Иоанние Аллагьас загьир гьарурал ишал 7 - Аллагьасул Калима

7 бетӀер Нусиялда кӀикъоялда ункъазарго чи

¹ Гьелдаса хадуб дида вихьана дуниялалъул ункъабго бокӀнилъ чӀарав ункъо малаик. Я ракьалде, я ралъдаде, яги цониги гъветӀ-хералде пуйзе биччачӀого, гьез ккун чӀезабун букӀана дуниялалъул ункъо гьури.

² Цоги малаик вихьана дида бакъбаккул рахъалдасан ваккун вачӀунев. ХӀакъав Аллагьасул мугьру букӀана гьесухъ. Ракьалъеги ралъдаеги зарал гьабизе изну кьурав ункъо малаикасде кутакаб гьаракьалдалъун ахӀана гьес:

³ «Нижеца нилъер Аллагьасул лагъзадерил надалда мугьру чӀвазегӀан, я ракьалъе, я ралъдае, яги гъветӀ-хералъе зарал гьабуге нужеца».

⁴ Дида рагӀана Исраилил киналго наслабаздасан нусиялда кӀикъоялда ункъазарго чиясда мугьру чӀван бугин абулеб:

⁵ Ягьудал наслуялдаса мугьру чӀваразул анцӀила кӀиазарго чи вуго, Рубенил наслуялдасаги – анцӀила кӀиазарго чи, Гадил наслуялдасаги – анцӀила кӀиазарго чи,

⁶ Ашерил наслуялдасаги – анцӀила кӀиазарго чи, Нафталил наслуялдасаги – анцӀила кӀиазарго чи, Менашил наслуялдасаги – анцӀила кӀиазарго чи,

⁷ ШимгӀонил наслуялдасаги – анцӀила кӀиазарго чи, Левийил наслуялдасаги – анцӀила кӀиазарго чи, Иссахарил наслуялдасаги – анцӀила кӀиазарго чи,

⁸ Зебулонил наслуялдасаги – анцӀила кӀиазарго чи, Юсупил наслуялдасаги – анцӀила кӀиазарго чи ва Буняминил наслуялдасаги анцӀила кӀиазарго чи вуго мугьру чӀваразда гьоркьов.

ХъахӀал гӀабаби ретӀарал гӀадамазул руккел

⁹ Нахъеги валагьана дун. Гьале щибаб миллаталъул, наслуялъул, халкъалъул ва мацӀалъул гӀадамаздасан лъугьараб, лъиданиги рикӀкӀун хӀалкӀолареб руккел чӀун буго тахида ва КьагӀрида цебе. Киназго ретӀун руго хъахӀал гӀабаби ва хъатикь ккун руго чамасдакил гъотӀол гӀаркьалаби.

¹⁰ Кутакаб гьаракьалдалъун ахӀулеб буго гьез: «Тахида гӀодов чӀарав нижер Аллагьасухъ ва КьагӀрихъ буго хвасарлъи!»

¹¹ Киналго малаикзаби чӀун рукӀана тахалдаги, хӀакимзабаздаги ва доб ункъабго рухӀчӀаголъиялдаги сверухъ. Тахалда цере кӀалагъоркье речӀчӀун, гьез Аллагьасе сужда гьабулеб букӀана.

¹² Абулебги букӀана гьез: «Амин! Нижер Аллагьасухъ буго абадул абадиялъ баркатги, реццги, гӀакъиллъиги, кӀодолъиги, къадру-къиматги, къудратги, хӀалкӀолъиги! Амин!»

¹³ Дидехун вуссун цо хӀакимас гьикъана: «Гьал хъахӀал гӀабаби ретӀарал гӀадамал щал кколел ва киса рачӀарал чагӀи гьел?»

¹⁴ Дица гьесда абуна: «Дуда лъалаха, бетӀерчӀахъад!» – ан. Гьес дида абуна: «Гьел рачӀун руго кӀудияб гӀазаб-гӀакъубаялдаса. КьагӀрил биялъ чурун хадуб хъахӀлъана гьезул гӀабаби.

¹⁵ Гьединлъидалин гьел Аллагьасул тахалда цере ругел ва къасиги-къадги гьесул кӀалгӀаялъуб гьесие тӀагӀат-гӀибадатги гьабулеб бугеб. Тахида чӀарас жиндирго чодрокье рачина гьел.

¹⁶ Гьел тӀокӀал киданиги ракъиларо, къечеларо, бакъул бухӀиги гьезие букӀинаро, багӀари-гьелегьинги гьезда хъваларо.

¹⁷ Тахил бакьулъ бугеб КьегӀер гьезул вехьлъун лъугьунелъулха. Гьелъ рачина гьел маулхӀаяталъул иццухъе, Аллагьас гьезул бадиса щибаб магӀил гороги бацӀцӀина».