Marko 10 - KUNYANYA VUVU YƆ

Yesu abasɛ bidɔ ní onyime ni yedze ba ahanuglɔ ba kugbegbe su

¹ Agi Yesu asɛ ní klɔ ɛ, atrɛ ní Yudea kesea mɛ, lɛ atsa Yordan onipe lo e. Anɔkpi la ɛkpɛ likpɔ ní yɛ su dzɛ, lɛ abasi ba bidɔ mɛ ŋwisi kiliɛ gi azɛɛbitɛ lipoe kakaa kinɛ ɛ.

² Farisianɛ batɔ bɛba yɛ klɔ gi bɛzɛpɛ si bɛ́punu yɛ ɛ. Beʋi Yesu si, “Si blɔ, dani ɔsã nɔ ɛki kude si wɔatani wodze kugbe na a?”

³ Yesu ebu le onu ni kuʋíʋi si, “Ɔsã woli Mose aki mlɔ ɔ?”

⁴ Lɛ ba fɛ bebu le onu si, “Mose aki kude si onyime ɔŋwlimi kegbegbeplekpa tɔ ɔkikɔ kutete si yɛyurɔ ye dze, tɔ ɔyurɔ yɛ.”

⁵ Lɛ Yesu asi ba si, “Mose aki mlɔ ɔsãa nɔ ya lɛ ese linu si mlɔ ina nɛ mɛ ilɛ gagla.

⁶ Pɔ̀ ní okpese klɔ ní kelea ɔbitɛ klɔ ɛ, ‘Aya abitɛ ba onyime ni ɔdzɛ.’

⁷ ‘Lɛ klɔ ʋa loso e, onyime aasɛ ní yɛka ni yene su lɛ aakpɛ likpɔ ni ye dze e,

⁸ kɔ ba tiaʋa bedzi kidɔ tile!’ Lɛ loso e, bénu banɔ tiaʋa tɔɔ ɔ, bedzi kisugya tile.

⁹ Niteme si kidiliɛ gi Aya akpɛ likpɔ ɛ, ɔnɔnɔ ɔkilɛ kɛ mɛ ɛ.”

¹⁰ Agi bedzitrɛ ní kepea mɛ ɛ, Yesu yɛ badɔkpasi ba beʋi ye liboe le ese.

¹¹ Ebu le onu akí ba si, “Onyime liɛ klɔ gi aagbe yedze e, xe aagbani ɔdzɛ dzedze e, awa kihasi ayurɔ yedze.

¹² Lɛ niteme ke ɔdzɛ liɛ klɔ gi aagbe yenye e xe aazeni onyime dzedze e, awa kihasi ayurɔ yenye.”

Yesu akrira banuvɔ ba

¹³ Lipoe lɛ klɔ mɛ ɛ, banɔ batɔ bɛmani banuvɔ ba ní Yesu klɔ si ɔtrɔ awla ní ba aʋa; pɔ̀ yɛ badɔkpasi ba bɛnyra ni ba.

¹⁴ Agi Yesu amɔ ba kibitɛ ɛ, amɔ kusuyeʋi ni ba, lɛ asi yɛ badɔkpasi ba si, “Mlaki tɔ banuvɔ ba baba mɔ klɔ; lɛ mlakítsi kudeo nu aki ba a. Lɛ ese linu si Aya yɛ Kaʋaŋaa ɛ, banama gi balɛ ŋwisi banuvɔ ba ya elu i, ba kanɛ kenu.

¹⁵ Mɛɛtrɔ likla lɛ aʋa ɛki mlɔ si, ɔniliɛ gi ɔ́zɛ Aya yɛ Kaʋaŋaa ŋwisi ɔnuvɔ kinɛ ɛ, ɔ́tratiku ka mɛ liwewe e.”

¹⁶ Lɛ gi efeke banuvɔ ba ɛ, atrɔ awla ní ɔkakaa aʋa lɛ akrira ba petee e.

Ɔyasɔʋi oxonetee

¹⁷ Agi Yesu eku kudeo me dzɛ ɛ, onyime ɔtɔ ese atsani yɛ lɛ edu yɛ aklamasi na kesea ní yɛ ketu ya, lɛ eʋi ye si, “Ɔdɔbasɛ gbã ɛ, ege maabitɛ xe maamɔ ligbãmoblo le na a?”

¹⁸ Yesu eʋi ye si, “Ege lɛ loso wɔɛxwa mɛ si ɔgbã a?” “Ɔnɔnɔ ónu ɔgbã asani Aya tete ko.

¹⁹ Wote Aya isã nɛ: ‘Wukíye ɔnɔ ɔ; wukíwa kihasi i; wukízuru u; wukísɛ asia ɛkpɛ ɔnɔnɔ awla a; wukími ɔnɔnɔ ɛkpɛ kese tɔ zi yɛ kidɔ ɔ; kpɛ kubùbù ní wɔka ni wone su.’ ”

²⁰ Onyimee ebu le onu dzɛ si, “Ɔdɔbasɛ yɛ, dɔni mɛ kunuvɔ mɛ ké mɛɛbitɛ ní isã nɛ pɔ́ aʋa a.”

²¹ Lɛ Yesu edu aŋu na ní yɛ aʋa ni kulɔlɔ, lɛ apani si, “Kidɔ tile ko kiziã si bitɛ ɛ. Trɛ zɛɛda kidɔ kakaa gi kilɛ ní wɔ awla tɔ kɔ kibɔɛ kí bazianete ba, tɔ wɔamɔ exo la ní lifunu ne; lɛ kede e, ba tɔ gaze ni mɛ kude.”

²² Agi onyimee enu liboe le e, ayrɔ lɛ asɛ ɛ, lɛ ese linu si oxonete ʋidi onu u.

²³ Agi Yesu edi aklanɔ ɛ, asi yɛ badɔkpasi ba si, “Liaze e gagla kí bexonete ba si biati uku ní Aya yɛ Kaʋaŋaa mɛ ɛ!”

²⁴ Liboe le litu badɔkpasi ba kugyɔ, pɔ̀ Yesu atrɛ ní liboe le aʋa si, “Mɛ bebi ba! Liaze gagla xe ɔnɔ aatani kutiku ní Aya yɛ Kaʋaŋaa mɛ ɛ!”

²⁵ Edo apɔnɔ si, “liaze gagla ki oxonete si oti oku ní Aya yɛ Kaʋaŋaa mɛ sani ki kposɔɛ si ɔga abui ye liwu le me kudo o!”

²⁶ Liboe le gi apani i, liwa axwɛ ní yɛ badɔkpasi ba aʋa, lɛ beʋi bahanuglɔ ba si, “Kɔ nyaŋwɛ koŋ aatani kubúbú kumɔ ɛ?”

²⁷ Yesu edu aŋu na ní ba aʋa lɛ ebu le onu si, “Lítratani lɛ mɛ kuba ní banima klɔ ɔ, pɔ̀ liboe kakaa lilɛ plɔplɔ ɛki Aya xunyɔ ɔ.”

²⁸ Lɛ Petro asi yɛ si “Di kwiyurɔ kidɔ kakaa, lɛ kwikuni wɔ kude e!”

²⁹ Lɛ Yesu asi ba si, “Nite lilɛ, lɛ ní anukwarɛ mɛ ɛ, mɛɛsi mlɔ si ɔnɔ kakaa gi asɛ yɛ kepea, xe ayurɔ yeneminyime, loo yenemidzɛ, loo yene, loo yɛka, loo yɛ bebi ba, aloo yɛ inyrɔ nɛ, kɔkpɛ mɛ ni liboe gbã nɛ loso e,

³⁰ ɔniliɛ klɔ aazi bidɔ glegle sanɔ ní abla kelea mɛ ɛ. Ɔniliɛ klɔ aazi beneminyime, benemidzɛ, bene, bebi ni inyrɔ ede alafa kɔpɔni keduyɔyɔ ɔ. Lɛ ní kele vuvu kaklɔ gi kɛtraba mɛ ɛ, aazi ligbãmoblo le.

³¹ Pɔ̀ banɔ glegle gi benu batɔpu abla ɛ, biadzi banɔ gɔgɔ ɔ; lɛ banɔ glegle gi benu banɔ gɔgɔ ba abla ɛ, biadzi banɔ tɔpu u.”

Yesu Apani ní yɛ Kutseo su Kutanɛ

³² Agi Yesu ni yɛ badɔkpasi ba beze ní kudeo aʋa a, xe bɛzɛtrɛ ní Yerusalem i, Yesu etu ɔtɔ aki ba. Liboe le litu yɛ badɔkpasi ba kugyɔ, lɛ banama gi beze ní ba kedea fɛ ɛ, lifu ne lizeku ba. Yesu ebu yɛ badɔkpasi liɔfɔ ni tiaʋa ba kuka dzɛ ní kudeo aʋa. Lɛ asi ba eboa la gi ɛtraba yɛ aʋa ɛ.

³³ Asi ba si, “Mlata kutu! Kwitrɛ ní Yerusalem. Niklɔ biabu Ɔnɔɛ Yebi ye kukɔ kí kusɔliɔ baka ba ni Ɔsã nɔ badɔbasɛ ba. Biatsa kutse pia ɔki yɛ; kɔ bɛkɔ yɛ kpɛ awla ɛki banama gi bénu Yudanɛ ma ɛ.

³⁴ Biakpɛ yɛ kakpaa; biabu sita bali yɛ aʋa; biakusi ye gɔgɔ ɛ, kɔ beye ye. Pɔ̀ ewe tata kede e, aayɔ gi aadzi ligbã a.”

Yakobo ni Yohanes beʋi izekɔ ʋidi iki isu

³⁵ Yakobo ni Yohanes, gi benu Zebedeo yɛ bebi ba ɛ, bɛba Yesu klɔ ɔ. Lɛ bɛpani si, “Ɔdɔbasɛ yɛ, kidiitɔ kilɛ gi kwipɛ si bitɛ ki blɔ ɛ.”

³⁶ Lɛ Yesu eʋi ba si, “Ege mlɛpɛ si mibitɛ ki mlɔ ɛ?”

³⁷ Bebú le onu si, “Xegi wodi ní wɔ likusigbo le aʋa ní wɔ kukusi dradra mɛ ɛ, kwipɛ si ki kuze ní wɔ su: blɔ mɛ tole oze ní wɔ kaŋaa mɛ, tɔ ɔnɔ ʋlaɛ oze ní wɔ kabaa mɛ.”

³⁸ Lɛ Yesu asi ba si, “Mléte kidi liɛ gi kɛ mleeʋi i. Kuyeʋiyeʋi yo kepliʋia lia gi matraŋwɛ ɛ, mlaatani ka kuŋwɛ na a? Lɛ kuni yo gi lilɛ si bakpɛ aki mɛ ɛ, mlaatani kɔ kukpɛ na a?”

³⁹ Lɛ bebu le onu si, “Kwiatanɔ.” Yesu asi ba si, “Kepliʋia lia gi matraŋwɛ ɛ, mlaaŋwɛ ka baa, lɛ kiliɛ gi biakpɛ kuni yo ki mɛ fɛ ɛ, mlaakpɛ kɔ.

⁴⁰ Pɔ̀ kudeo onu kúma si mɛ mibu ɔniliɛ klɔ gi aaze ní mɛ kaŋaa mɛ loo ní mɛ kabaa mɛ ɛ. Aya abla izekɔɛ lɛ klɔ aki banɔ baklɔ gi akya ɛ.”

⁴¹ Agi yɛ badɔkpasi ba mɛ liɔfɔ gɔgɔ ba benu liboe le e, bɛmɔ kusuyeʋio ní Yakobo ni Yohanes su u.

⁴² Lɛ Yesu axwa ba pɔ́ akpɛ likpɔ ní isu ya a, lɛ asi ba si, “Mlete si banɔ baklɔ gi bizeebù si ba benu baʋaŋa ba akí babubitɛ ba ɛ, kigagla kilɛ ba awla ní ba aʋa, nite si baʋaŋa ba bizemi babubitɛ ba ɛkpɛ kesea ni kusufeke e.

⁴³ Pɔ̀ lima si lize nite ní mlɔ kusi i. Xegi mlɔ mɛ ɔtɔ apɛ si yize ɔnɔ ʋidi i, oze ɔxwɛdzɛ ɔki banɔ gɔgɔ ba.

⁴⁴ Lɛ xegi mlɔ mɛ ɔtɔ apɛ si yize ɔtɔpu yɛ ɛ, lilɛ si oze mlɔ petee mlɔ ɔnɔ sumu ye.

⁴⁵ Lɛ ese linu si Ɔnɔɛ Yebi ye ɔ́ba si tɔ besumu ye e. Boŋu i, kiba aba si yisumu tɔ yikɔ yɛ ligbã nɛ ɛkɔ tɔ yibu banɔ glegle.”

Yesu ayɔ ni Bartimeo Kaŋupoa

⁴⁶ Yesu ni yɛ badɔkpasi ba bɛba Yerixo. Agi Yesu ni yɛ badɔkpasi ba ni linɔkpi ʋidi itɔ beze do ni ɔma nɔ mɛ ɛ, kaŋupo ɔdɔʋi Timeo Yebi ye Batimeo azeeʋi bidɔ ní kudeo su u.

⁴⁷ Agi enu si Yesu Nazaret ɔnɛɛ azɛɛza ɛ, ekpese ozi kukpɛ si, “Yesu! Dawid lipo me obi ye, di mɛ asigaga!”

⁴⁸ Banɔ glegle bɛka yɛ aŋu mɛ si ɔgɔ tsriɖi. Pɔ̀ akpɛ ozi lo gaglaa sani kutɔpu yɔ si, “Dawid lipo me obi ye, di mɛ asigaga!”

⁴⁹ Lɛ Yesu atɔ, lɛ asi ba si, “Mlaxwa yɛ aki mɛ!” Lɛ loso bɛxwa kaŋupoa, lɛ bɛsi yɛ si, “Mɔ ɔna! Yɔ lɛ ɛ! Yesu yɛ ɛɛxwa wɔ ɔ!”

⁵⁰ Nite si Batimeo ebu yɛ liwu le etu eʋe, ayɔ lixu le, lɛ aba Yesu klɔ ɛ.

⁵¹ Lɛ Yesu eʋi ye si, “Ege wɔɛpɛ si mibitɛ ki wɔ ɛ?” Kaŋupoa kebu le onu si, “Ɔdɔbasɛ yɛ, mapɛ si mimɔ dzɛ.”

⁵² Lɛ Yesu asi yɛ si, “Ga trɛ, wɔ kuziŋaa kwiyɔ nì wɔ ɔ!” Lɛ onu klɔ koe ekpese bidɔ kumɔ. Nite si ekuni Yesu kude ní kudeo aʋa.