyurɔ Baraba boŋu ɔki ba a.

¹² Lɛ Pilato eʋi linɔkpi le dzɛ si, “Kɔ ege mlɛpɛ si mibitɛ ni ɔniliɛ gi mlɛɛxwa si Yudanɛ ma okusi ye e?”

¹³ Bɛkpɛ ozi lo si, “Ku ye ní ose lo su!”

¹⁴ Lɛ Pilato eʋi dzɛ si, “Liboe zimizi woli abitɛ ɛ?” Bɛkpɛ ozi lo gaglaa ɛsanɔ si, “Ku ye ní ose lo su!”

¹⁵ Gi Pilato apɛ si yibitɛ ní linɔkpi le kupɛpɛɔ aʋa loso e, ayurɔ Baraba aki ba a. Aki si bekusi Yesu, lɛ akɔ yɛ akpɛ awla si bazekú ye ní ose lo su i.

Baguta ba bɛkpɛ Yesu kakpaa

¹⁶ Baguta ba bɛgbani Yesu itsinɔ ní Roma banɛ ma ɔʋaŋaɛ yɛ kepea mɛ, lɛ bɛxwa baguta ba lihakpɔ gɔgɔ lɛ ɛkpɛ likpɔ ɛ.

¹⁷ Bɛkɔ liwu kyíkyĩ ikpɛ ɛki yɛ, lɛ beyo bibu ʋe likusikuto ekume ɛki yɛ ɛ.

¹⁸ Lɛ bekpese yɛ kukpɔ̀ si: “Yudanɛ ma Okusi Ʋidi ye e, oze ligbã gblamadza!”

¹⁹ Bɛsa yɛ ose lo ní litukpo le; lɛ bebu sita sɛ ɛbali yɛ aʋa a; lɛ bedu aklamasi na kesea a, xe bɛkpɛ etukpo kesea ɛki yɛ ɛ.

²⁰ Agi bɛkpɛ yɛ kakpaa pɔ́ ɛ, bebu liwu kyíkyĩ nɛ ní yɛ su, lɛ bɛkɔ yɛ ɔtutɔ yɛ liwu le dzini kpɛ ɛki yɛ ɛ. Lɛ bɛgbani yɛ dono etsinɔ si beezeku ye ní ose lo su i.

Bekú Yesu ní ose lo su u

²¹ Agi bɛzɛtrɛ ɛ, bɛtsani onyime ɔtɔ gi bɛzɛxwa si Simon i. Simon aga ádɔ ní kumami yɔ mɛ xe azɛatrɛ ní Yerusalem ɔma nɔ mɛ ɛ. Lɛ gi baguta ba bɛtsani yɛ ɛ, bemi yɛ aʋa si ɔzɛ Yesu yɛ ose lo kutu. Simon ɔtutɔ lɔ ádɔ ní Kirene; lɛ yɛ bebi ba beze Alɛksanda ni Rufus i.

²² Bɛgbani Yesu itsinɔ ní ɔkutɔ gi bizɛxwa si Golgota ketokpaa aʋa a. Golgota lɛ ese linu si, “Litukpoxwa ozekɔ.”

²³ Lɛ bɛki yɛ wain gi bɛpisa ni kuwa tiitii kutɔ gi bizɛxwa si mire e, pɔ̀ Yesu ɔ́ŋwɛ yɛ ɛ.

²⁴ Lɛ bekú ye ní ose lo su xe bɛta exoeʋi la ɛki yɛ bidɔ kpɛkpɛ ʋɛ ɛ. Nite si bɛlɛ yɛ bidɔ mɛ ɛ.

²⁵ Lipoe lɛ gi bekú Yesu ní ose lo su i, lize livlɛ lɛ inyɔ ɔgɔtole.

²⁶ Lɛ kunutsatsaa liɔ klɔ gi bɛŋwlimi iku ní yɛ litukpo le onu i, kwipani si: “Yudanɛ ma Okusi Ʋidi ye.”

²⁷ Bekú beze tiaʋa kyɛ ní ise le su ipɔni Yesu; oze tole eze ní yɛ kaŋaa mɛ, lɛ ɔʋlaɛ eze ní yɛ kabaa mɛ ɛ.

²⁸ Liki si Aya liboe le liba lɛ mɛ si, “Beye ye ŋwisi eboe zimizi ɔbitɛbitɛ onu kinɛ na a!”

²⁹ Banama gi bɛzɛɛga ɛza ɛ, besugu ba etukpo la, lɛ bezeebu onugu me ní Yesu su si i, “Ɛhɛ̃ɛ! Aní wɔ wɔ si, wɔtrayaʋi Lisɔligba lɛ, tɔ wɔadzini le kuwa ní ewe tata mɛ ɛ?

³⁰ Ple ní ose lo su tɔ bu isu ya!”

³¹ Niteme ke kusumu yo baka ba ni ɔsã nɔ badɔbasɛ ba fɛ bɛkpɛ Yesu kakpaa ní ba tsali kusi si, “Ebu banɔ dzedze ba, pɔ̀ ɔ́tani isu ya kubu u!

³² Xegi yɛ onu Mesiya yɛ ɛ, gi onu Israel Okusi Ʋidi ye e, kɔlɔ ople ní ose lo su ablahate tɔ kwiazi yɛ aʋa ŋa a!” Lɛ banɔ tiaʋa ba klɔ gi beku ní ise le su ipɔni Yesu kyɛ ɛ, bekpini ye e.

Yesu yɛ Kutseo

³³ Agi inyɔ liɔfɔ ni tiʋa isa ɛ, litumu ne lidɔ ní kesea petee aʋa inyɔsasa tita.

³⁴ Agi inyɔ tita isa ɛ, Yesu akpe ozi tatata si, “Eloi, Eloi, lama sabaxtani!” Gi lɛ ese linu si, “Mɔka, Mɔka, ege lɛ loso wɔyurɔ mɛ ɛ?”

³⁵ Banɔ batɔ gi beeze ní klɔ ɛ, benu yɛ ozi lo, lɛ bɛpani si, “Mlata kutu, ɛɛxwa Eliya!”

³⁶ Banɔ baklɔ ba mɛ tole ese, lɛ azɛɛkɔ ɔsapo lo o, lɛ akpɛ lɔ ní kuda nyagba nyagba mɛ ɛ, lɛ ete lo ní ose gblamadza ɔtɔ onu, lɛ akɔ kɔ aki Yesu si ɔŋwɛ ɛ. Lɛ apani si, “Mlaplɛ litɔ kese tɔ kudi xe Eliya aaba pleni ye ní ose lo su i!”

³⁷ Gi Yesu akpɛ ozi lo gaglaa dzɛ ko lɛ ada onugu lo e.

³⁸ Lɛ onu klɔ ko e, kusaa gi bɛkɔ ɛlɛ Lisɔligba lɛ mɛ ɛ, kwikyĩ idɔni kaʋaa gakɔ nani kesea!

³⁹ Baguta ba ɔka ɔtɔ gi eze ní osetsase lo ɔtɔ nɔ ɔ, gi amɔ kiliɛ mɛ gi Yesu akɔ etse e, lɛ apani si, “Sugba sugba ɛ, Onyime liɛ, Aya Yebi ɔnyaa nu u!”

⁴⁰ Badzɛatɔ bɛlɛɛ ní ɔdzage no gi bezeedi eboa la gi ɛzɛɛba la mɛ ɛkpɛ ɛ. Maria Magdaladzee, ni Maria gi eze Yakobo nuvɔɛ ni Yose ba onee e, kɔpɔni Salomɛ, ba fɛ beze ní badzɛ ba ba klɔ kusi.

⁴¹ Lipoɛ lɛ klɔ gi Yesu eze ní Galilea ɛ, badzɛ ba klɔ beze ni yɛ kude, xe bɛzɛpɔni yɛ ɛ. Badzɛ dzedze gi bezeni yɛ kude eba Yerusalem kyɛ beze níklɔ.

Bevive Yesu

⁴² Lize Lisɔpa kulagɔ, liwe lɛ gi bizɛbla ɛplɛ ɛki Lizemɔniwe le e,

⁴³ Yosef gi ádɔ Arimatia ɛ, aba eku. Eze banɔtsitsi ba likpɔkpɛkpɛ lɛ mɛ ɔnɔ gi kubùbù kwize ní yɛ su u. Lɛ yɛ fɛ azeepe Aya yɛ Kaʋaŋaa kubabaa a. Edo igyi le atrɛ ní Pilato aŋu mɛ lɛ eʋi si bakɔ Yesu okpo ye aki yɛ ɛ.

⁴⁴ Pɔ̀ litu Pilato kugyɔ gi enu si Yesu etse kyikya te e. Axwa baguta ba ɔkaɛ, lɛ eʋi ye si Yesu anya etse na a.

⁴⁵ Lɛ gi enu baguta ba ɔkaɛ yɛ kunutsatsaa si Yesu anya etse e, Pilato ayurɔ okpo ye aki Yosef.

⁴⁶ Yosef edzi aklala evu, lɛ gi eple nì okpo ye ní osetsase lo su i, axla yɛ akpɛ ní aklala yɛ mɛ lɛ akɔ yɛ akpɛ ní ɔdrɔ ɔtɔ gi aki si bebu ní likla nɛ mɛ̀ mɛ ɛ. Lɛ kede e, aki si bemli likla ʋidi itɔ etsi ɔdrɔ lɔ onu.

⁴⁷ Maria Magdalene ni Maria Yose yene bɛmɔ ní niklɔ gi bɛplɛ Yesu yɛ okpo ye e.