Efeso 5 - KUNYANYA VUVU YƆ

Mleze ligba ɛ nɛ gi Aya apɛ ɛ

¹ Agi mlenu Aya yɛ bebi ba gi alɔ koŋ i, mlekeni edi tɔ mlakpasi yɛ ligbãzeze ne.

² Mlaki kulɔlɔ kugbani mlɔ ligbã nɛ, kiliɛ gi Kristo alɔ blɔ ɔ, xe etse ni blɔ litukpo e. Akɔ yɛ ligbã́ nɛ aki Aya ŋwisi bidɔkɔkɔ ni bidɔ pɔʋi pɔʋi flafla gi biku Aya aŋu kinɛ ɛ.

³ Agi mlenu Aya yɛ banɔ ɛ, líma si mlapani ní adzɛ ni enyimeboe loo anyaniboe atɔtɔ loo kimbikyikyi itɔtɔ su ní mlɔ kusi. Lɛ ese linu si eboa la ya elu égyeni Aya yɛ banɔ dradra ba a.

⁴ Lígyeno si mlazɛɛpani eyekuboe loo anyaniboe loo anukpaboe loo mlazɛɛkpɛ atsɛ́ɛ dovo. Boŋu i, mledo Aya ɖase e.

⁵ Lilɛ si mlete si banama gi benu bahasi nɛ, loo banama mɛ gi kumɔdramɔdra kulɛ loo banama gi bizɛɛza kimbi i, batrámɔ ɔŋakɔ ní Kristo ni Aya yɛ Kukusi yo me e. Ɔniliɛ gi izɛɛza kimbi i, onu ɔbusumu.

⁶ Mlakíki ɔnɔnɔ omeni mlo ni asasaboe; lɛ ese linu si ɔkpɛ la ya elu loso Aya kusuyeʋio kwiaba banama gi baʋínu kutu iki yɛ ɛ aʋa.

⁷ Lɛ loso e mlakíkpɛ ɔha ni banɔaklɔ ba elu u.

⁸ Kutɔpu yɔ ɛ, mlɔ tutɔ fɛ mleze ní litumu me, pɔ̀ gi mledzi ɔkaɛ yɛ banɛ ɛ, mlalɛ ní kuklekle me. Lɛ loso mleze ligbã́ ŋwisi banɔ gi benu kuklekle me banɔ ɔ,

⁹ lɛ ese linu si banama gi balɛ ni kuklekle me e, ba esebi la enu agbã̀, ba bede ʋa bizɛɛgyɔ, lɛ bizeedo anukwarɛɛ.

¹⁰ Banama gi balɛ ní kuklekle me e, bizɛɛkpasi kidiliɛ gi kizeeku Ɔkaɛ aŋu i.

¹¹ Mlakíkpɛ ɔha ni litumu ne me bidɔ mɛ ɛ, gi banima bizɛɛbitɛ ɛ. Boŋu i, mlebu ʋe edono ní kuklekleo onu.

¹² Linu liyeyeboe si tɔ bapani ní kikpokpo me kiboebitɛ liɛ gi banama a, gi baʋínu kutu i, bizɛɛbitɛ su.

¹³ Lɛ xe bɛmani kidɔ kakaa ní kuklekleo onu i, kɔ ba kizezee me ɔtutɔ lɔ kiŋwui.

¹⁴ Lɛ ese linu si kuklekle kuzɛɛkɔ si kidɔ kakaa gi bebu ibasɛ ɛ, kizɛŋwi mɔmɔɔmɔ. Lɛ loso bɛpani si, “Nyime, wɔ liɛ gi wɔɛdɔ sra sɛ ɛ, tɔ yɔ dɔni kutse me, atɔ Kristo aakle bali wɔ aʋa.”

¹⁵ Lɛ loso mledi mumɔ kiliɛ gi mlalɛ ligbã́ nɛ ɛ. Mlakíze ŋwisi banɔ gi béte liboe e, boŋu i ŋwisi banɔ gi bete liboe e.

¹⁶ Mlawa lipoe kakaa ɛlɛ gi mlɛmɔ ɛ su axwɛ, lɛ ese linu si lipoe zimizi lɛ ya.

¹⁷ Mlakíze kunukpaʋi i, boŋu mlekeni edi tɔ mlete kidiliɛ gi kinu Ɔkaɛ yɛ kupɛpɛɔ ɛ.

¹⁸ Mlakíŋwɛ kuda gi kwizizi mlo o; boŋu i, mlaki tɔ Aya yɛ Ɔfuɛfuɛ nɔ oze ní mlɔ aʋa.

¹⁹ Mlaka sika sɛ ni mlɔ ahanuglɔ ba gani isɔlidzi kukpɔ̀kpɔɔ̀ idzi nɛ ani Ɔfuɛfuɛ nɔ mɛ idzizaza mɛ; mlaza idzi isɔlidzi aki Ɔkaɛ ni kukpɔ̀kpɔɔ̀ dɔni mlɔ ina nɛ mɛ.

²⁰ Ní blɔ Ɔkaɛ Yesu Kristo linyi ne me e, mledo Aya blɔ Ɔkaɛ ɖase lipoe kakaa ní kidɔ kakaa mɛ.

Paulo agba benyime ba ni ba bedzɛ ba

²¹ Mlakpɛ litukpo kese aki mlɔ ahanuglɔ ba ɔkpɛ gi mleese Kristo loso o.

²² Badzɛ ba, mlepleni isu ya ki mlɔ benye ba ŋwisi kiliɛ gi mlepleni isu ya aki Ɔkaɛ kinɛ ɛ.

²³ Lɛ ese linu si onyimee yɛ onu ɔdzɛ yɛ litukpo le, ŋwisi kiliɛ gi Kristo onu litukpo ní ɔsɔli ha lɔ onu kinɛ ɛ. Lɛ Kristo ɔtutɔ yɛ onu ɔsɔli ha lɔ gi onu yɛ kisugyaɛ lɔ litukpo le, lɛ yɛ ebu ɔsɔli ha lɔ ɔ.

²⁴ Lɛ loso bedze ba, lilɛ si mlakpɛ litukpo ni mlɔ benye ba ese ní kidɔ kakaa mɛ, ŋwisi kiliɛ gi ɔsɔli ha lɔ eepleni isu ya ɛki Kristo kinɛ ɛ.

²⁵ Benye ba a, mlalɔ mlɔ bedze ba kiliɛ gi Kristo alɔ ɔsɔli ha lɔ ɔ, xe akɔ yɛ ligbã́ nɛ akyɛ ɛ, gi etse ní ɔha lɔ litukpo e.

²⁶ Abitɛ lɛ nite tɔ yidra ɔsɔli ha lɔ su ɛki Aya gani yɛ liboe le me, adra lɔ su ŋwisi kiliɛ gi bizeewloni ɔnɔ ni kuni i,

²⁷ tɔ yidzini ɔsɔli ha lɔ ɛki isu ya ní lɔ kupedi yo me e, ɛdra lɛ kesetata atɔtɔ káma lɔ su u, gi liŋwi itɔtɔ líma lɔ su u, lɛ lɔ ɔkɔkɔ kyɛ ɔ́sunya a.

²⁸ Nite ke lilɛ si benyime ba balɔ ba bedze ba kiliɛ gi bɛlɔ ba tutɔ ba isu ya a. Onyime gi alɔ yedze e, alɔ yɛ kisugya ɛ.

²⁹ Ɔnɔnɔ ɔʋítrɔ yɛ ɔtutɔ yɛ kisugyaɛ ofu u, boŋu i izɛɛgani yɛ isu ya lɛ izeedi yɛ kisugyaɛ aʋa, kiliɛ gi Kristo izɛɛbitɛ ki ɔsɔli ha lɔ ɛ;

³⁰ lɛ ese linu si kunu yɛ isu ya bidɔ ɔ.

³¹ Kiliɛ gi bɛŋwlimi kpɛ ní Aya yɛ liboe le keplekpaa mɛ si, “Lɛ ya loso, onyime aayurɔ yɛka ni yene lɛ aakpɛ likpɔ ni yedze e, lɛ ba tiaʋa biadzi kisugya tile.”

³² Liboe kpokpo dzudzu lilɛ ní liboe lɛ ya mɛ, gi mɛɛpani i, lɛ ese si linu Kristo ni ɔsɔli ha lɔ su liboe.

³³ Pɔ̀, lihali mlɔ fɛ; onyime kakaa ɔlɔ yedze ŋwisi yɛ ɔtutɔ yɛ isu ya kinɛ ɛ, lɛ ɔdzɛ kakaa ɔkpɛ kubùbù ní yenye su.