Luka 13 - KUNYANYA VUVU YƆ

Mlekyi ní mlɔ ina nɛ mɛ xegi aníte mlaatse e

¹ Ní lipoe lɛ klɔ mɛ ɛ, banɔ batɔ beze ní iklɔ gi bɛsi Yesu kiliɛ gi Pilato eye Galileanɛ atɔ ɔ, xe apisa ba ika lɛ ni bidɔ mɛ ɛ gi bɛzɛpɔʋi ɛki Aya a.

² Yesu ebu le onu si “Kigyo mlegyo edi si Galileanɛ baklɔ gi beye te e, ba bɛsa eboe zimizi na kubitɛ sani Galileanɛ gɔgɔ ba na a?

³ Aníte lilɛ ɛ! Lɛ loso mɛɛsi mlɔ si, xegi mlékyi ní mlɔ eboe zimizi na mɛ ɛ, mlɔ pɔ́ mlaatse e!

⁴ Aloo banɔ liɔfɔ ni ɔgɔtiaʋa klɔ gi Siloam lifune ligba lɛ likpa ebu u, xe betse e, kɔ ba benu banɔ zimizi ba sani banama petee gi bali Yerusalem na a?

⁵ Kura! Lɛ mɛɛsi mlɔ si xegi mlékyi ní mlɔ eboe zimizi na mɛ ɛ, mlɔ pɔ́ mlaatse e.”

Abee ní mangɔ gi óbu libiitɔtɔ su u

⁶ Lɛ Yesu ebu abee liɛ aki ba si: Onyime ɔtɔ eze gi akpɛ mangɔ ni yɛ wain ɔnyrɔ mɛ ɛ, Adzɛ si yigu esebi ní mangɔ yɛ mɛ, pɔ ɔ́mɔ litɔtɔ ɔ.

⁷ Lɛ loso asi yɛ ɔnyrɔ nɔ aʋa odidi ye si, “Agɔ tata nyɔŋ la ya gi mɛɛba ni ya pɔ́ mámɔ, lisebitɔtɔ ní ose lo me e. Lɛ loso e tsa lɔ tuʋe e! Líma si ozezizi kesea ki mɛ ɛ.”

⁸ Pɔ ɔnyrɔ nɔ ɔʋadi ye asi yɛ si, “ ‘Ɔka,’ ‘yurɔ lɔ ligɔ tile dzɛ ɛ. Maatu lɔ su tɔ maakpɛ biŋaŋa lɔ su.

⁹ Xegi eyo galigɔ ɛ, liapɛ; pɔ xe aníte e, wɔatani kuki si biatsa lɔ fãa.’ ”

Yesu ayɔni ɔdzɛ bafa ɔtɔ ní Sabat liwe le aʋa

¹⁰ Ní Sabat liwe etɔ aʋa ɛ, Yesu azɛɛbasɛ bidɔ ní Yudanɛ ma Ɔtsaklɔ.

¹¹ Ɔdzɛ ɔtɔ eze niklɔ gi Ɔfuɛfuɛ zimizi ɔtɔ evu ye agɔ liɔfɔ ni ɔgɔtaʋa nyɔŋ ɛ. Ɔdzɛɛ axa eku gi ɔ́zɛtani kugyɔ ɔ xe alɛɛ kedu ya kura a.

¹² Gi Yesu amɔ yɛ ɛ, axwa yɛ atsisi lɛ asi yɛ si, “Ɔdzɛ, wɔ kunyaa, kwiyurɔ wɔ!”

¹³ Lɛ atrɔ awla ní yɛ aʋa a, ko lɛ ayɔ xe agyɔ ɔlɛ ɛ, niteme si ɔdzɛɛ akpɔ Aya!

¹⁴ Pɔ̀ Yudanɛ ma Ɔtsaklɔ ɔʋadi ye, amɔ kusuyeʋi si Yesu ayɔ ni ɔnyanya ní Sabat liwe le aʋa a. Lɛ loso apani asi banima si, “Ewe teglo alɛ gi kiawa axwɛ ɛ, lɛ loso lilɛ si mlaba ní ewe teglo ala klɔ mɛ tɔ bayɔni mlɔ ɔ, pɔ̀ aní ní Sabat liwe le aʋa a.”

¹⁵ Lɛ Ɔkaɛ azɛ lɛ yɛ onu si, “Mlɔ banɔ aŋu mɛ boebitɛ ba,! Mlɔ mɛ ɔkakaa izebu yɛ tedzi ye loo ligume nyime ne edono ní kuka mɛ gi izɛgbani bɛ zɛki bɛ kuni ní Sabat liwe le aʋa a.

¹⁶ Abla Abraham ye obidzɛ liɛ gi Ozimizi ye evu anya agɔ liɔfɔ ni ɔgɔtaʋa nyɔŋ la ya ɛ; Kɔ bakíble ye adɔ ni yɛ kunyaa mɛ ní Sabat liwe le aʋa na a?”

¹⁷ Kuye kwiku yɛ ahwafianɛ ma petee pɔ̀ banima kɔ ɛ, isami iku ba ní enugutseboe ala petee gi Yesu azaabitɛ su u.

Abee ní lisebi sisami nɛ su

¹⁸ Lɛ Yesu eʋi si, “Kitɛ Aya yɛ Kaʋaŋaa kalɛ ɛ? Lɛ ege maakɔ ka kusrɔnɔ ɔ?”

¹⁹ Kaʋaŋaa kalɛ ŋwisi lisebi sisami gi onyime ɔtɔ akpɛ ní yɛ kayaa mɛ kinɛ ɛ. Lisebi le litsi gi lidzi ose ʋidi ɔtɔ gi kudzɔʋi yɔ kwiwa evu na ɛkpɛ ní lɔ ayaa la mɛ ɛ.

Abee ní kunyasi su

²⁰ Yesu eʋi dzɛ si, ege maakɔ Aya yɛ Kaʋaŋaa srɔnɔ ɛ?

²¹ Kalɛ ŋwisi kiliɛ gi ɔdzɛ ɔtɔ akɔ kunyasi sisami kutɔ akɔ apisa kunɔ kpaŋukpaŋu utɔ gi kwiki si amɔwɔ yɛ petee eho kinɛ ɛ.

Kevu nu pɔpɔa ki ligbã́ nɛ

²² Yesu aga aklanɔ ní ima ni kumami yɔ mɛ azaabasɛ bidɔ gi azaatrɛ ní Yerusalem i.

²³ Ɔnutɔ eʋi ye si, “Ɔkaɛ, kɔ banɔ kiklakla mɛ sisami itɔ ko kiamɔ kububu na a?” Yesu ebu le onu aki ba si,

²⁴ Mlekeni edi tɔ mleti iku gani kevunu pɔpɔa mɛ; lɛ ese linu si meetrɔ likla lɛ aʋa ɛki mlɔ si; banɔ glegle bɛtráŋwlɛ si beti eku pɔ̀ batrátanɔ ɔ.

²⁵ Xegi kepea ɔkaɛ ayɔ xe ada opupo lo e, xe mlalɛ ni oŋwe no o, xe mlɛsa opupo lo o si, “Ɔkaɛ, Kwiki wɔ litukpo o, dra opupo lo ki blɔ ɛ!” Pɔ̀ aasi mlɔ si, “Méte mlo loo niklɔ gi mlɛdɔ ɔ!”

²⁶ Niklɔ mlɔ kyɛ mlaabù isu ya onu si, “Blɔ ni wɔ kwiŋa lɛ kwiŋwɛ kyɛ ɛ, lɛ wɔbasɛ bidɔ ní blɔ ima nɛ ablɔ ʋa aʋa a!”

²⁷ Pɔ̀ aasi mlɔ dzɛ si, “Méte mlo loo niklɔ gi mlɛdɔ ɔ! Mlasɛ ní mɛ su, mlɔ litukpo me gagla benete ba.

²⁸ Mlaabemi gi mlata ene na a, xegi mlɛmɔ Abraham, Isak, Yakob ani beboedoplɛ ba petee ní Aya yɛ Kaʋaŋaa mɛ ɛ, pɔ̀ xe bɛŋwia mlɔ xunyɔ ɛkpɛ ni oŋwe no e.

²⁹ Banɔ biadɔ ní kewetu ya, keweku ya, kaʋa ni kale gi biaŋa lɛ biaŋwɛ bidɔ ní Aya yɛ Kaʋaŋaa mɛ ɛ.

³⁰ Nite me si banama gi ba benu banɔ gɔgɔ ba abla ɛ, ba biaze banɔ tɔpu ba, lɛ banama gi benu banɔ tɔpu abla ɛ, ba biaaze banɔ gɔgɔ ba.”

Yesu alɔ Yerusalem

³¹ Ní lipoe lɛ klɔ mɛ ɖii, Farisianɛ batɔ bɛba Yesu klɔ lɛ bɛsi ye si, “Sɛ ní niya tɔ trɛ ní ɔkɔ dzedze lɛ ese linu si Herodes ɛɛpɛ si yiye wo.”

³² Lɛ Yesu asi ba si, “Mlatrɛ tɔ mlazɛsi wayu liɛ klɔ si, ‘Matrakpikpini ifuɛfuɛ zimizi ne e dono, lɛ maayɔni banyanya ba kyɛ omono ni kivo o. Liwetanɛ we le e, maagù mɛ axwɛ na.’

³³ Pɔ linu si mize kudeo me omono, kivo ni kivodé. Líma si beye oboedoplɛ ní ɔkɔkɔ sani Yerusalem.

³⁴ “Wɔ Yerusalem, Woye Aya yɛ beboedoplɛ ba, lɛ baxwɛdzɛ ba gi Aya atsisi i, wɔsa ba akla na. Tasɛ mapɛ si mikpɛ wɔ bebi ba likpɔ ŋwisi kiliɛ gi ɔkukɔnee izewe yɛ bebi ba kinɛ ɛ, pɔ̀ wɔ́ki mɛ kudeo onu u!

³⁵ Lɛ loso e, wɔ lisumugba lɛ lilɛ kiwɔ pluplu. Sugba mɛɛsi mlɔ si, mlatrámɔ mɛ tɔɔ kɔna ni lipoe lɛ gi mlaakpɛ osayee lo si, ‘Aya ɔkrira ɔniliɛ gi atrába ní Ɔkaɛ linyi ne me e!’ ”