Юнус 2 - Аллагьасул Калима

Юнусил дугӀа

¹ БетӀергьанас кӀудияб ччугӀа битӀана Юнус къулчӀизе. Лъабго къо ва лъабго сордо бана Юнусица гьеб ччугӀил чохьониб.

² ЧчугӀил чохьониса Юнусица жиндирго БетӀергьан Аллагьасде гьадинаб гьари-дугӀа гьабуна:

³ «Балагьалде ккедал дица БетӀергьанасде ахӀи бана, ва Дуца дие жаваб кьуна! Жагьандаманалъул кӀкӀалахъа ахӀдана дун, ва Дуда дир гьаракь рагӀана!

⁴ БецӀаб гвандиниве, ралъдал гъварилъуде рехана Дуца дун – дун гьалагал иххаз восун унев вуго; Дур тӀолалго лъинал ва гӀасиял карачелал дида тӀасан чвахана.

⁵ Цинги дица пикру гьабуна: „Дун БетӀергьанас Жиндаго цевеса тӀуван нахъе къотӀана“, – ян. Амма гуребха, дида жеги бихьилеб Дур Мукъадасаб Рукъ!

⁶ Лъин дир щокъробе щвана, сверухъ – бецӀаб кӀкӀал буго, дир нодоги ралъдал хъархъица бацун буго.

⁷ Дун ракьул лахӀтуялъуве, мугӀрузул кьалбазукье ккана. Дунялалъул каву абадиялъего рахана дида хадуб! Амма, дир БетӀергьан Аллагь, Дуца дун гъваридаб лахӀтуялъуса тӀаде ворхана!

⁸ ЗагӀиплъун, тӀуван тату хун ккедал дида БетӀергьан ракӀалде щвана, ва дир дугӀа Духъе, Дур Мукъадасаб Рокъобе гӀунтӀана.

⁹ Гьереси-аллагьзабазул рахъ ккураз Дуе рекӀкӀ гьабулеб буго.

¹⁰ Дицайин абуни Дуе гьабила рецц-бакъалъул къурбан ва назруги тӀубазабила. БетӀергьанасдасан буго хвасарлъи!»

¹¹ БетӀергьанасул амруялдалъун ччугӀица Юнус къватӀиве, ралъдал рагӀалде лагӀана.