Иоанние Аллагьас загьир гьарурал ишал 5 - Аллагьасул Калима

5 бетӀер Кагъатги КьегӀерги

¹ Тахида гӀодов чӀарасдаса кваранидехун дида бихьана кӀиябго рахъалда хъвай-хъвагӀай бугеб гурараб халатаб кагъат, анкьго мугьру чӀван бугоан гьелда.

² Дида вихьана цо зорбаяв малаик, кӀудияб гьаркьидалъун гьес ахӀулеб букӀана: «ТӀад чӀвараб анкьабго мугьруги тӀезабун, гьаб кагъат рагьизе щив мустахӀикъав вугев?»

³ Я зобалазда, я ракьалда, я ракьалда гъоркь вугев цонигиясда кӀвечӀо, гьеб кагъат рагьун, гьелда щиб хъван бугебали хал гьабизе.

⁴ Кагъат рагьун гьелда щиб хъван бугебали хал гьабизе мустахӀикъав чи цониги ватичӀелъул, дун гӀемерав гӀодана.

⁵ Цо хӀакимас дида абуна: «ГӀодуге мун. Балагье, Ягьудал наслуялъул Давудил кьибилалъул гъалбацӀ бергьана, гьединлъидал гьелда кӀола, анкьабго мугьруги тӀезабун, кагъат рагьизе».

⁶ Ункъабго рухӀчӀаголъиялъги хӀакимзабазги сверун ккураб тахалда тӀад бугоан хъун букӀараб гӀадинаб цо КьегӀер. Гьелъул букӀана анкьго лълъарги анкьго берги. Гьелъул магӀнаги – Аллагьас тӀолабго ракьалде витӀарав анкьго кӀудияв малаик.

⁷ БачӀун КьагӀрица доб кагъат босана тахида гӀодов чӀарасул кваранаб хъатикьа.

⁸ Доб ункъабго рухӀчӀаголъиги къоло ункъавго хӀакимги гьеб КьагӀрида цере кӀалагъоркье ккана ва щивасда кодоб букӀана арфаги кьеккен гьабулеб махӀгьуинаб нахул цӀураб меседил щурунги. (Гьелъул магӀна – Аллагьасул халкъалъул дугӀа.)

⁹ Гьез цӀияб кечӀ ахӀана: «Хъун букӀиндал ва дурго бидухъ дуца щибаб наслуялъул, щибаб мацӀалъул, щибаб халкъалъул ва щибаб миллаталъул гӀадамал Аллагьасе ричун росидал, мун мустахӀикъаб буго, босун гьеб кагътил мугьру тӀезабизе.

¹⁰ Дуца гьел парччахӀлъиялде рачана ва нилъер Аллагьасул кашишзабилъунги лъугьинаруна. Гьез ракьалда парччахӀлъи гьабила».

¹¹ Дун валагьана ва дида рагӀана тахалда сверухъ ва рухӀчӀаголъабаздаги хӀакимзабаздаги сверухъ ругел гӀемерал малаикзабазул гьаркьал. РикӀкӀун хӀалкӀоларелгӀан гӀемер рукӀана гьел.

¹² КӀудияб гьаркьидалъун гьез ахӀулеб букӀана: «Хъун букӀараб гьаб КьегӀер мустахӀикъаб буго кверщелги, бечелъиги, гӀакълуги, къудратги, къадру-къиматги, реццги, баркатги насиблъизе!»

¹³ Зобалаздаги, ракьалдаги, ралъдадаги ва гьезда жанибги рухӀ бугебщиналъ ахӀулеб рагӀана дида: «Тахида гӀодов чӀарасе ва КьагӀрие абадул абадиялъго баркатги, къадру-къиматги, реццги, къудратги!»

¹⁴ Ункъабго рухӀчӀаголъиялъ «Амин» абуна. КӀалагъоркье речӀчӀун, хӀакимзабаз сужда гьабуна.