Hebr 12 - KUNYANYA VUVU YƆ

Aya yɛ kuheheo kɔ kuzɛɛbasɛ yɛ kunɔlɔ ɔ

¹ Lɛ loso gi banima lihakpɔ ʋidi ilɛ gi liiŋa katsalia ɛki blɔ liklani blɔ ɛ, mlaki tɔ kuyurɔ kidɔ kakaa gi kiitsí blɔ kudeonu ni eboe zimizi ana gi ɛnya blɔ gagla tɔ mlaki tɔ kuse nì kimbi kyíkyĩ kuseseo liɔ klɔ gi kulɛ ní blɔ ɔtɔ nɔ ɛ.

² Mlaki tɔ kukɔ blɔ aŋu na trɔ ní Yesu aʋa, gi yɛ onu blɔ liŋwitsɛ lɛ ɛ, xe yɛ aaki si blɔ kuziŋaa kwina ɛ. Lɛ ese linu si gi ete isamii nɛ ɛ, gi aamɔ dɔni Aya kɔ ɛ, evu ɔna akpɛ lipo lɛ amɔ ɔziã nɔ, lɛ osetsase lo su kutseo kúku ye kuye e. Lɛ eze ní Aya yɛ likusigbo le lɛ kaŋawla mɛ ɛ.

³ Mlebù eboa la mɛ gi aga aza a, dɔni banɔ zimizi ba iwla mɛ, kiliɛ gi bɛtrɔ yɛ ahwafi i! atɔ mlakípè tɔ ɔna okído ní mlɔ lipo o.

⁴ Lɛ ese linu si gani mlɔ kuŋwlɛŋwlɛɔ nì eboe zimizi na mɛ kyɛ ɛ, mlaʋína niklɔ gi biabali mlɔ ika lɛ ní kese sukɔ ɔ.

⁵ Lɛ kidze mledze liboe lɛ gi Aya asi mlɔ gi akpɛ mlɔ sise ŋwisi yɛ bebi ba kinɛ na a? Gi lipani si, “Mobi ye, wukíkɔ Ɔkaɛ yɛ kutuheheo ŋwisi kidɔ tsɛ́ɛ kinɛ ɛ, lɛ likípè wo xegi aka aŋu mɛ aki wɔ ɔ.

⁶ Lɛ ese linu si Ɔkaɛ izɛɛka aŋu mɛ ɛki ɔnɔ kakaa gi alɔ ɛ. Lɛ izeehe kutu iiki ɔnɔ kakaa gi azɛ si Yebi i.”

⁷ Mlevu ɔna ní ɔziã mɔmɔ mɛ ŋwisi kuhehe kinɛ ɛ, lɛ ese linu si Aya eehe mlo ŋwisi yɛ bebi kinɛ ɛ, obi woli ɔlɛ gi yɛka óʋihe ye e?

⁸ Xegi baʋíhe kutu iiki mlɔ ɛ, ŋwisi kiliɛ gi bizehe ki ɔnɔ kakaa kinɛ ɛ, kɔ libasɛ si ɔma mɛ bebi mlenu i, kɔ lɔ mlénu yɛ ɔtutɔ lɔ yɛ bebii o.

⁹ Kɔpɔni lɛ ya ɛ, blɔ kisugyaɛ mɛ baka ba gi bizeehe kutu iiki blɔ ɛ, dani kuzɛɛkpɛ kubùbù yo ní ba su i? Lɛ ege loso kutrábubɔ isu ya ɛkpɛ ní Aya blɔ Ɔfuɛfuɛ nɔ mɛ Ɔkaɛ ese e, xe kwiaze ligbã́ nɛ ɛ?

¹⁰ Blɔ kisugyaɛ mɛ baka ba behe kutu iiki blɔ lipoe kpekpemi itɔ ko, ní kiliɛ gi begyodi si kipɛ ɛ onu, pɔ̀ Aya kɔ ɛ izeehe kutu iiki blɔ ki blɔ kupɛ̀pɛ ɛ, atɔ blɔ kyɛ kudra ŋwisi yɛ kiniɛ.

¹¹ Xegi beehe kutu iiki blɔ ɛ, lizɛɛbitɛ ɛki blɔ si kwinu kuyeʋiyeʋi lɛ aní isami i; pɔ̀ lɛ kede e, banama gi bɛga kutuheheo liɔ ya mɛ ɛ, bizɛmɔ si balɛ ni kude gyɔgyɔ aʋa lɛ bizɛmɔ kusuyɔ ni ligbã́zeze gbã.

¹² Lɛ loso e, mlakpɛ mlɔ iwla lɛ gi ipe e, kigagla tɔ mlaki mlɔ aklamasi ana gi la mɛ eesugu i kigagla,

¹³ atɔ mlebu bede gyɔgyɔ ʋa aki mlɔ ikli lɛ, tɔ banama gi bɛgbà fɛ ɛ, bakígleʋe pɔ̀ tɔ biayɔ ɔ.

Mlata Aya kutu

¹⁴ Mlapɛ tɔ mleze ní kusuyɔ nì ɔnɔ kakaa, atɔ mleze ligbã́ dradra fɛ; lɛ ese linu si ɔnɔnɔ ɔ́tratani Ɔkaɛ kumɔ ɔ, xegi ɔ́dra a.

¹⁵ Mledi mumɔ, tɔ ɔnɔnɔ ɔkidzi kede ní Aya yɛ lipomepɛpɛ nɛ su u. Mlɔmɛ ɔnɔnɔ okídzi osegu tiitii gi aakpɛ kunugu mlɔ kusi i, xe lɔ aɖi ye aazizi banɔ glegle e.

¹⁶ Mledi le aʋa si ɔnɔnɔ okídzi ɔhasi nɛ, loo ɔnɔ gi óse Aya a, ŋwisi Esau kinɛ ɛ, gi adà yɛ otsitsizeklɔ kɔkpɛ bidɔŋaŋa kezi tiele loso o.

¹⁷ Lɛ ese linu si mlete si, lɛ kede e, agi apɛ si yizɛ yɛ kaŋasea nì kukrira ɛdɔni yɛka klɔ ɛ, ɔ́kɔ ʋɛ ɔ́ki yɛ ɛ, lɛ ese linu si ɔ́tani kidiliɛ gi abitɛ ɛ, kukyi gi nya apɛ kukriraa nì kube xe e.

¹⁸ Lɛ ese linu si aní Sinai lito le gi biagbɔnɔ ɔ, loo lito gi liisɔ ɔ, kanɔmɛ gi kɛbitɛ yɔɔ ɔ, loo litumu ni liwɔ gagla su mlaba lɛ ɛ.

¹⁹ Mlénu kakuklui ya ole gagla lɔ, loo ole gi ɛɛpani eboe gi banama gi benu la ɛ, bɛki litukpo si bakípani liboeboe asi ba tɔɔ ɔ.

²⁰ Lɛ ese linu si bátani ɔsã nɔ gi akpɛ aki ba ɛ, lɔ onu kulɛ. “Xegi ɔga asasani lito le fɛ ɛ, lilɛ si basa yɛ akla tɔ otse.”

²¹ Kidiliɛ gi amɔ níklɔ ʋa ɛ, kikɔ si Mose apani si: “Lifu liku me gi meesugu u.”

²² Pɔ̀ mlalɛɛ ní Zion lito le su, gi linu Yerusalem gi ɔlɛ ní lifunu ne e, gi onu Aya a, gi ɔlɛ ligbã nɛ ɛ, yɛ ɔma ʋidi no. Mlɛba Aya yɛ baxwɛdzɛ akpe akpe ʋa ba isami nɛ kutsatsa mɛ.

²³ Mlɛba ɛtsani Aya yɛ banima gi balɛ ŋwisi bebi tɔpu ma a, gi ba enyi na bɛŋwlimi ní lifunu ne e. Mlɛba ɛtsani Aya gi yɛ aaxwa litsi ni ɔnɔ kakaa a, mlɛba ɛtsani banama gi ba bede ʋa bɛgyɔ ba ifuɛfuɛ nɛ ɛ, gi Aya aki si ina ɛ.

²⁴ Mlɛba ɛtsani Yesu, gi yɛ onu ɔguvu ye kí kunyanya vuvu yɔ ɔ, ni ika lɛ gi befuflu u, gi ipani eboe gbã ɛ sani Abel ini nɛ ɛ.

²⁵ Mledi mumɔ, tɔ mlakíkyi kede ekpɛ ɔniliɛ gi ɛɛpani ki mlɔ ɛ. Xe banɔ baklɔ, gi bekyi kedea ɛkpɛ ɔniliɛ ɛ, gi ɛɛka aŋu mɛ ɛki ba ní kesea aʋa a, xe bátani kuse ní ɔniliɛ klɔ su i, kitɛ liaze xe kwiase ní yɛ ɔniliɛ ɛ, gi ɛɛka aŋu mɛ ɛki blɔ ɛdɔni lifunu ne su u?

²⁶ Yɛ ole lo esugu kesea ní lipoe lɛ klɔ mɛ ɛ, pɔ̀ abla ɛ, aka aplɛ si, “Matrahwani aní kesea tètè, pɔ̀ lifunu ne kyɛ tule dzɛ ɛ.”

²⁷ Pɔ̀ kuyaa gi apani si “tule dzɛ”, kwibasɛ si bidɔ bɛ klɔ gi abitɛ ɛ, xe biasugu i, aabu ʋe zanɔ, atɔ bidɔ bɛ klɔ gi bítrasugu i, tɔ biaze.

²⁸ Lɛ loso agi mlɛɛzi kaʋaŋaa klɔ ɔ, gi kátrásugu i, mlaki tɔ kudo Aya ɖase, tɔ kusumu Aya gani bede ba ya gi biaku yɛ aŋu i aʋa, kɔpɔni kubùbù ani lifu kusese e.

²⁹ Lɛ ese linu si blɔ Aya ɔlɛ ŋwisi kifu, gi kizɛɛkani bidɔ kinɛ ɛ.