Luka 22 - KUNYANYA VUVU YƆ

Kusumu yo baka ba bɛtrɔ si Biaye Yesu

¹ Aklamɔnyasi na liwe ŋaŋa nɛ gi lɛ bizɛxwa si Kutseolidɔzawe le litipɔnɔ ɔ.

² Kusumu yo baka ba ni Ɔsã nɔ badɔbasɛ ba, bezese banima lɛ loso e, bɛzɛ pɛ́ kudeonu gi biaye Yesu ní kikpokpo me e.

Yuda Adimɛ Si Yɛ aabu Yesu Kukɔ

³ Lɛ Satana eti eku u ní Yuda gi bizɛxwa si Iskariot i, gi onu badɔkpasi liɔfɔ ni tiaʋa ba mɛ tole me e.

⁴ Lɛ loso Yuda edo atrɛ lɛ ezeegu kunugu yo ni kusumu yo baka ba ni lisumugba lɛ bepepe ba ba baka ba kiliɛ gi aabu Yesu kukɔ ɔki ba ɛ.

⁵ Isami iku ba, lɛ bɛdimɛ si biatsa kibɔ ɔki yɛ ɛ.

⁶ Yuda adimɛ ní lɛ aʋa lɛ ekpese kude gbã kutɔ onu kupɛ gi kɔ aʋa aaga xe aabu Yesu kukɔ ɔki ba xegi banima báma ní yɛ su i.

Kublabla kí Kutse Lidɔzawe le Kuŋaŋaa

⁷ Aklamɔnyasi na Liwe le lina gi lilɛ si beye kutse lidɔzawe le keʋesibi ya ɛ.

⁸ Lɛ loso Yesu akpɛ Petro ni Yohanes ni eboa la si, “Mlazɛbla ní Kutselidɔzawe le kiŋaŋa ɛ su aki blɔ.”

⁹ Beʋi ye si, “Nifɔ wɔpɛ si kubla bɛ aplɛ ɛ?”

¹⁰ Ebu le onu si, “Xe mleti iku ní ɔma ʋidi no me e, onyime ɔtɔ gi etu kenifukpo ɛ, aatsani mlɔ. Mlekuni yɛ kude atrɛ ní kepea lia klɔ mɛ gi aatiku i,

¹¹ tɔ mlasi kepea ɔkaɛ si, ‘Ɔdɔbasɛ yɛ si, Nífɔ bababa ba kugbakeo liɔ mɛ gi mɛ ni mɛ badɔkpasi ba kwiaze xe kwiaŋa Kutselidɔzawe le bidɔ mɛ ɛ?’

¹² Aabasɛ mlɔ lifunu kugbake ʋidi utɔ mɛ gi bɛlulɔ ɛ. Mlabla kidɔ kakaa aplɛ ní niklɔ.”

¹³ Agi bɛsɛ ɛ, bɛzɛmɔ kidɔ kakaa ŋwisi kiliɛ ɖii gi Yesu asi ba kinɛ ɛ, lɛ bɛbla ɛki kutseolidɔzawe le kiŋaŋaɛ ɛ.

Ɔkaɛ yɛ Bilagɔdɔ ŋaŋa ʋɛ

¹⁴ Agi lipoe le lina ɛ, Yesu eze ní ɔkplɔ nɔ su ni yɛ banɔkpɛkpɛ ba.

¹⁵ Asi ba si, “Linu mɛ kupɛ́pɛ si miŋa Kutselidɔzawe le kiŋaŋaɛ liɛ ni mlɔ xe ableke maamɔ kini ye e!

¹⁶ Lɛ mɛɛsi mlɔ si, Mátraŋa ʋɛ elu tɔɔ kɔzɛna ni lipoe lɛ gi lɛ ese kununu yo kwiaba ní Aya yɛ Kaʋaŋaa mɛ ɛ.”

¹⁷ Gi Yesu akɔ kaŋwɛpliʋia ɛ, edo Aya ɖase, lɛ apani si i, “Mlazɛ tɔ mlɔmɛ ɔkakaa ɔkpɛ onu.

¹⁸ Mɛɛsi mlɔ si dɔni abla kɔtsinɔ ɛ, mátraŋwɛ wain liɛ ya tɔɔ kɔzɛna ni lipoe lɛ gi Aya yɛ Kaʋaŋaa kɛba a.”

¹⁹ Lɛ akɔ lìklã nɛ, xe edo Aya ɖase e, lɛ ayaʋi lɛ mɛ ɛ, xe akɔ aki ba ɛ, lɛ apani si i, “Lɛ ya linu mɛ kisugyaɛ gi bɛki ní mlɔ litukpo o. Mlabitɛ nite tɔ mlazakɔ aplɛ aŋu ní mɛ aʋa.”

²⁰ Niteme ke akɔ kaŋwɛpliʋia kí ba ni kiŋaŋaɛ kede, lɛ apani si, “Kaŋwɛpliʋia lia ya kenu Aya yɛ kunyánya vuvu yɔ gi anya nì mɛ ìka lɛ ɛ, gi bɛbali ní mlɔ litukpo o.

²¹ Pɔ̀ mledi i, ɔniliɛ gi aakpɛ mɛ awla ɛ, odi ní ɔkplɔ nɔ su nì mɛ ɛ.

²² Ɔnɔɛ Yebi ye atrátse ŋwisi kiliɛ gi Aya atrɔ lɛ ɛ, pɔ̀ babaa ki ɔniliɛ gi aabu ye kukɔ ɛ.”

²³ Lɛ bekpese ba ahanuglɔ ba kuʋi si ba mɛ owoli atrábitɛ liboe lɛ klɔ na a.

Kuŋwlɛŋwlɛ ní ba mɛ iliɛ gi onu Oʋidi ye su u

²⁴ Kuŋwlɛŋwlɛ kwiku ní ba kusi dzɛ ní ba mɛ iliɛ gi biamɔ si yɛ onu oʋidi ye su u.

²⁵ Yesu asi ba si, “babubitɛ ba ba bekusi ba ɛ, bɛmɔ kigagla ní ba akɔanɛ ma aʋa, lɛ banama gi bɛmɔ kigaglaɛ ní ba aʋa ɛ, bizɛpɛ si bɛbasɛ si ba bizedi ba aʋa.

²⁶ Pɔ̀ mlɔ kɔ ɛ, líma si lize nite ní mlɔ kusi i. Boŋu i, ɔnɔ ʋidi ye ní mlɔ kusi i, oze ŋwisi ɔsisami yɛ kinɛ ɛ, lɛ ɔniliɛ gi ɔlɛ ní mlɔ onu i, oze ŋwisi ɔnɔsumu ye kinɛ ɛ.

²⁷ Lɛ nyaŋwɛ asa keme e,? Ɔniliɛ klɔ gi odi ní ɔdɔŋakplɔ nɔ su lo o, ɔniliɛ klɔ gi eesumu na a? Aní yɛ onu ɔniliɛ klɔ gi odi ní ɔdɔŋakplɔ nɔ su i? Pɔ̀ malɛ ní mlɔ kusi ŋwisi ɔnɔsumu kinɛ ɛ.

²⁸ Mlɔ mlenu banama gi mlɛlɛɛ ní mɛ su u, ní mɛ kupepeo me e.

²⁹ Lɛ makɔ kukusi ŋaŋa aki mlɔ ɔ, ŋwisi kiliɛ gi Mɔka akɔ akí mɛ kinɛ ɛ.

³⁰ Mlaaŋa tɔ mlaŋwɛ bidɔ ní mɛ ɔkplɔ nɔ su ní mɛ kaʋaŋaa mɛ ni tɔ mlaaze ní ekusigbo aʋa, tɔ mlaaŋa Israel akpɔ liɔfɔ ni tiʋa la aʋa.

Yesu asi Petro si Aanada si Yete Ye

³¹ “Lɛ Yesu apani si, Simon, Simon, ta kutu! Satana eʋi kude si yipí mlɔ ŋwisi amu kinɛ ɛ.

³² Pɔ̀ maxwa Aya ní wɔ litukpo Simon, tɔ wukíwɔli ní wɔ kuziŋa mɛ ɛ. Lɛ xe wodzi ba mɔklɔ ɛ, tɔ kpɛ wɔ benemi ba kigagla.”

³³ Pɔ̀ Petro ebu le onu si, “Ɔkaɛ, mabla si mitrɛ ligba ni wɔ tɔ mitse ni wɔ fɛ.”

³⁴ Yesu apani si, “Mɛɛsi wɔ, Petro si, xe able ɔkukɔ loglo lo aamè omono e, wɔanada tatá si wote me e.”

Kibɔ Okotoku Ogudo ni Ihɛ Piɔpiɔ

³⁵ Lɛ Yesu eʋi ba si, “Lipoe lɛ gi makpɛ mlɔ xe mlévu kibɔ okotoku, ogudo, loo afɔkpa ɛ, kiditɔ kiziã mlɔ na a?” bebu le onu si “Kididɔ kíziã blɔ.”

³⁶ Asi ba si, “Pɔ̀ abla ɛ, xe kibɔ kotoku ɔlɛ ní wɔ awla ɛ, kɔ yɛ ni ogudo lo; lɛ xe ihɛ gblamadza ɔ́ma ni wɔ awla ɛ, da wɔ liwu le aʋa lini nɛ tɔ zekɔ dzi ɔtɔ.

³⁷ Lɛ ese linu si bɛŋwlimi plɛ ní kuŋwlimi dradra mɛ si, ‘Lɛ bebù ye kpɛ ní banɔ zimizi ba kusi i’, lɛ mɛɛsi mlɔ si, lilɛ si liba lɛ mɛ kí mɛ ɛ. Ee, kidiliɛ gi bɛŋwlimi ní mɛ su i, kihà kɛ mɛ kuba.”

³⁸ Badɔkpasi ba bɛpani si, “Ɔkaɛ Di, imɔ ihɛ gblamadza tiaʋa ni niya.” Ebu le onu si “bɛsrɛ,”

Yesu Axwa Aya ní Kumu yɔ Ise le Ketokpaa aʋa

³⁹ Yesu edo atrɛ ní Kumu yɔ ise le ketokpaa aʋa ŋwisi kiliɛ gi izɛbitɛ ɛ, lɛ yɛ badɔkpasi ba beze ni yɛ kude e.

⁴⁰ Agi beku niklɔ ɛ, asi ba si, “Mlaxwa Aya tɔ mlakíwɔli iku ní kufekedi me e.”

⁴¹ Lɛ ebu lidze ní basu taʋɛ ɛ, lɛ adɔ yɛ aklámasi na aʋa a, xe axwa Aya si i:

⁴² “Ɔka, xe linu wɔ kupɛpɛ ɛ, tɔ ti kaŋwɛpliʋia lia ní mɛ aʋa, aní mɛ kupɛpɛ onu xunyɔ, pɔ̀ wɔ kupɛpɛɔ aʋa biabitɛ ɛ.”

⁴³ Aya yɛ ɔxwɛdzɛ dɔni lifunu ne ebu isu ya abasɛ yɛ lɛ akpɛ yɛ kigagla ɛ.

⁴⁴ Lɛ ní kuyeʋiyeʋi me e, axwa Aya ni kimbi kyíkyĩ sanɔ, lɛ yɛ ohihe lo ɛzɛwɔli ní yɛ su ɛdɔ kesea ŋwisi ìka akpɔ kinɛ ɛ.

⁴⁵ Agi ayɔ adɔ ní Aya ɔxwaklɔ aba yɛ badɔkpasi ba klɔ ɛ, amɔ si beku sra mɛ, kɔkpɛ kupepe ni ɔna nyipu loso.

⁴⁶ Lɛ eʋi ba si, “Ege lɛ loso mlɛɛdɔ sra sɛ ɛ? Mlayɔ tɔ mlaxwa Aya atɔ mlakíwɔli iku ní kufekedi me e.”

Bevu Yesu

⁴⁷ Agi azeegu kunugu yo e, linɔkpi itɔ gi Yuda badɔkpasi liɔfɔ ni tiaʋa ba mɛ tole eze ɔtɔ akɔ ɛ, lìba. Eti apɔni Yesu tɔ yimu yɛ lidzɔ lɛ,

⁴⁸ pɔ̀ Yesu eʋi ye si, “Yuda, kibú woebú Ɔnɔɛ Yebi ye ekɔ ni adzɔ kumumu na a?”

⁴⁹ Agi banama gi beze ní Yesu su bɛmɔ liboe lɛ gi litraba ɛ, beʋi ye si, “Ɔkaɛ kuwa blɔ ihɛ gblamadza ʋa su axwɛ na a?”

⁵⁰ Lɛ ba mɛ tole aŋwia yɛ ihɛɛ, lɛ atí kusumu yo ɔka ʋidi ye yɛ ɔnɔdzidzi ye yɛ kaŋaa mɛ kutukpaa zanɔ ɛ.

⁵¹ Pɔ̀ Yesu apani si, “Lisrɛ!” lɛ agbɔni onyimee yɛ kutu yɔ xe ayɔni yɛ ɛ.

⁵² Lɛ Yesu asi kusumu yo baka ba, lisɔligba lɛ bepepe ba ni bakatsi ba, gi bɛba yɛ ovu klɔ si, “Kiba mleba ni Ihɛ gblamadza ba ni kusekpeo si mlevu me ŋwisi oboebitɛ kinɛ na a?

⁵³ Meze ní mlɔ kusi liwe kakaa ní Yerusalem Lisɔligba lɛ mɛ pɔ̀ mlévu me e. Pɔ̀ mlɔ lipoe le lina a, gi litumu ne me ɔʋaŋaɛ ɛɛŋa aʋa a.”

Petro Anada si yete Yesu

⁵⁴ Agi bevu ye e, bɛgbani yɛ sɛnɔ ɛtsinɔ ní kusumu yo ɔka ʋidi ye yɛ kepea mɛ. Petro ezenì ba kude ní ɔdzage no.

⁵⁵ Bɛkpɛ kifu ní kusumu yo ɔka ʋidi ye yɛ kepea kusi yo gi bɛzɛŋani i, lɛ Petro kyɛ eze ní ba kusi i.

⁵⁶ Ɔnɔsumu ɔdisami ɔtɔ ɛmɔ yɛ gi odi i. Eti apɔnɔ lɛ edi ye mɔmɔmɔ lɛ apani si i, “Onyime liɛ ya fɛ eze ni Yesu kude.”

⁵⁷ Pɔ̀ anada lɛ si i, “Ɔdzɛ, Méte ye kura a.”

⁵⁸ Lídze xe ɔnɔ dzedze fɛ amɔ yɛ ɛ, lɛ apani si i, “Wɔ fɛ wonu ba mɛ tole.” Petro ebú le onu si, “Onyime, Ani mɛ!”

⁵⁹ Ŋwisi ɔnyɔsasa tole kede e, ɔnɔ dzedze fɛ edu ɔkli kese si, “Lilɛ lɛ mɛ si ɔniliɛ ya fɛ eze ní yɛ su, lɛ ese linu si Galilea ɔnɛ onu u.”

⁶⁰ Petro ebu le onu si, “Onyime, Méte liboe lɛ klɔ su gi wɔɛpani i!” Kiliɛ gi eegu kunugu yo ko e, lɛ ɔkukɔ loglo lo eme e.

⁶¹ Lɛ Yesu ekyi xe edi Petro e. Lɛ Petro aplɛ aŋu ní liboe lɛ gi Ɔkaɛ apani asi yɛ si, “Xe ableke ɔkukɔ loglo lo aamè omono e, wɔanada mɛ tatá.”

⁶² Lɛ edo atrɛ oŋwe no o, xe azeebemi tiitiitii i.

Bɛkpɛ Yesu Kakpaa

⁶³ Benyime baklɔ gi bezeepe Yesu i, bekpese yɛ kakpaa kukpɛ lɛ bekusi ye kyɛ ɛ.

⁶⁴ Bɛnya yɛ aŋu na mɛ lɛ beʋi ye si, “Si blɔ! Nyaŋwɛ asa wɔ bidɔ mɛ ɛ?”

⁶⁵ Lɛ bɛtrɛ ní aʋa ekpini Yesu isanɔ ɔ.

Bɛ Tsini Yesu ní Otsixwakɔ Ʋidi lo

⁶⁶ Agi kelea kɛti i, kusumu yo baka ba ni banɔtsitsi ba ani Ɔsã nɔ badɔbasɛ ba bɛtsa, lɛ bɛgbani Yesu i manɔ ní ba aŋu mɛ ɛ.

⁶⁷ Bɛpani si, “Xe wɔ wonu Kristo ye e, tɔ si blɔ.” Yesu ebu le onu si, “Xe masi mlɔ ɛ, mlatrázi mɛ aʋa ɛɛŋa a,

⁶⁸ lɛ xe meʋi mlo liboetɔ ɛ, mlatrábu le onu u.

⁶⁹ Pɔ̀ dɔni abla kɔ tsinɔ ɛ, Ɔnɔɛ Yebi ye atráze ní Aya kigaglaɛ petee onete yɛ kaŋaa mɛ.”

⁷⁰ Lɛ ba pɔ́ beʋi ye si, “Kɔlɔ kido woedo si Aya Yebi wonu na a?” Lɛ ebu le onu aki ba si, mlɔ mlɛpani si, “yɛ menu.”

⁷¹ Lɛ bɛpani si i, “Ege lɛ loso kwipɛ banɔ gi biaŋa katsalia dzɛ ɛ? Blɔ ɔtutɔ kwinu le dɔni yɛ ɔtutɔ yɛ onugu lo me.”