Luka 17 - KUNYANYA VUVU YƆ

Eboe zimizi

¹ Yesu asi yɛ badɔkpasi ba si, “Kidiliɛ gi kiaki si banɔ biabitɛ eboe zimizi i, kitraba ba pɔ̀ litraze gagla a ɛki mlɔ mɛ iliɛ gi yɛ aʋa kiaga a xe kiaba ɛ!

² Liapɛ ɔki yɛ xe bɛka lihɔkla ʋidi ní yɛ ole lo o xe bɛkɔ yɛ ŋwia ɛkpɛ ní axu la mɛ ɛ, sani si tɔ ɔki banuvɔ ba ya mɛ tole ɔbitɛ liboe zimizi.

³ Lɛ loso mlevu aŋu ní mlɔ kiboebitɛɛ su u! “Xegi wɔ onemi nɛ ata wɔ ese e, tɛni yɛ; xegi ekyi yɛ ɔna nɔ mɛ ɛ, tɔ kɔkyɛ yɛ.

⁴ Xe ata wɔ ese tegloele ní liwe tile me e, xe edzi aba wɔ klɔ tegloele si i, ‘Mekyi ɔna mɛ,’ lilɛ si kɔkyɛ yɛ.”

Kuziŋaa

⁵ Lɛ banɔkpɛkpɛ ba bɛsi ɔkaɛ si, “Kítɔ blɔ kuziŋaa kuze gagla sanɔ.”

⁶ Lɛ ɔkaɛ ebu le onu si, “Xe mlɔ kuziŋa kulɛ ŋwisi lisebi sisami nɛ fɛ ɛ, mlaatani kupani si ose ɔlɔ si, ‘Kpaʋi isu ya ni wɔ igu ne tɔ zɛkpɛ isu ya ní axu la mɛ!’ lɛ aanu kutu kí mlɔ ɔ.

Ɔnɔsumu gbã ɛ yɛ Axwɛ na

⁷ “Xegi mlɔ mɛ tole yɛ ɔnɔsumu ye ádɔ ɔnyrɔ mɛ loo iʋesi le aʋa odi klɔ edzì i, aasi yɛ si ɔkɔsi tɔ ɔŋa yɛ bidɔ mɛ na a?

⁸ Aníte! boŋu i, kisi asi yɛ si, ‘kyí awla ní mɛ kiŋaŋaɛ su, tɔ ka kusa ole tɔ pe me gi mɛɛŋa bidɔ mɛ ɛ xe mɛɛŋwɛ kuda ɛ; lɛ klɔ kede e, tɔ wuiŋa wɔ bidɔ mɛ.’

⁹ Ɔnɔsumu ye ɔ́ziã ɖase ɛki isã nɛ aʋa gi abitɛ ɛ, loo aziã a?

¹⁰ Niteme ke mlɔ fɛ xe mlɛbitɛ kidɔ kakaa gi bɛsi mlɔ si mlabitɛ ɛ, mlapani si, ‘Banɔsumu ko kunu; blɔ axwɛ ko kwiwa.’ ”

Yesu Ayɔni Benyime Liɔfɔ

¹¹ Agi Yesu azaatrɛ ní Yerusalem i, aga Samaria ni Galilea kumɔ aʋa.

¹² Gi atrátiku ní kamami katɔ mɛ ɛ, benyime liɔfɔ gi bɛɛnyà kunya kyikyi yɔ bɛtsani yɛ ɛ. Bɛlɛɛ ní ɔdzage no

¹³ lɛ bɛkpɛ ozi gagla si, “Yesu! Ɔkaɛ! Dí blɔ asigaga a!”

¹⁴ Yesu amɔ ba lɛ asi ba si, “Mlatrɛ tɔ mlaki kusumu yo baka ba batapo mlo edi.” Gi bɛzɛtrɛ ɛ, bɛmɔ si ba isu ya idra.

¹⁵ Agi ba mɛ tole amɔ si yɛ isu ya idra ɛ, edzi aba, lɛ azɛɛkpɔ̀ Aya ni ole gagla a.

¹⁶ Adɔ yɛ aklamasi na aʋa ní Yesu ketù ya lɛ edo yɛ ɖase e. Onyimee eze Samaria ɔnɛ.

¹⁷ Yesu eʋi si, “Aní benyime liɔfɔ su ɛdra na a?, Nífɔ ɔgɔtole gɔgɔ ba balɛ ɛ?

¹⁸ Ege lɛ loso ɔbaba tole liɛ ko edzi aba do Aya ɖase e?”

¹⁹ Lɛ Yesu apani asi yɛ si, “Yɔ tɔ ga trɛ; wɔ kuziŋa kwiyɔni wɔ.”

Aya yɛ Kaʋaŋaa ka kubabaa

²⁰ Farisianɛ batɔ beʋi Yesu lipoe lɛ klɔ gi Aya yɛ Kaʋaŋaa kiaba ɛ, Ebu le onu aki ba si, “Aya yɛ Kaʋaŋaa ɛ, kátraba ŋwisi bidɔ gi biamɔ kinɛ ɛ.

²¹ Ɔnɔnɔ ɔ́trapani si, ‘Dí, imɔ ka ní ya a! loo imɔ ka ni ní kɔlɔ ɔ!’ lɛ ese linu si Aya yɛ Kaʋaŋaa ɛ, kakpasi ní mlɔ mɛ.”

²² Lɛ asi badɔkpasi ba si, “Lipoe le litraba gi mlaapɛ si mlɛɛmɔ Ɔnɔɛ Yebi ye yɛ ewe a la klɔ la mɛ tile, pɔ mlatrá mɔ lɛ ɛ.

²³ Banɔ batɔ biaze gi biasi mlɔ si i, ‘Dí, imɔ yɛ ní kɔlɔ!’ loo, ‘Dí imɔ yɛ niya!’ Pɔ̀ mlakíze ni ba kude e.’

²⁴ Ŋwisi kiliɛ gi dzeni ye izɛtsi kifu yɛ ɛ, xe kizeekle dɔni ayɛɛ kapɛ tiele tsini kapɛ ʋla ɛ, nite ke Ɔnɔɛ Yebi ye aaze ní yɛ liwe le aʋa.

²⁵ Pɔ̀ ní ɔtɔpu kɔ ɛ, lilɛ si ɔmɔ ɔziã glegle tɔ banama gi balɛ ligbã́ nɛ abla bekyi kede akpɛ yɛ ɛ.

²⁶ Kiliɛ gi lize ni Noa lipoe le e, nite ke liaze ní Ɔnɔɛ Yebi ye ewe la mɛ ɛ.

²⁷ Banima bɛzɛŋa lɛ bɛzɛŋwɛ ɛ, benyime ba ni badzɛ ba bɛzɛgbani ba ahanuglɔ ba kɔzɛna ni liwe lɛ gi Noa eti eku ní onitsahu lo me xe kuni yo kwiyi i, xe kwiba ɛgbani ba petee sɛnɔ ɛ.

²⁸ “Liaze ŋwisi Lot lipoe le. Banima bɛzɛŋa lɛ bɛzɛŋwɛ ɛ, bezee dzi lɛ bɛzɛda bidɔ ɔ, bɛzɛkpɛ bidɔ lɛ bɛzɛɛwa agba a.

²⁹ Liwe lɛ klɔ aʋa gi Lot edo ní Sodom i, lɛ kifu yɛ ni kifu yɛ akla na ɛdɔ dɔni lifunu ne e, xe eye ba petee e.

³⁰ Nite ke litraze xe Ɔnɔɛ Yebi ye aaŋwi i.

³¹ “Ní liwe lɛ klɔ aʋa ɛ, ɔniliɛ klɔ gi ɔtini ní yɛ ligba lɛ aʋa ɛ, ɔki ple eku ní kepea mɛ si yitrɛkɔ yɛ bidɔ mɛ ɛ; nite ke ɔniliɛ klɔ gi ɔlɛ ni ɔnyrɔ nɔ aʋa ɛ, okídzi trɛ kepea mɛ si yizɛkɔ kididɔ ɔ.

³² Mlaplɛ aŋu ní Lot yedze aʋa!

³³ Ɔniliɛ klɔ gi aapɛ si yibu yɛ ɔtutɔ yɛ ligbã́ nɛ ɛ, aalila lɛ; lɛ ɔniliɛ klɔ gi aalila yɛ ligbã́ nɛ ɛ, aabu le.

³⁴ Ní elesi ala klɔ mɛ, mɛɛsi mlɔ si, banɔ tiaʋa biafɛ ní ɔtɔsi tole aʋa; pɔ̀ biasɛ ni tole e, lɛ biayurɔ ɔʋla ɛ.

³⁵ Badzɛ tiaʋa biaze kuhɔɔ aʋa gi biazɛhɔ adeʋi, biasɛ ni tole pɔ̀ biayurɔ ɔʋla ɛ.

³⁶ Benyime tiaʋa biazɛwa axwɛ na ní ɔnyrɔ mɛ, biasɛ ni tole, lɛ biayurɔ ɔʋla ɛ.”

³⁷ Badɔkpasi ba beʋi ye si, “Ɔkaɛ, nifɔ ɔ?” Lɛ Yesu ebu le onu si, “Níklɔ gi kidɔ tsetse kifini i, níklɔ opéte ʋa bizɛkpɛ likpɔ.”