Efeso 4 - KUNYANYA VUVU YƆ

Baʋaziŋa ba Likpɔkpɛkpɛ ní Yesu me

¹ Lɛ loso mɛ gi makpasi ligba lɛ ɛ, kɔkpɛ gi meesumu Ɔkaɛ ɛ; mɛɛkpɛ lɛ mlɔ mɛ si mleze ligbã́ gi lisrɔnɔ lɛ klɔ gi Aya atrɔ aplɛ ɛ, xe axwa mlɔ ɛ.

² Mlepleni isu ya lipoe kakaa, mlayɔ ni ɔna mɛ, tɔ mlaplɛ litɔ kese. Mlabasɛ mlɔ kulɔlɔɔ, lɛ mlakíyeʋi isu u, xegi banɔdzedze ba bɛta kese e.

³ Mlekeni edi tɔ likpɔkpɛkpɛ lɛ lize ní mlɔ kusi kiliɛ gi Aya yɛ Ɔfuɛfuɛ nɔ ɛki kusuyɔ liɔ ɔ, gi kwinya mlɔ ɛkpɛ likpɔ ɛ.

⁴ Kisugya tile ni Ɔfuɛfuɛ tole bilɛ, ŋwisi kiliɛ gi kudeonudidi tule e, gi kɔ Aya axwa mlɔ akɔ kulɛ ɛ.

⁵ Ɔkaɛ tole ɔlɛ, kuziŋa tule, kunikpɛkpɛ tule;

⁶ Aya tole gi onu Ɔka ki blɔ petee yɛ ɔlɛ ɛ, lɛ yɛ onu Ɔkaɛ, gi ɛɛwa axwɛ na gani blɔ petee me e, xe ɔlɛ ní blɔ mɛ ɛ.

⁷ Pɔ̀ ki blɔ mɛ ɔkakaa ɛ, bɛki blɔ lipomepɛpɛ ŋwisi kiliɛ gi Kristo alɛ bɛ ɛ.

⁸ Kiliɛ gi bɛŋwlimi kpɛ Aya yɛ liboe le me si, “Agi atrɛ ní lifunu ne kaʋa ke e, atsini banɔ vuvu ba kpaŋu kɔpɔni isu ya, lɛ aki banima bidɔ kɔkɔ ʋɛ ɛ.”

⁹ Abla ɛ “emu atrɛ kaʋaa,” lɛ ese linu si kitɛ ɛ? Lɛ ese linu si kutɔpu yɔ ɛ, eple atrɛ ní kesea odzudzu klɔ ké.

¹⁰ Lɛ loso e, ɔniliɛ klɔ gi yɛ eple aba ɛ, yɛ ke emu atrɛ ní ayɛɛ mɛ lɛ adɔ lifunu ne aza a, tɔ yɛ kaʋaŋaa kana ní lifunu ne, ni kesea aʋa ani kesea ese e.

¹¹ Yɛ aki banima bidɔkɔkɔ ʋɛ, yɛ edu banɔatɔ tɔ beze banɔkpɛkpɛ, batɔ tɔ beze beboedoplɛ, batɔ tɔ beze banama gi bizɛɛpani liboe gbã nɛ ɛklanɔ ɔ, batɔ tɔ bedi baʋaziŋa ba ni Liboe Gbã nɛ badɔbasɛ ba aʋa.

¹² Abitɛ lɛ nite tɔ yikɔ ɛlulɔ Aya yɛ banima ɛki Aya kusumu yo, tɔ Kristo yɛ baʋaziŋa ba gi benu Kristo yɛ kisugyaɛ biatsi tɔ biamɔ kigagla a.

¹³ Kɔzɛna ni lipoe lɛ gi blɔ ɔ pɔ́ kwiadzi kidɔ tile ní blɔ kuziŋaa ni blɔ kuboeteo ní Aya Yebi ye me e; lɛ kwiatsi gi kwiazɛ Kristo yɛ kizezee me petee e.

¹⁴ Lɛ loso e, kutraze banuvɔ tɔ ɔ. Kútraze ŋwisi keniaʋa ohu u, gi kuni yo akpɔ la loo asia na kudɔbasɛ liwɔ gagla lɛ, liazefu klanɔ ɔ, lɛ banama gi bizɛbasɛ asia na ɛ batrátani blɔ kumeno o, xe kwiazi asia na aʋa ŋa tɔ ɔ.

¹⁵ Boŋu i, gani anukwarɛɛ kupaniɔ mɛ ɛ, ní kulɔlɔ Ɔfuɛfuɛ nɔ mɛ ɛ, lilɛ si kwiatsi ní kapɛ kakaa mɛ kí Kristo o, gi yɛ onu litukpo le e.

¹⁶ Dɔni yɛ kɔ ɛ, isu ya kapɛ kakaa kɛkpɛ likpɔ, lɛ ika lɛ ivu kapɛ kakaa ɛkpɛ likpɔ ní ka itsaklɔ. Loso xe kapɛ kakaa kɛwa ka axwɛ na a, kiliɛ gi liziã ɛ, ɔnɔse lo izɛmɔ kigaglaɛ gani kulɔlɔ mɛ ɛ.

Ligbã́zeze ŋwisi Aya yɛ bebi kinɛ ɛ

¹⁷ Lɛ loso mɛɛsi mlɔ ní Aya linyi ne me e, lɛ mɛɛtrɔ likla lɛ aʋa ɛki mlɔ si, mledi mumɔ tɔ mlakítrɛ ní lɛ aʋa eze ligbã́ ŋwisi banama gi béte Aya a, xe ba begyodi ʋa bénu kididɔ ɔ,

¹⁸ lɛ ba kuboesenu yo kwidɔ litumu u. Ɔŋakɔ ɔma kí ba ní ligbã́ɛ nɛ gi Aya izɛɛkɔ mɛ ɛ, lɛ ese linu si, ba pɔ́ béte liboe, lɛ ba batu ʋa mɛ bali gagla a.

¹⁹ Béte kuye tɔ ɔ; lɛ bɛyurɔ isu ya ɛki eboe zimizi ni anyaniboe kakaa ni kupɛpɛ si bɛɛbitɛ sani nite e.

²⁰ Aní lɛ mlɛkpasi ní Kristo su u!

²¹ Agi mlenu yɛ onu tututu u, xe mlekuni yɛ kude e, bɛbasɛ mlɔ anukwarɛɛ liɛ gi ɔlɛ ní Yesu me e.

²² Lɛ loso e, bɛbasɛ mlɔ si mlayurɔ mlɔ ligbã́ koko le gi liki si mleeze kiliɛ ɛ, gi mlɛpɛ ɛ, ligbã́ koko le gi lɛ liizizi kɔkpɛ lɛ kupɛpɛ zimizi yo o, gi kwimeni mlo o, xe kwiki si mlɛlila ɛ.

²³ Mlaki tɔ mlɔ ina nɛ ni mlɔ begyodi ʋa bidzi bidɔ vuvũ,

²⁴ atɔ mlakɔ isu vuvũ akpɛ ŋwisi liwu kinɛ ɛ, gi lɛ bɛbitɛ ní Aya yɛ kilɛlɛɛ mɛ ɛ, xe libu isu ya ɛbasɛ ní anukwarɛɛ ligbã́ nɛ mɛ ɛ, gi ligyɔ ɔ xe lidra ɛ.

²⁵ Mlakísɛ asia tɔ ɔ! Ɔnɔ kakaa odo anukwarɛɛ ki yɛ ɔhanuglɔ ɛ, lɛ ese linu si blɔ petee kunu kupɛ kí kisugya tile e.

²⁶ Xe mlɛmɔ kusuyeʋi i, mlakíki tɔ kugbani mlɔ kpɛ eboe zimizi me e, lɛ mlakíki tɔ liwo le liku ní mlɔ kusuyeʋio aʋa a.

²⁷ Lɛ mlakíki ozimizi ye kudeonu u.

²⁸ Banama gi bizezuru i, bamɔni kuzuru tɔ bawa axwɛ tɔ beze ligbã́ gbã aki isu, tɔ batani bazianete ba kupɔnɔ ɔ.

²⁹ Mlakíki eboe zimizi atɔtɔ edo ní mlɔ onu, pɔ̀ eboe gbã ko, la klɔ gi aaki kupɔnɔ ɛ, tɔ eboa la gi mlaapani i, aabitɛ eboe gbã aki banama gi bɛɛta mlɔ kutu i.

³⁰ Lɛ mlakíkpɛ Aya yɛ Ɔfuɛfuɛ nɔ ní asigaga mɛ ɛ; gi lɔ Aya ɔkɔ akpɛ mlɔ gyesi ye ki liwe lɛ gi aabu mlo e.

³¹ Mlebú kuyeʋiyeʋi kakaa, kusuyeʋi gagla, avitɛ, banɔ su kuzizizizi ani liboe zimizi kakaa azanɔ.

³² Boŋu i mlapɛ lipo me tɔ mledi mlɔ ahanuglɔ ba asigaga, tɔ mlakɔ eboe akyɛ mlɔ ahanuglɔ ba kiliɛ gi Aya akɔ akyɛ mlɔ ní Kristo me e.