Marko 12 - KUNYANYA VUVU YƆ

Yesu ebu abee ní wain yɛ ɔnyrɔ nɔ aʋa bedidiatɔ su

¹ Lɛ Yesu abasɛ ba bidɔ mɛ gani abee ʋa mɛ si: “Liba lɛ mɛ si onyime ɔtɔ awa wain yɛ ɔnyrɔ, lɛ akpɛ kuka aklani lɔ ɛ. Lɛ etu lizokpo fɛ aki wain yɛ ebi la kukaka ɛ. Lɛ awa ɔnyrɔ nɔ lipegba gyɔ́gyɔɛtɔ fɛ ɛ. Niteme si akɔ ɔnyrɔ nɔ akpɛ awla aki apaa banyrɔmɛdzɛ batɔ, lɛ aga kude e.

² Agi wain yɛ ligúpoe le lina ɛ, atsisi yɛ ɔnɔsumu ɔtɔ ní ɔnyrɔ nɔ aʋa bedidi ba klɔ si ɔzɛ yɛ ɔŋa klɔ ɔmani yɛ.

³ Pɔ̀ gi ɔnɔsumu ye adzɛ ɛ, ɔnyrɔ nɔ aʋa bedidi ba bevu ye kusi, lɛ bɛkpikpini yɛ ɛtsisi ni iwla pluplu i.

⁴ Lɛ kede e, ɔnyrɔ nɔ onetee akpɛ yɛ ɔnɔsumu dzedze ní ba klɔ. Bɛsa yɛ bidɔ ní litukpo le lɛ bɛkpɛ yɛ kuyeo e.

⁵ Ɔnyrɔ nɔ onetee atsisi onɔsumu dzedze dzɛ, lɛ beye ye e. Nite ke bɛbitɛ banɔ glegle atɔ gi akpɛ ɛ, bekusi batɔ, lɛ beye batɔ fɛ ɛ.

⁶ Ɔnɔ tole kpoo gi agɔ ɔ gi biakpɛ dzɛ ɛ, yɛ eze ɔkaɛ ɔtutɔ lɔ yebinyime gi alɔ ɛ. Gɔgɔɛ atsisi yebinyimee ní ba klɔ ni kugyodi si, ‘biabu yebinyimee.’

⁷ “Pɔ̀ ɔnyrɔ nɔ aʋa bedidi ba bɛsi ba ahanuglɔ ba si, ‘Ɔnyrɔ nɔ onetee Yebi ye iliɛ. Mlaki tɔ kuye ye tɔ yɛ kaŋasea kiadzi blɔ kanɛ.’

⁸ Nite si bɛsɔ́li obinyimee, lɛ beye ye e, lɛ bɛŋwia yɛ ɛkpɛ ní ɔnyrɔ nɔ kedea ɛ.

⁹ “Ege mlegyo edi si ɔnyrɔ nɔ onetee aabitɛ ɛ? Ɔnyrɔ nɔ onetee aaba ye ɔnyrɔ nɔ aʋa bedidi ba klɔ aaye ba, kɔ akɔ wain yɛ ɔnyrɔ nɔ akpɛ ní ɔnyrɔ nɔ aʋa bedidi dzedze awla ɛ.

¹⁰ Lilí lɛ mɛ si mlɛkla ní Aya liboe le me si, “ ‘Likla ɛlɛ klɔ gi beglitrɔ ba bebu iʋe si lípɛ ɛ, lɛ liba edzi ogó no aʋa likla veve le.

¹¹ Ɔkaɛ Aya yɛ abitɛ lɛ ɛ. Lɛ linu linugutseboe ʋidi ní blɔ aŋu mɛ!’ ”

¹² Lɛ Yudanɛ ma baka ba bɛpɛ si bévu Yesu u, lɛ ese linu si betè si basu ebu abee liɛ klɔ ɔ. Pɔ̀ gi bezese linɔkpi le onu i, bɛyurɔ yɛ, lɛ bɛsɛ ɛ.

Beʋi Yesu eboe ní Kagyɔa Kutsatsa su u

¹³ Lɛ kede e bɛkpɛ Farisianɛ batɔ ni Okusi ye Herodes baʋatrɔ batɔ ní Yesu klɔ tɔ bapunu yɛ gani beʋiʋi me.

¹⁴ Agi bɛba yɛ klɔ ɛ, bɛsi yɛ si, “Ɔdɔbasɛ yɛ, kwite si wuzɛɛpani anukwarɛɛ, lɛ wɔʋíkɔ banima begyodi ʋa kɔwa lixwɛxwɛ ɛ. Woʋidi ɔnɔ aŋu mɛ ɛ, lɛ woʋigyo ba izekɔ odi xe wuzɛɛpani i. Pɔ̀ wuzɛɛbasɛ banima anukwarɛ liɛ gi onu Aya yɛ kupɛpɛɔ ɛ. Lɛ loso e, kwipɛ si kúte xe liyɔ kedu ní blɔ Ɔsã nɔ su si, kutsá kagyɔ ɔki Kaisaro o? Ligyeno si kutsa kagyɔa loo kukítsa na a?”

¹⁵ Pɔ̀ Yesu amɔ ba ɔdaye lo, lɛ ebu le onu si, “Ege lɛ loso mleekeni idi si mlɛpunu mɛ ɛ? Mlamani mɛ kibɔ kitɔ tɔ midi.”

¹⁶ Agi bɛkɔ kibɔɛ ɛki yɛ ɛ, eʋi ba si, “Nyaŋwɛ litukpo ni linyi bitini ní kibɔɛ aʋa a?” Bebu le onu si, “Kaisaro.”

¹⁷ Lɛ Yesu asi ba si, “Kɔlɔ mlakɔ kidiliɛ gi kinu Kaisaro kiniɛ mlakɔ kɛ aki Kaisaro, tɔ kidiliɛ gi kinu Aya kiniɛ ɛ, mlakɔ kɛ aki Aya.” Niteme si litu ba kugyɔ.

Yesu abasɛ bidɔ ní Kuyɔyɔ dɔni Bekpo ʋa mɛ su

¹⁸ Lɛ Zadukianɛ ma gi bázɛ kuyɔyɔ dɔni bekpo ʋa mɛ aʋa aŋa ɛ, bɛba Yesu klɔ, lɛ bɛsi yɛ si,

¹⁹ “Ɔdɔbasɛ yɛ, Mose aŋwlimi ɔsã nɔ ya aki blɔ si, xegi onyime etse ní yedze su u pɔ̀ bápɔ gi obi ɔtɔtɔ ɛ, onyime liɛ klɔ yɛ oneminyime ɔgbani ɔtrɛtrɛɛ yedze tɔ bapɔ bebi ba ní okpo ye yɛ linyi ne me.

²⁰ Liba lɛ mɛ si, beneminyime tiegloele beze; otsitsi ye agbani ɔdzɛ, pɔ̀ ɔ́pɔ obi xe etse e.

²¹ Lɛ ɔʋlaɛ agbani ɔdzɛɛ pɔ̀ yɛ fɛ ɔ́pɔ obi ɔtɔtɔ, xe yɛ fɛ etse e. Nite ke liba lɛ mɛ ɛki onemi tanɛɛ fɛ,

²² ni bagɔgɔ ba pɔ́: niteme si ba beneminyime tiegloele ba pɔ́ bɛgbani ɔdzɛ liɛ klɔ xe betse e, pɔ̀ bamɛ ɔtɔtɔ ɔ́pɔ obi i. Gɔgɔ ɛ, ɔdzɛɛ fɛ aba etse e.

²³ Lɛ xegi bekpo ʋa bɛyɔ ɛdɔni bekpo ʋa mɛ ní liyɔwe le aʋa ɛ, nyaŋwɛ yedze ɔdzɛɛ aaze e? Gi ba banɔ tiegloele ba pɔ́ bɛgbani ɔdzɛɛ edi.”

²⁴ Yesu ebu le onu aki ba si, “Mlɛta kese kura! Mlete kidiliɛ loso o? Lɛ ese linu si, mlénu Aya yɛ Liboe le ni Aya yɛ kigaglaɛ ese e.

²⁵ Xegi bekpo ʋa bɛyɔ ɛ, biaze ŋwisi Aya yɛ baxwɛdzɛ ba ní lifunu ne kinɛ ɛ. Lɛ niklɔ ɛ, kudzɛgbanɔ kúma a.

²⁶ Abla ní bekpo ʋa kuyɔyɔɔ su i, kɔ mlákla liboeboe ní Mose keplekpaa mɛ ní ose lo gi ɛɛsɔ lɔ su iʋidi na a? Niklɔ Mose aŋwlimi aplɛ si, Aya asi yɛ si, ‘Mɛ menu Abraham yɛ Aya, Isak yɛ Aya ni Yakob yɛ Aya.’

²⁷ Yɛ onu Aya ki banama gi balɛ ligbã nɛ ɛ, lɛ aní ki bekpo ʋa a. Mlɛta kese koŋ!”

Yesu abasɛ bidɔ ní ɔsã ʋidi no su u

²⁸ Ɔsã nɔ ɔdɔbasɛ ɔtɔ eze ní niklɔ lɛ enu eboa la gi bezevu edi i. Gi amɔ si Yesu ebu eboe la onu mɔmɔmɔ aki Zadukianɛ ma ɛ, eti apɔni yɛ lɛ eʋi ye si, “Ɔsã woli ɛsaɛ veve ní isã nɛ kusi na a?”

²⁹ Lɛ Yesu ebu le onu si, “Ɔsãa nɔ gi ɛsaɛ veve petee, lɔ onu si, ‘Israel, ta kutu! Ɔkaɛ gi onu blɔ Aya ɛ, Ɔka tole ko onu.

³⁰ Lɛ loso e, lɔ Ɔkaɛ Aya nì wɔ ɔna nɔ petee, ni wɔ esobo la petee, ni wɔ kugyodi yo petee ni wɔ isu ya mɛ kigaglaɛ petee.’

³¹ Ɔsã ʋla lɔ gi ɛgbani lɔ ɛkpɛ ɛ, lɔ onu si: ‘Lɔ wɔ ɔhanuglɔɛ ŋwisi wɔ tutɔ wɔ isu ya kinɛ ɛ.’ Ɔsã ɔtɔtɔ ɔma kunyipu isani isã tiʋa ɛlɛ ya a.”

³² Lɛ Ɔsã nɔ Ɔdabasɛ yɛ asi Yesu si, “Wɔpani mumɔ, Ɔdɔbasɛ yɛ! Nite ɖii lilɛ si Ɔkaɛ ko onu Aya, lɛ ɔtɔtɔ ɔ́ma sani yɛ ɛ.

³³ Lɛ tɔ lɔ Aya nì wɔ ɔna nɔ petee e, ni wɔ kugyodi yo petee, ni wɔ isu ya mɛ kigaglaɛ petee, ani tɔ lɔ wɔ ɔhanuglɔɛ ŋwisi wɔ tutɔ wɔ isu ya kinɛ ɛ, bilɛ veve sanɔ si tɔ kɔ baga, bidɔkɔkɔ ni bidɔpɔʋipɔʋi ʋɛ kí Aya.”

³⁴ Agi Yesu amɔ kuboeteo uliɔ gi kulɛ ní yɛ liboe le onu kubúbú yo me e, asi yɛ si, “Woti ɔpɔni Aya yɛ Kaʋaŋaa.” Lɛ ya kede e, ɔnɔnɔ ɔ́tani Yesu liboeboe kuʋi tɔ ɔ.

Nyaŋwɛ onu Mesiya yɛ

³⁵ Agi Yesu azɛɛbasɛ bidɔ ní Lisɔligba lɛ mɛ ɛ, eʋi si, “Kitɛ mɛ Ɔsã nɔ badɔbasɛ ba biapani si, Kristo ye onu Dawid Yebi i?

³⁶ Gi Ɔfuɛfuɛ Dradra lɔ́ ɛhwani Dawid xe apani si, “ ‘Aya asi mɛ Ɔkaɛ si: Ze ní mɛ kaŋaa mɛ ní ya kɔna ni lipoe lɛ gi maakɔ wɔ ahwafianɛ ma kpɛ ni wɔ kuklise o.’ ”

³⁷ “Agi Dawid ɔtutɔ lɔ axwa yɛ si ‘Ɔka’ ɛ, lɛ kitɛ Kristo ye aaze Dawid yɛ obi i?” Linɔkpi ʋidi itɔ lizɛta Yesu kutu ni isami.

Ɔsã nɔ badɔbasɛ ba ba kusufekeo ni kɔ su kutuheheo

³⁸ Agi azɛɛbasɛ ba bidɔ mɛ ɛ, apani si, “Mlevu aŋu ní Ɔsã nɔ badɔbasɛ ba su. Bizɛɛga ɛklanɔ ni ba ewu gblamadzaa na mɛ lɛ bizɛpɛ si banima bapani ba nì kubùbù ní enè na mɛ ɛ.

³⁹ Bizɛpɛ izekɔ gyɔgyɔ lɛ ní Yudanɛ ma ba itsaklɔ ni izekɔ ʋidi ne ní idɔŋakplɔ̃ nɛ su u.

⁴⁰ Bízɛŋa kamla ní badzɛ aba gi ba benye ba betse e aʋa kɔ bɛzi ba bidɔ mɛ petee ní ba awla ɛ. Lɛ bizɛbasɛ isu ya nì Aya kuxwaxwa gblamadza mɛ ɛ. Ba kutuheheo kwianyani usanɔ!”

Ɔdzɛɛ gi yenye etse e yɛ kagyɔa

⁴¹ Agi Yesu eze ní niklɔ gi bizɛɛgyɔ kibɔɛ ní Lisɔligba lɛ mɛ ɛ, evu aŋu ní ba bibɔgyɔgyɔ ʋɛ su. Amɔ si bexonete gegle bɛzɛgyɔ kibɔɛ ní ba exomɔmɔ la onu.

⁴² Ɔdzɛ opiplinete ɔtɔ gi yenye etse e, aba lɛ agyɔ kɔba tiaʋa ɛ.

⁴³ Lɛ Yesu axwa yɛ badɔkpasi ba akpɛ likpɔ lɛ asi ba si, “Mɛɛsi mlɔ ní anukwarɛ mɛ ɛ, si ɔdzɛ opiplinete liɛ ya yɛ kagyɔa kɛsrɛ sani banɔ gɔgɔ ba petee ba kanìa.

⁴⁴ Apani si, banɔ gɔgɔ ba kɔ ɛ, bɛgyɔ kibɔɛ ní ba exomɔmɔ la onu. Pɔ opiplinetee kɔ ɛ, akɔ yɛ ligbã nɛ mɛ exo la petee akɔ.”