Иоанние Аллагьас загьир гьарурал ишал 8 - Аллагьасул Калима

8 бетӀер Анкьабилеб мугьру

¹ КьагӀрица анкьабилеб мугьру тӀезабуна. Бащдаб сагӀат гӀанасеб заманалда зодиб сихӀкъотӀи лъугьана.

² Дида вихьана Аллагьасда цеве чӀарав анкьго малаик. Гьезул щивасухъе пуйзе кьун букӀана цо-цо ссур.

³ ВачӀун къурбан хъолеб бакӀалда цеве кьеккен гьабизе, меседил щурунги хъатикь, ккун эхетана цоги малаик. ГӀемераб махӀгьуинаб нах кьун букӀана гьесухъе, – кинабго Аллагьасул халкъалъ дугӀаги гьабун, тахида цебе къурбан тӀад хъолеб меседил къаниде тӀун, кьеккен гьабизе.

⁴ Малаикас бачӀараб гьеб нахул лъугьараб кӀкӀуй, Аллагьасул халкъалъул дугӀадул гьаракьгун цадахъ, гьев разилъизе зодибе ана.

⁵ Кьеккен гьабулеб щурунги кодобе босун, къурбан тӀад хъолеб доб къанидаса цӀадул цӀезабуна малаикас гьеб, цинги ракьалде хьвагӀун балагьизабуна. Гьебмехалда зобал гъугъадана, гьаркьал рахъана, пири пирхана ва ракь багъарана.

Анлъго малаикас ссуралъубе пула

⁶ Анкьго ссур кодоб бугев анкьавго малаик ссуралъубе пуйзе къачӀан чӀана.

⁷ Ва тӀоцевесев малаикас ссуралъубе пуна, ва горо-цӀер бана, ва бигун жубараб цӀаги бачӀана ракьалде. Ракьалъул лъабил бутӀа бухӀана гьелъ, гъутӀбузул лъабил бутӀаги бухӀана ва кинабго гӀурччинхерги бухӀана.

⁸ Ва кӀиабилев малаикас ссуралъубе пуна, ва цӀа рекӀараб кӀудияб мегӀер гӀадаб жо ралъдалъе бортун бачӀана. Ва ралъдал лъабил бутӀа биялде сверана.

⁹ Ва ралъдал рухӀчӀаголъабазул лъабил бутӀа хвана, гумузул лъабил бутӀаги щущан ана.

¹⁰ Ва лъабабилев малаикас ссуралъубе пуна, ва зодисан бортун бачӀана цӀа рекӀараб сунтур гӀадинаб кӀудияб цӀва. Гьеб тӀаде бортана гӀоразул лъабил бутӀаялде ва лъадал иццаздеги.

¹¹ Гьеб цӀваялда цӀар букӀана «КьогӀаб хер». Ва лъадал лъабил бутӀа гьеб хер гӀадин кьогӀлъана, ва кьогӀаб лъим гьекъон гӀемерав чи хвана.

¹² Ва ункъабилев малаикас ссуралъубе пуна – гьаргьадулаго ссун ана бакъул лъабил бутӀа, ва моцӀрол лъабил бутӀа, ва цӀвабзазул лъабил бутӀа – кинабго канлъул лъабил бутӀа. Къоялъул лъабил бутӀа бецӀлъун хутӀана, гьединго сардил лъабил бутӀаги бецӀлъун хутӀана.

¹³ Дун валагьана, ва дида рагӀана зоб бакьулъан боржун унеб цо цӀудуца кутакаб гьаракьалдалъун гьадин ахӀулеб: «Вай, вай, вай, жеги ссуралъубе пуйчӀев лъабго малаикас ссуралъубе пураб мехалда, гьаб ракьалда ругезде бачӀине бугеб балагьха!»