Юнус 3 - Аллагьасул Калима

Юнус Ниневиялде вачӀин

¹ Нахъеги БетӀергьанасул калам бачӀана Юнусихъе:

² «Нухде вахъа! КӀудияб шагьар Ниневиялде а. Гьелъул жамагӀаталда лъазабе Дица дуе амру гьабураб жо».

³ Юнус нухде вахъана – БетӀергьанасул амруялда рекъон Ниневиялде ана гьев. Ниневия букӀана кӀудияб шагьар – лъабго къо къваригӀунаан рилълъун унаго гьелъул рагӀа-ракьанде щвезе.

⁴ Юнусица байбихьана цо къодул манзил нахъа тун гьеб шагьар къотӀун хьвадизе ва ахӀун лъазабулеб букӀана: «КӀикъого къоялдасан Ниневия тӀубан тӀатӀала ккезе буго!» – ян.

⁵ Ва божана Ниневиялъул жамагӀат гьанже Аллагьасда. Кинацаго кӀал кквеян лъазабуна ва гьитӀинав-кӀудияв батӀалъи гьечӀого, киназго тӀад ретӀана хӀебет.

⁶ Гьеб хабар Ниневиялъул парччахӀасухъе щведал, гьев парччахӀлъиялъул тахидаса гъоркье рещтӀана, тӀаса рехун жиндирго ретӀелгун, тӀад ретӀана хӀебет ва рохъдолъ гӀодов чӀана.

⁷ Хадуб гьес буюрухъ кьуна, парччахӀасул ва гьесул вазирзабазул цӀаралдасан, киса-кибего Ниневиялда гьадинаб амру лъазабеян: «Я гӀадамаз, я боцӀуца, чӀахӀиял-гӀисинал батӀалъи гьечӀого, кванида хъваге, боцӀуде унге, лъин гьекъоге.

⁸ Биччанте гӀадамазги хӀайваназги тӀад хӀебетги ретӀун, кӀваралъ жигар бахъун, Аллагьасде гьардезе. Жив-жив чияс рехун те хъублъи-квешлъи ва зулму-хӀал гьаби.

⁹ Щиб лъалеб, Аллагьасул ццин нахъбуссине бегьула, цинги Досул амруги хисила ва нилъги чӀаго хутӀила».

¹⁰ Гьезул ишаздасан Аллагьасда бихьана гьез квешлъиялде мугъ рехун букӀин. Аллагь гьездагурхӀана, Жинца гьабизехъин букӀараб тамихӀалъе хӀукму Гьес хисана – гьезие хӀадурун букӀараб балагь-гӀакъуба нахъе къотӀана, доб балагь гьезда тӀаде биччачӀо.