Luka 2 - KUNYANYA VUVU YƆ

Maria apɔ Yesu

¹ Liba lɛ mɛ ní lipoe lɛ klɔ mɛ si Roma Ɔʋaŋaɛ Kaisaro Augusto akpɛ ɔsã si bakla banama petee gi beze ní Roma Kaʋaŋaa ese e, tɔ baŋwlimi aplɛ ɛ.

² Lɛ ya lize banɔ kuklakla tɔpu ní lipoe lɛ klɔ mɛ gi Kirenio eze Roma banɛ ma ɔʋaŋaɛ ní Siria a.

³ Lɛ loso e, ɔnɔ kakaa atrɛ ní yɛ kepea si tɔ bakla yɛ.

⁴ Liki si Yosef asɛ Nazaret ɔma nɔ mɛ ní Galilea kesea mɛ atrɛ ní Betlehem ɔma nɔ mɛ gi ɔlɛ Yudea kesea mɛ ɛ. Niklɔ onu Okusi ye Dawid yɛ ɔpɔklɔ. Lɛ ese linu si Yosef ádɔ Okusi ye Dawid yɛ okú no me.

⁵ Yɛ ni Maria gi onu ɔdzɛɛ ɛ gi bɛkpɛ kuwlawla ɛki yɛ ɛ, ba bɛtrɛ ní enyi na ɔŋwlimi klɔ. Pɔ̀ lipoe lɛ klɔ mɛ ɖi i, lipo lize ní Maria su.

⁶ Lɛ gi beze ní Betlehem i, yɛ lipoe le lina si ople kese.

⁷ Nite si apɔ Yebi tɔpu yɛ gi eze obinyime e. Lɛ axla basa ní yɛ su, xe akɔ yɛ aplɛ ní baga ʋa kadɔŋazi ya mɛ ɛ, lɛ ese linu si bámɔ ozekɔ ní bababa ba ɔya klɔ ɔ.

Aya baxwɛdzɛ ba bedo Yesu kupɔpɔ ɛsi beʋesigbanɔ ba

⁸ Beʋesigbanɔ ba bezeepe ba iʋesi le ní ɔyayakɔ ní kusio klɔ elesi la.

⁹ Ɔkaɛ yɛ ɔxwɛdzɛ ɔtɔ ebu isu ya abasi ba, lɛ Aya yɛ kudradraa kwikle ebali ní ba aʋa a gi lifu liku ba a.

¹⁰ Pɔ̀ ɔxwɛdzɛɛ asi ba si i, “Mlekíse lifu! Mamani mlɔ liboe gbã, lɛ liboe lɛ klɔ linu lisamiboe ki banima petee e.

¹¹ Lɛ ese linu si omono liwe le e, bɛpɔ Ɔnɔbu ye ki mlɔ ní Dawid ɔma nɔ mɛ. Yɛ onu Kristo Ɔkaɛ.

¹² Nite si kidiliɛ gi mlakɔ mɔ yɛ gyesi i, kɛ kinu si, mlaamɔ obi ɔtɔ gi bɛxla basa ní yɛ su u, xe bɛkɔ yɛ ɛplɛ ní baga ʋa kadɔŋazia me e.”

¹³ Lɛ lisɛ́ɛ nɛ ɛ, lifunu ne baxwɛdzɛ ba likpiʋiidi itɔ liple eku iklani ɔxwɛdzɛ tɔpu yɛ; bɛzɛkpɛ idzi nɛ lɛ bɛzɛkpɔ̀ Aya si:

¹⁴ “Kukpɔ̀kpɔ̀ kunu Aya yɛ kunɛ ní lifunu ne hwii! tɔ kusuyɔ kuba Kesea aʋa ki banama gi beku yɛ liŋu i.”

¹⁵ Gi Aya yɛ baxwɛdzɛ ba bedziimu lifunu ne ní ba su i, beʋesigbanɔ ba bɛpani ɛsi ba ahanuglɔ ba si, “Mlaki tɔ kutrɛ ní Betlehem tɔ kuzeedi liboe lɛ gi liba lɛ mɛ ɛ, gi lɛ Ɔkaɛ ebu abasɛ blɔ ɛ.”

¹⁶ Lɛ loso bɛkɔsi itrɛ lɛ bɛzɛmɔ Maria ni Yosef ani obi ye gi ɔfini ní baga ʋa kadɔŋazia mɛ ɛ.

¹⁷ Gi beʋesigbanɔ ba bɛmɔ obi ye e, behle liboe lɛ gi Aya ɔxwɛdzɛɛ asi ba ní ɔnuvɔɛ su i.

¹⁸ Liki si banama petee gi benu liboe le e, ba inugu itse ní beʋesigbanɔ ba eboe la su.

¹⁹ Pɔ̀ Maria aplɛ aŋu ní eboe la petee aʋa, lɛ egyo la edi fɔ̃ɔ ni yɛ ɔna nɔ mɛ ɛ.

²⁰ Lɛ beʋesigbanɔ ba bɛsɛ ɛ. Bɛzɛkpɛ idzi nɛ zɛɛkpɔ Aya lɛ ese linu si eboa la gi bɛmɔ ɔ xe benu i, eze kiliɛ gi Aya yɛ ɔxwɛdzɛɛ asi ba ɛ.

Bɛki Yesu linyi

²¹ Liwe ɔgɔtɔʋa yɛ gi lipoe le lina si batsà ɔyaʋi aki obi ye e, bɛki yɛ linyi si Yesu. Linyi lɛ klɔ gi Aya yɛ ɔxwɛdzɛɛ edo aplɛ akpɛ ɔtɔ si bakɔ aki yɛ ɛ, xe ableke bɛkɔ yɛ limɛ nɛ ɛ.

Bɛtsini Yesu ní Yerusalem lisɔligba lɛ mɛ

²² Gi lipoe le lina si Yosef ni Maria bazeplo isu ya ní Mose Ɔsã nɔ onu i. Bɛtsini ɔnuvɔɛ ní Yerusalem, tɔ bɛkɔ yɛ basɛ Ɔkaɛ.

²³ Ŋwisi kiliɛ gi bɛŋwlimi kpɛ ní Ɔkaɛ Ɔsã nɔ mɛ si, “Obinyime tɔpu kakaa ɛ, biakɔ yɛ ɔki Ɔkaɛ.”

²⁴ Bɛdzɛ fɛ si tɔ biaki Aya bisumudɔ, gi binu abronuma tiaʋa loo akpakpo nuvɔ taʋa, ní Ɔkaɛ Ɔsã nɔ onu u.

²⁵ Lipoe lɛ klɔ mɛ ɛ, onyime ɔtɔ gi bizɛxwa si Simeon i, eze ní Yerusalem. Eze ɔnɔ gbã lɛ azɛɛbitɛ ní Aya yɛ isã nɛ aʋa a. Azeepe lipoe lɛ gi Aya aabu Israel i. Lɛ Ɔfuɛfuɛ Dradra lɔ eze ní yɛ aʋa a.

²⁶ Lɛ lɔ̀ ɛtrɔ likla lɛ aʋa ɛki yɛ si ɔ́tratse e, kɔkpɛni lipoe lɛ gi aamɔ Ɔkaɛ yɛ Kristo ye e, gi aka aplɛ ɛ.

²⁷ Ɔfuɛfuɛ Dradra lɔ́ ɛgbani Simeon tsini Lisɔligba lɛ mɛ, lipoe lɛ klɔ mɛ gi bapɔnɛ ba fɛ bɛkɔ obi ye Yesu i manɔ ní Lisɔligba lɛ mɛ ní ligoʋi le oxo klɔ ní Ɔsã nɔ onu.

²⁸ Simeon azɛ obi ye evu lɛ edo Aya ɖase e si:

²⁹ “Abla ɛ, Ɔkaɛ Aya, liboe lɛ gi wɔka aplɛ ɛ, wɔbitɛ ní lɛ aʋa. Lɛ loso e, ki tɔ wɔ osumubi ye, ɔsɛ ní kusuyɔ mɛ.

³⁰ Lɛ ese linu si mɛ ɔtutɔ mamɔ wɔ kubúbú yo ni mɛ bimbi ʋe.

³¹ Gi lɛ wɔbla aplɛ ní banima petee aŋu mɛ ɛ.

³² Kuklekle gi kiabu wɔ kupɛ́pɛ ɔ ɔbasɛ banama gi bénu Yudanɛ ɛ. Lɛ kwiamani kuklekleo ki wɔ banima Israel.”

³³ Obika yɛ ni obinee ba inugu itse ní eboa la gi Simeon apani ní ɔnuvɔɛ su i.

³⁴ Lɛ gi Simeon akrira ba ɛ, asi Maria, Yesu yene si, “Obi liɛ, Aya ɔtutɔ akya yɛ si gani yɛ aʋa ɛ, banɔ glegle ní Israel biagleʋe. Pɔ̀ gani yɛ ke aʋa ɛ, banɔ glegle biamɔ kubúbú ní Israel. Yɛ aaze lixaŋu kikpɛdɔ dɔni Aya klɔ, gi kɛsu banɔ glegle biayɔ kedu u.

³⁵ Lɛ banima begyodi kpòkpò ʋa biaŋwi. Pɔ̀ wɔ tutɔ ɛ, kuyeʋiyeʋi kwiaze ŋwisi ihɛ piɔpiɔ, gi aatiku wɔ ɔna nɔ mɛ kinɛ ɛ.”

³⁶ Lipoɛ lɛ klɔ mɛ ɛ, ɔdzɛ oboedoplɛ tsitsi ɔtɔ eze ní Yerusalem. Yɛ linyi si Hana eze Fanuɛl gi ádɔ ní Asa yɛ okú no me e, Yebi. Agɔ tegloele ko eze ní kenyime pe xe yenye etse e.

³⁷ Eze ahosi gi azɛ agɔ avi ɔgɔtaʋa ni tene e. Kesumupea mɛ ko azeeze lɛ eze ní onugu nyanya ni aklamasi aʋa elesi ni kemize gi azeesumu Aya ɛ.

³⁸ Yɛ fɛ eze ní kesumupea mɛ ní ɔnyɔsasa lɔ klɔ aʋa. Lɛ gi eti apɔni ba ɛ, edo Aya ɖase. Lɛ banama petee gi bɛzeepe Aya si aazi ki Yerusalem i, Hana apani liboe ní obi ye su asi ba.

Yosef ni Maria bedzitrɛ ní Nazaret

³⁹ Gi Yosef ni Maria bexo egoʋi la pɔ́ ni Ɔkaɛ Ɔsã nɔ onu i; bedzitrɛ ní Nazaret, ba kepea ní Galilea kesea mɛ.

⁴⁰ Ɔnuvɔɛ etsi gi kigagla kize ní yɛ su u. Kuboeteo fɛ kwize ní yɛ awla, lɛ Aya yɛ lipomepɛpɛ nɛ lize ní yɛ aʋa a.

Yesu ní Lisumugba lɛ mɛ

⁴¹ Ligɔ kakaa Yesu yɛ bapɔnɛ ba bɛzɛɛdzɛ Yerusalem Kutselidɔzawe le ɔŋakɔ.

⁴² Gi Yesu azɛ agɔ liɔfɔ ni taʋa ɛ, bɛtrɛ ní liwe le ɔŋakɔ dzɛ ŋwisi kiliɛ gi bɛzɛbitɛ lɛ kinɛ ɛ.

⁴³ Pɔ̀ gi bɛŋa liwe le pɔ́ ɛ, yɛ bapɔnɛ ba beku kudeo me dzitrɛ ní Kepea. Pɔ̀ obi ye Yesu xunyɔ awɔ Yerusalem ní yɛ bapɔnɛ ba kumotemote me.

⁴⁴ Begyodi si ba obi ye eze ní ɔnɔha lɔ kusi xe bɛzɛɛtrɛ ɛ. Bɛga kudeo liwe zizi, xe ableke bekpese ba obi ye kupɛ́ ní ba benete ba ni ba baʋianɛ ba kusi i.

⁴⁵ Agi bámɔ yɛ ɛ, bedzitrɛ ní Yerusalem gi bɛɛzɛpɛ yɛ ɛ.

⁴⁶ Liwe tanɛ we le e, bɛtsani yɛ ní Lisumugba lɛ mɛ. Eple eze ní Yudanɛ ma badɔbasɛ ba kusi gi azɛɛta ba kutu u, xe azeeʋi ba beʋiʋi ʋa ɛ.

⁴⁷ Ɔnɔ kakaa gi enu yɛ eboe la ɛ, yɛ onugu etse ní yɛ kuboesenu yo nì eboe la onu kubúbú mɔmɔmɔ su.

⁴⁸ Lipoe lɛ gi yɛ bapɔnɛ ba bɛmɔ yɛ ɛ, litu ba kugyɔ. Lɛ yene eʋi ye si, “Mobi ye, ege lɛ loso wɔbitɛ nite ɔmanɔ ní blɔ su u? Mɛ ni wɔka kwikyigyi gi kwipɛ wɔ ɛ.”

⁴⁹ Yesu ebu le onu si, “Ege lɛ loso mlɛpɛ́ mɛ ɛ? Kɔ kite mléte si, lilɛ si mize ní mɔka kepea mɛ na a?”

⁵⁰ Pɔ̀ bénu liboe lɛ gi apani ese e.

⁵¹ Lɛ Yesu edzi atrɛ ní Nazaret nì ba ɛ. Lɛ Yesu enu kutu aki ba a. Pɔ̀ yene evu eboa la petee akpɛ yɛ ɔna nɔ mɛ ɛ.

⁵² Lɛ Yesu, etsi ní kisugya ni kuboeteo me, gi yɛ liboe liku Aya ni banima aŋu u.