Hebr 3 - KUNYANYA VUVU YƆ

Yesu emu asani Mose

¹ Lɛ loso mɛ benemi dradra ba, mlɔ banama kyɛ gi Aya axwa a, mlakɔ mlɔ aŋu na atrɔ ní Yesu aʋa, ɔniliɛ gi Aya akpɛ ɛ, si oze kusumu yo Ɔka ʋidi ye, gi yɛ aapɔni blɔ ní kidɔ kakaa mɛ ɛ, gi yɛ su kwidra ni blɔ inugu le e.

² Abitɛ kidɔ kakaa ní kude gbã onu gi Aya a, gi yɛ akya yɛ ɛ, asi yɛ si ɔbitɛ ŋwisi kiliɛ gi Mose abitɛ ní kude gbã onu ní Aya yɛ kepea petee me kinɛ ɛ.

³ Lɛ ese linu si kubùbù glegle kulɛ ní Yesu su i, sani Mose ŋwisi kiliɛ gi ɔgbawaɛ izɛzi kubùbù isani kepea ɔtutɔ lɔ ɛ.

⁴ Lɛ ese linu si ligba kakaa ɛ, ɔnɔ izɛɛwa lɛ, pɔ̀ Aya yɛ izɛɛbitɛ kidɔ kakaa a.

⁵ Mose abitɛ kidɔ kakaa ní kude gbã onu ní Aya yɛ kepea petee me ŋwisi ɔnɔsumu kinɛ ɛ, lɛ apani ní eboe gi la su Aya aapani ní ɔtɔ nɔ mɛ ɛ su.

⁶ Pɔ̀ Kristo abitɛ kidɔ kakaa ní kude gbã onu ŋwisi obi gi yɛ iwla mɛ Aya yɛ kepea kalɛ ɛ kinɛ. Lɛ blɔ kunu yɛ kepea, xegi kwivu blɔ ina nɛ ani kudeonudidi yo awla ní kidiliɛ gi kɛ loso kwifeke isu ya ɛ.

Bɛgba Israel bebi ba ní kumɔziŋa su

⁷ Lɛ loso kiliɛ gi Aya yɛ Ɔfuɛfuɛ nɔ ɛpani i si, “xegi mlenu Aya yɛ ole lo omono e,

⁸ mlɔ ina nɛ mɛ ikízee gagla, kiliɛ gi mlɔ bakatsi ba bɛbitɛ gi bɛyɔ kedu ya ní mɛ su i, kiliɛ gi beze liwe lɛ klɔ ní ɔyaya klɔ ɔ, gi bekeni me edi kinɛ ɛ.

⁹ Niklɔ gi mlɔ baka ba bekeni me edi i, xe befeke me edi i, gi bɛɛmɔ kidiliɛ gi mabitɛ agɔ avitene na kyɛ ɛ.

¹⁰ Lɛ loso e, meyeʋi isu ní kigyɔgyɔɛ mɛ liɛ klɔ aʋa lɛ mapani si ‘ba ina nɛ imá ni mɛ kude lɛ béte mɛ bede ʋa’

¹¹ Lɛ loso maka kitamu aki isu ní mɛ kusuyeʋio me si, ‘Batrátiiku ní mɛ kusuyɔɔ mɛ liwewe!’ ”

¹² Benemi ba, mledi isu aʋa mumɔ tɔ ɔna zimizi gi ɔ́zɛ ɔŋa ɛ, okize ní mlɔ mɛ ɛtɔtɔ mɛ, tɔ mláʋakyi kede kpɛ Aya gi yɛ izɛki kidɔ kakaa ligbã nɛ ɛ.

¹³ Boŋu i, mlazɛɛkpɛ mlɔ ahanuglɔ ba kigaglaɛ liwe kakaa liwe, gi bɛɛxwa lɛ si omono e, atɔ eboe zimizi atɔtɔ akímeni mlɔ mɛ ɔtɔtɔ.

¹⁴ Lɛ ese linu si mlaamɔ ɔŋakɔ nì Kristo, xegi mlevu kidiliɛ ɛ, gi kɛ kudeonu kwidi i, lipoe lɛ gi kwizi ŋa ɛ, kɛ mɛ kɔzɛna nì ɔgukɔ ɛ.

¹⁵ Ŋwisi kiliɛ gi bɛpani zanɔ si i, “Xegi mleenu Aya yɛ ole lo omono e, mlɔ ina nɛ ikízee gagla ŋwisi mlɔ bakatsi ba kiniɛ ɛ, gi bɛyɔ kedu ní mɛ su i.”

¹⁶ Lɛ nyaŋwɛ ba benu Aya yɛ ole lo o, xe bɛyɔ kedu ya ní yɛ su u? Aní banama petee gi Mose agbani adɔ nɔ ní Egipte na a?

¹⁷ Kɔ nyaŋwɛ ba su Aya eyeʋi isu agɔ avitene zizi na ɛ? Aní banama gi bɛbitɛ eboe zimizi na a, xe betse ní ɔyaya klɔ ɛ.

¹⁸ Lɛ nyaŋwɛ ba Aya aka yɛ kitamu yɛ akɔ si, batrátiiku ní yɛ kusuyɔɔ mɛ liwewe e, xe ani banɔ ba ya gi bénu kutu aki yɛ ɛ?

¹⁹ Lɛ kwiba ɛmɔ egyesi si, bátani kesea mɛ kuti iku kɔkpɛ gi báziŋa loso o.