Filipi 1 - KUNYANYA VUVU YƆ

¹ Mɛ Paulo ni Timoteo gi kunu Kristo Yesu yɛ banɔsumu ba ɛ, blɔ kwiiŋwlimi keplekpaa lia ya; ɛki Aya yɛ banima pɔ́ gi bɛkpɛ likpɔ ni Kristo Yesu u, kɔpɔni baʋaziŋa ba baka ba ani ɔha lɔ banɔpɔnɔ ba gi bali ní Filipi i;

² Tɔ Aya blɔ Ɔka ni Ɔkaɛ Yesu Kristo baki mlɔ lipomepɛpɛ ni kusuyɔ.

Paulo axwa lɛ edo Aya ɖase e

³ Mizeedo Aya ɖase ní mlɔ litukpo lipoe kakaa ɛ lɛ gi maplɛ aŋu ní mlɔ aʋa ɛ;

⁴ lɛ lipoe kakaa gi maxwa Aya ní mlɔ petee litukpo e, mizɛɛbitɛ lɛ ni isami,

⁵ kɔkpɛ kiliɛ gi mlɛpɔni mɛ gi mamani mlɔ Liboe Gbã nɛ dɔni liwe tɔpu nɛ aʋa gakɔna ni abla ɛ.

⁶ Lɛ maka lɛ aʋa si Aya a, gi yɛ ekpese axwɛ gbã la ya ní mlɔ mɛ ɛ, aatrɛ ní lɛ aʋa kɔzɛna ni la ɔgù kɔ ní liwe lɛ gi Kristo Yesu aadzi ba aʋa a.

⁷ Lɛ loso lipɛ ɛki mɛ si mizebù mlɔ su u, lɛ ese linu si mlakpasi ní mɛ ɔna nɔ mɛ ɛ. Lɛ mlɔ petee mlakpasi ní Aya yɛ lipomepɛpɛ nɛ mɛ ni mɛ ɛ, xegi ligba malɛ ɛ, loo gi malɛ ní mɛ ɔtutɔ mɛ isuwla mɛ ɛ, xe meebu liboe gbã nɛ onu i.

⁸ Aya aaŋa katsalia ɔki mɛ si, lilɛ lɛ mɛ, xe mapani si meegyo mlɔ petee edi i, nì kulɔlɔ ŋwisi kiliɛ gi Yesu Kristo alɔ mlɔ kinɛ ɛ.

⁹ Maxwa Aya si mlɔ kunɔlɔɔ kwiazetsi pɔnɔ, tɔ mlate liboe ni tɔ mlaanu eboe ese mɔmɔmɔ,

¹⁰ atɔ mlaakya kidiliɛ gi kinu ki gbãɛ ɛ, lɛ mlɔ su adra a, lɛ lipɔŋaŋa ɛtɔtɔ lítraze ní mlɔ su kɔzɛna ni liwe lɛ gi Kristo aadzi ba ɛ.

¹¹ Tɔ mlɔ ligbã́ nɛ mɛ bede ʋa biagyɔ ŋwisi kiliɛ gi Yesu Kristo ko aatani kukɔ kinɛ ɛ, ki Aya yɛ kusudraa ni yɛ kukpɔ̀kpɔ̀.

Kristo me kuzeze

¹² Mɛ benemi ba, mapɛ si mlete si, eboa la gi ɛba mɛ aʋa ɛ, la ɛpɔni Liboe Gbã nɛ lɛ ɔtɔ kutrɛtrɛ.

¹³ gani lɛ mɛ ɛ, kekusipea bepepe ba pɔ́ ani banɔ gɔgɔ ba gi bali ní ya ɛ, betè si malɛ ligba lɛ ese linu si menu Kristo yɛ ɔnɔsumu u.

¹⁴ Lɛ mɛ ligba lɛ kuzezeo kwiki benemi glegle ba ɔna ní Ɔkaɛ mɛ, lɛ bɛɛpani Liboe Gbã nɛ nì ɔna lifumose e lipoe kakaa.

¹⁵ Lilɛ ní lɛ mɛ si banɔatɔ bɛpani Kristo su kɔkpɛ kaŋuza ni eboe hehe, pɔ̀ banɔatɔ fɛ ɛ, bɛɛpani nì ɔna gbã.

¹⁶ Banama gi bɛɛpani nì ɔna gbã ɛ, bɛbitɛ nite nì kulɔlɔ, lɛ ese linu si betè si Aya aki mɛ axwɛ si miŋwlɛ liboe gbã nɛ litukpo.

¹⁷ Ba tɔpu ba ɛ, baʋíbu Kristo su ni ɔna gbã a, pɔ̀ dɔni ba ɔtutɔ ba bidɔpɛ́pɛ mɛ ɛ; begyo le edi si biamani kedu yɔyɔ ní mɛ su tɔ mimɔ kinie sanɔ gi malɛ ligba lɛ ɛ.

¹⁸ Pɔ̀ líziã! Isami iku me kɔkpɛ gi bɛɛsɔli Kristo ní kude kakaa onu i, xegi gani kude nyani nyani onu loo gani kude gbã onu kyɛ ɛ, isami iaze kume.

¹⁹ lɛ ese linu si mete si gani mlɔ Aya kuxwaxwa mɛ ɛ, ani kupɔnɔɔ gi kwidɔ Aya yɛ Ɔfuɛfuɛ nɔ klɔ gani Yesu Kristo aʋa ɛ, liboe lɛ gi liba mɛ aʋa ɛ, liadzi ɔwlamɔmɔ ki mɛ.

²⁰ Mapɛ koŋ lɛ meedi kudeonu si kuye kútraku me e, lɛ ɔna aaze mɛ lipo si gani mɛ aʋa ɛ, banima biakpɔ Kristo yɛ linyi ne ní mɛ mɛ̀, xegi metse loo malɛ ligbã a.

²¹ Lɛ ege kinu ligbã́ nɛ ɛ? Ki mɛ xunyɔ ɛ, tɔ mize ligbã́ ɛ, binu Kristo pɔ̀ xe metse e, binu libibubu iki mɛ ɛ.

²² Kɔ xe malɛ ligbã́ ɛ, liaki si maawa axwɛ gbã, pɔ̀ kɔ liwoli maavu kɔ̀ ɛ? Méte.

²³ Malɛ ní begyodi tiaʋa kusi, Mapɛ vevee si misɛ ní kelea lia mɛ tɔ mizeeze ni Kristo, gi lipɛ sanɔ kura a;

²⁴ pɔ̀ kɔkpɛ mlɔ loso e, liziã si mize ligba a.

²⁵ Maka lɛ aʋa lɛ mete si maaze. Maaze ni mlɔ petee, tɔ mipɔni mlɔ ki ɔtɔ kutrɛtrɛ tɔ mlaamɔ isami ní kuziŋa mɛ,

²⁶ atɔ xe maba mlɔ klɔ dzɛ ɛ, mlamɔ isami glegle ní Yesu Kristo me kɔkpɛ mɛ loso.

²⁷ Abla ɛ liveve le linu si mlɔ ligbã́zeze ne lize ŋwisi kiliɛ gi Kristo su Liboe Gbã nɛ lipɛ ɛ, atɔ xe maatani mlɔ kumɔ loo xe máma a, xe kinu menu mlɔ onu kyɛ ɛ, maate si mlalɛɛ mumɔ ní Ɔfuɛfuɛ tole me, gi mlɛŋwlɛ ŋwisi ɔnɔ tole ki kuziŋaa ni Liboe Gbã nɛ ɛ,

²⁸ mlakíse mlɔ ahwafianɛ ma. Ɔna oze ní mlɔ lipo lipoe kakaa, lɛ ya liabasɛ ba si Aya aakyrɔ ba, pɔ̀ mlɔ kɔɔ Aya aabu mlo, lɛ ese linu si Aya yɛ atráki mlɔ kaʋaŋaa a.

²⁹ Lɛ ese linu si bɛki mlɔ kudeonu ní Kristo linyi ne me aní si mlazi yɛ aʋa aŋa tètè ko, pɔ̀ tɔ mlamɔ ɔzia nɔ aki yɛ ɛ.

³⁰ agi mlɔkyɛ mlɛta kigũ yɛ ɛ, kigũi liɛ gi kɛ mlɛmɔ si mazɛɛta a, xe abla kyɛ ɛ, mleenu si mɛɛta ɛ.