Luka 16 - KUNYANYA VUVU YƆ

Ɔdɔaʋadi Ɔɖaye ɔnɛɛ

¹ Yesu asi yɛ badɔkpasi ba si, “Oxonete ɔtɔ eze gi ɔdɔaʋadi eze yɛ awla a. Pɔ̀ bɛsi yɛ si yɛ ɔdɔaʋadi ye e azeezizi yɛ kibɔɛ.

² Lɛ loso axwa yɛ lɛ asi yɛ si, ‘Liboe woli lɛ ya gi meenu ní wɔsu u? Bu akɔnta kí mɛ ní kiliɛ gi wɔɛkɔ ɛga ní mɛ bidɔ mɛ su u, lɛ ese linu si wɔtratani mɛ bidɔ aʋa kudi tɔ ɔ.’

³ “Ɔdɔaʋadi ye asi isu ya si, ‘Mɛ ɔkaɛ atrá kpikpini mɛ ní mɛ lixwɛ nɛ mɛ. Ege maabitɛ abla ɛ? Kigagla kíma ní mɛ mɛ̀ gi maakɔ wa axwɛ gagla a, lɛ kuye kwiaku me si miʋi bidɔ ɔ.

⁴ Mete kidiliɛ gi maabitɛ ɛ! Tɔ xe bɛyurɔ mɛ ní axwɛ na mɛ fɛ ɛ, Maamɔ baʋianɛ gi biazɛ mɛ kpɛ ní ba kupeo me e.

⁵ “Lɛ loso axwa yɛkaɛ yɛ baʋɛnete ba pɔ́ ɔ. Lɛ eʋi ɔtɔpu yɛ si, ‘Tiasɛ liʋɛ wɔdɔ ni mɛ ɔkaɛ su u?’

⁶ “Ebu le onu si, ‘Olif ye kumu ŋaŋa gago alafa tole.’ “Lɛ ɔdɔaʋadi ye asi yɛ si, ‘Zi wɔ liʋɛ nɛ keplekpaa, ze kesea tɔ ŋwlimi avi tetsu.’

⁷ “Lɛ eʋi ɔnɔ ʋla yɛ si, ‘Wɔ pɔ tiasɛ liʋɛ wɔdɔ ɔ? “Ebu le onu si ‘Kimimi ikotoku akpe tole.’ Lɛ ɔdɔaʋadi ye asi yɛ si, ‘Zi wɔ́ liʋɛ nɛ keplekpea tɔ ŋwlimi alafa ɔgɔtiaʋa.’

⁸ “Ɔkaɛ akpɔ ɔdɔaʋadi nyani nyani liɛ si, ebu ɔdaye ɔkli lɔ ya; lɛ ese linu si kelea lia ya mɛ banima bete liboe ní kiliɛ gi biaga ní ɔɖaye lo me ni ba hanuglɔ ba, sani banama gi benu kuklekle me banɔ ɛ.”

⁹ Lɛ Yesu atrɛ ní lɛ aʋa si, “Lɛ loso e, mɛɛsi mlɔ si: mlakɔ kelea mɛ exo la evu baʋia ba tɔ, xe eblo e, tɔ biazɛ mlɔ kpɛ ni kupe moblo me.

¹⁰ “Ɔnɔ kakaa gi biaka yɛ aʋa ní eboe sisami na mɛ ɛ, biaka yɛ aʋa ní eboe ʋidi la kyɛ mɛ; lɛ ɔniliɛ klɔ gi óɖi anukwarɛ ní eboe sisami na mɛ ɛ, ɔ́traɖi anukwarɛ ní eʋidi la kyɛ mɛ ɛ.

¹¹ Xegi mlátani anukwarɛ kudo nì kelea mɛ exo la ɛ, nyaŋwɛ aaká ní mlɔ aʋa nì lifunu ne exo la a?

¹² Lɛ xe mlátani ɔnɔ dzedze bidɔ aʋa kudi i, nyaŋwɛ aaki mlɔ kidiliɛ gi kinu mlɔ tutɔ mlɔ kiniɛ ɛ?

¹³ “Ɔxwɛdzɛ ɔtɔtɔ ɔ́tratani baka tiaʋa kusumu u; aatrɔ tole ahwafi kɔ adimɛ ni ɔʋla ɛ, loo aanu kutu ki tole kɔ akpɛ ɔʋla ɛ kakpaa ɛ. Wɔtratani Aya nì exo la kusumu kpɛ likpɔ ɔ.”

Yesu yɛ Eboe Dodoatɔ

¹⁴ Agi Farisianɛ ma benu eboa la petee e, bɛkpɛ Yesu kakpaa lɛ ese linu si bɛdimɛ ni kibɔ ɛ.

¹⁵ Yesu asi ba si, “Mlɔ mlenu banɔ baklɔ ba gi mlɛbitɛ isu ya tɔ mlaaŋwui banɔ gbã ní banɔ aŋu mɛ, pɔ̀ Aya ete mlɔ ina nɛ mɛ ɛ. Lɛ kidiliɛ gi kizɛ kedzi ní banɔ aŋu mɛ ɛ, kíyi kididɔ ní Aya aŋu mɛ.

¹⁶ “Mose Ɔsã nɔ ni beboedoplɛ ba ba bidɔ ŋwlimiŋwlimi bɛ biizɛwa axwɛ na gakɔ nani Yohanes kuni yo ɔkpɛkpɛ yɛ lipoe le; dɔni lipoe lɛ klɔ aʋa ɛ, bɛɛpani ní Aya yɛ Kaʋaŋaa ka Liboe Gbã nɛ su, lɛ ɔnɔ kakaa eekeni idi si yitiku ni kigagla a.

¹⁷ Pɔ̀ linu kidɔ plɔplɔ ɛki lifunu ne ni kesea tɔ bilila sani si ba yurɔ Ɔsã nɔ kapɛmi sisami gɔgɔa.

¹⁸ “Onyime kakaa gi aayurɔ yedze e, xe aagbani ɔdzɛ dzedze e, awa kihasi; lɛ onyime liɛ klɔ gi aagbani ɔdzɛ liɛ gi bɛyurɔ ɛ, yɛ fɛ awa kihasi.

Onyime Oxonetee nì Lazaro

¹⁹ “Onyime oxonete ɔtɔ eze gi yɛ bidɔ kpɛkpɛ ʋɛ ɛ, biŋa kedzi glegle lɛ azɛɛŋa ligbã liwe kakaa a.

²⁰ Ɔzíanete ɔtɔ fɛ eze gi bɛzɛxwa si Lazaro e, ebi la ɛtsa ɔnɔ zizi yɛ, lɛ bɛzɛɛmani yɛ ní oxonetee yɛ kevunu ya.

²¹ Azeegyo edi si yɛ amɔ kiŋaŋa sisami liɛ gi kizɛɛwɔli dɔnɔ ní oxonetee yɛ ɔkplɔ nɔ aʋa a. Kudroʋi yo kɔ kwizeemini yɛ ebi la mɛ.

²² “Ɔzianetee etse lɛ Aya yɛ baxwɛdzɛ ba befeke ye tɔ ozeze ní Abraham su u. Oxonetee kyɛ etse lɛ bevive ye e.

²³ lɛ ní kifumoni ye me e, gi eze ní kuyeʋiyeʋi glegle me e, efeke yɛ aŋu na lɛ amɔ Abraham ní ɔdzage no gi Lazaro odi ní yɛ su i.

²⁴ Lɛ akpɛ ozi axwa yɛ si, ‘Ɔka Abraham! Di me asigaga, tɔ kpɛ Lazaro tɔ ɔkpɛ yɛ kiwlaʋi yɛ ní kuni me tɔ ɔkɔ yɔ mɛ kinemie, lɛ ese linu si malɛ ní kuyeʋiyeʋi me ní kifui liɛ mɛ.’

²⁵ “Pɔ̀ Abraham apani si, ‘mɛ obi ye plɛ aŋu si, ní wɔ ligbã́ nɛ mɛ ɛ wɔzi wɔ bidɔ gbã mɛ, ní lipoe lɛ klɔ mɛ gi Lazaro kɔ azɛ bidɔ nyani nyani ʋɛ ɛ. Pɔ̀ abla ɛ, ɛɛmɔ isami nɛ ní ya, lɛ wɔ́ wɔli ní kuyeʋiyeʋi yo me e.

²⁶ Kɔpɔnɔ ɛ, kupɛ ʋidi kufini ní blɔ ni mlɔ kusi, gi kwikisi banama gi bɛpɛ si bɛtsa ɛdɔni ní ya ɛba mlɔ klɔ ɛ, batrátanɔ, nite me ke ɔ́nɔnɔ ɔ́tradɔ ní mlɔ klɔ ɛba ní ya gi kulɛ ɛ.’

²⁷ “Lɛ oxonete apani si, ‘Kɔlɔ ɛ, maki wɔ litukpo ɔka Abraham, kpɛ Lazaro ní mɔka kepea mɛ,

²⁸ níklɔ gi mɛ beneminyime tietsu balɛ ɛ. Tɔ ɔzɛku le kpɛ ní ba mɛ tɔ bakíba kuyeʋiyeʋi uliɔ ya mɛ ɛ.

²⁹ “Lɛ Abraham apani si, ‘Mose ɔsã nɔ ni beboedoplɛ ba bidɔ ŋwlimiŋwlimi bɛ bilɛ, wɔ benemi ba benu liboe lɛ klɔ gi bi basɛ ɛ.’

³⁰ “Oxonetee ebu le onu si, ‘Owo Ɔka Abraham,’ ‘Pɔ̀ xe ɔnutɔ aayɔ dɔni bekpo ʋa mɛ ɛ, xe atrɛ ní baklɔ ɛ, biakyi ní ba eboe zimizi na mɛ.’

³¹ Pɔ̀ Abraham apani si, ‘Xe batrá nu Mose ni beboedoplɛ ba eboe la ɛ, batrázɛ lɛ xe ɔnutɔ ayɔ adɔni bekpo ʋa mɛ fɛ.’ ”