Luka 15 - KUNYANYA VUVU YƆ

Abee Ní Oʋesi gi Ɛlila Su u

¹ Liwetɔ lɛ gi babɔgyɔ glegle atɔ ni banɔ zimizi ba beti ipɔni Yesu si beenu yɛ eboe la ɛ,

² Farisianɛ ma ni ɔsã nɔ badɔbasɛ ba bɛzɛɛta ànyà na si, “Onyime liɛ ya ɛ, ɛɛzi banɔ zimizi ba lɛ izɛɛŋa bidɔ ni ba kyɛ ɛ.”

³ Lɛ Yesu ebu abee liɛ akí ba si;

⁴ Xe iʋesi alafa tole ilɛ mlɔ mɛ ɔtɔ awla a, xe tole ɛlila ní lɛ kusi i, ɔ́trayurɔ iʋesi avi ɔgɔtole ni ɔgɔtole le ní lɛ bidɔ mɛ ɔŋa klɔ ɔ, xe iipɛ oʋesi ɔlɔ gi ɛlila a kɔkpɛni lipoe lɛ klɔ gi aamɔ lɔ na a?

⁵ Lɛ xe amɔ lɔ ɛ, aafeke lo trɔ ní yɛ aŋwladɔ na aʋa nì isami

⁶ xe akɔ lɔ amani kepea mɛ ɛ. Kɔ axwa yɛ baʋia nɛ ba ni yɛ axolika ba kpɛ likpɔ kɔ asi ba si, “Mlamɔ isami ni mɛ; mamɔ mɛ oʋesi ɔlɔ gi ɛlila na a.”

⁷ Mɛɛsi mlɔ si niteme ke biamɔ isami glegle ní lifunu ne ní ɔnɔ zimizi tole gi ekyi yɛ ɔna mɛ su u, sani banɔ avi ɔgɔtole ni ɔgɔtole ba ya gi benu banɔ gbã xe bázia kukyikyi i.

Abee ní Kibɔ gi ki lila Su u

⁸ Loo ɔdzɛ gi bibɔ pititi liɔfɔ bilɛ ní yɛ awla a, xe tile kilila kɛ su i, ɔ́trasu kani i, xe aagba yɛ kepea mɛ tɔ yipɛ kibɔɛ tsiitsiitsii kɔzɛna ni lipoe lɛ gi aamɔ kɛ ɛ?

⁹ Lɛ xe amɔ kɛ ɛ, aaxwa yɛ baʋia nɛ ba ni yɛ axolika ba kpɛ likpɔ xe aasi ba si, ‘Mlamɔ isami ni mɛ; Mamɔ mɛ kibɔɛ liɛ gi kilila ɛ.’

¹⁰ Nite me ké mɛɛsi mlɔ si, Aya yɛ baxwɛdzɛ ba biamɔ isami glegle kɔkpɛ ɔnɔ zimizi tole gi ekyi yɛ ɔna mɛ loso o.

Abee Ní Obinyime gi alila su u

¹¹ Lɛ Yesu atrɛ ní lɛ aʋa si, “Onyime ɔtɔ eze gi bebinyime tiaʋa beze ní yɛ awla a.

¹² Obinuvɔɛ asi yɛ ka si, ‘Ɔka, kɔ mɛ ɔŋa klɔ kí mɛ.’ Lɛ alɛ yɛ bidɔ mɛ aki ba tiaʋa ɛ.

¹³ “Ewe klakla atɔ kede e, ɔnuvɔɛ ada yɛ bidɔ mɛ lɛ akɔ kibɔɛ xe ekú kude me e. Atrɛ ní kese dzedze katɔ aʋa gi niklɔ azeezizi yɛ kibɔɛ gani ligbãŋaŋa mɛ ɛ.

¹⁴ Gi ezizi yɛ bidɔ mɛ petee e, kuʋɛ gagla kutɔ kwidɔ ní kesea lia klɔ aʋa, nite si eku ɔzia mɛ gi kididɔ kigɔ yɛ awla tɔ ɔ.

¹⁵ Lɛ loso e, akɔ isu ya apɔni kesea klɔ aʋa ɔnɔ gi aki yɛ axwɛ ní yɛ ɔnyrɔ mɛ si ozeedi yɛ iha lɛ aʋa a.

¹⁶ Nya azɛapɛ si yiŋa iha lɛ kiŋaŋaɛ, pɔ́ ɔnɔnɔ ɔki yɛ kitɔtɔ si ɔŋa a.

¹⁷ “Gɔgɔɛ enyime lɛ asi isu ya si, ‘Mɔka yɛ baxwɛwa ba pɔ́ ɛ, ba kiŋaŋaɛ kisrɛ sani ba kuŋaŋa, lɛ mɛ pɔ̀ kuʋɛ kuha mɛ kuye ni ya a!

¹⁸ Maayɔ, maatrɛ ní mɔka klɔ lɛ maasi yɛ si, Mɔka matá Aya ni wɔ ese.

¹⁹ Mégyeno si wɔaxwa mɛ si wobi tɔ ɔ, bitɛ mɛ ŋwisi wɔ baxwɛwa ba mɛ tole kinɛ ɛ.’

²⁰ Lɛ loso e ayɔ ekú kudeo me gi ɛɛtrɛ ní yɛka klɔɛ ɛ. “Pɔ̀ gi eze ní ɔdzage no e, yɛka amɔ yɛ atsisi; yɛ ɔna nɔ ekyi evu ye, lɛ ese e xe azɛɛkpɛ awla ni yɛ ole lo o, xe amu yɛ adzɔ la ɛ.

²¹ Lɛ obi ye apani si, ‘Mɔka matá Aya ni wɔ ese. Mégyeno si wɔaxwa mɛ si wobi tɔ ɔ.’

²² “Pɔ̀ yɛ ka axwa yɛ banɔsumu ba lɛ asi ba si, ‘Mlakɔ si, tɔ mlaakɔ liwu gblamadza gbã nɛ petee amanɔ tɔ mlakɔ lɛ akpɛ aki yɛ. Mlakpɛ asukpɛɛ ní yɛ kíwlaʋi yɛ tɔ mlakpɛ afɔkpa ʋa yɛ kuklikpɔ ɔ.

²³ Atɔ mlazevu ligume obi liɛ gi amɔ isu ya mɛ ɛ, mleye ye tɔ kumɔ isami.

²⁴ Lɛ ese linu si lize ŋwisi mobinyime liɛ etse e, pɔ̀ abla ɛ, ɔlɛ ligbã́; alila, pɔ̀ abla ɛ, bɛmɔ yɛ. Lɛ bekpese isami nɛ kumɔ ɛ.

²⁵ “Lipoe lɛ klɔ mɛ ɛ, yebinyime tsitsi ye eze ní ɔnyrɔ mɛ. Gi atrédzi i xe eti apɔni kepea mɛ ɛ, enu idzi ni evu kuyoyo.

²⁶ Lɛ axwa banɔsumu ba mɛ tole lɛ eʋi ye si, ‘liboe woli liitrɛ lɛ aʋa a?’

²⁷ Ebu le onu akí yɛ si, ‘Wonemi ye yɛ edzi aba kepea, lɛ wɔka eye ligume obi liɛ gi eku kumu u, lɛ ese linu si amɔ Yebi ye gi alila a xe edzi aba ni isu mɛ pɛ̀pɛ̀ mɛ.’

²⁸ “Pɔ̀ obinyime tsitsi ye eyeʋi isu ya gbɛgbɛ si ɔdimɛ si yitiku kepea mɛ ɛ; lɛ yɛka aba a xe aki yɛ litukpo si oti oku kepea mɛ ɛ.

²⁹ Pɔ̀ ebu le onu akí yɛka si, ‘Dí, mɔka agɔ ala ya petee gi mawa axwɛ na aki wɔ ŋwisi ɔnɔdzidzi kinɛ ɛ, xe máta wɔ isã nɛ ese edi i. Ege wɔki mɛ ɛ? Ɔmu tete fɛ ɛ wɔ́ki mɛ edi tɔ mɛ ni mɛ baʋia nɛ ba kwiakɔ mɔ isami i!

³⁰ Pɔ̀ wobi liɛ ya ɛ, azeezizi wɔ bidɔ mɛ pɔ́ nì bawawadze ba pɔ̀, gi edzi aba kepea ɛ, woye ligume obi gi liku kumu aki yɛ ɛ.’

³¹ Yɛka ebu le onu si, ‘Mobi ye, wɔlɛ ní mɛ sú lipoe kakaa, lɛ kidɔ kakaa gi kinu mɛ kinɛ ɛ, wɔ kínɛ kinu.

³² Pɔ̀ lilɛ si kuŋa liwe tɔ kumɔ isami, lɛ ese linu si lize si wonemi ye etse, pɔ̀ abla ɛ ɔlɛ ligbã́; lize si alila, pɔ abla ɛ bɛmɔ yɛ ɛ.’ ”