Иоанние Аллагьас загьир гьарурал ишал 4 - Аллагьасул Калима

4 бетӀер Зобалазул тахги гьелда гӀодов чӀаравги

¹ Гьелдаса хадуб дун вала-гъалагьана. Гьале зобалазда буго рагьараб нуцӀа. Трубаялъул гӀадаб кутакаб, доб дида кӀалъалеб рагӀараб гьаракьалъ абуна: «Гьаниве тӀаде ваха, дица дуда бихьизабила хадуб щиб ккезе бугебали».

² Илагьияб РухӀалъ асар гьабун, гьебсагӀатго дида цебе тӀамуна гьадинаб сурат. Гьале дида цере руго зобалазул тахги гьелда гӀодов чӀаравги.

³ ГӀодов чӀарасул гьумер гвангъун букӀана яшмаялда ва сардисалда релълъун, гьесул тахалда тӀад чӀун букӀана изумрудалъулкьераб нур.

⁴ Гьеб тахалда сверунги букӀана жеги къоло ункъо тах. Тахазда гӀодор чӀун рукӀана къоло ункъо хӀаким. Гьез ретӀун букӀана хъахӀаб ретӀел, ботӀрода букӀана меседил таж.

⁵ Доб тахалдасан пири пирхулеб букӀана, кутакал гьаркьалги гъугъадиги рагӀулеб букӀана. Тахалда цебе рекӀун букӀана анкьго чирахъ – Аллагьасул анкьго кӀудияв малаик.

⁶ Гьелда цебе бацӀцӀадаб цӀорол гӀадинаб ралъад бугилан кколеб букӀана. Тахалъул ункъабго рахъалда букӀана цереги нахъаги гӀемерал берал ругеб ункъо рухӀчӀаголъи.

⁷ ТӀоцебесеб рухӀчӀаголъи гъалбацӀалда релълъараб букӀана. КӀиабилеб – оцода релълъараб букӀана. Лъабабилелъул гьумер инсанасул гӀадинаб букӀана. Ункъабилеб релълъун букӀана боржун унеб цӀудуда.

⁸ Гьеб ункъабго рухӀчӀаголъиялъул щибалда букӀана анлъ-анлъ кваркьи; жанисанги къватӀисанги гьел куркьбаздаги рукӀана берал. Къасиги-къадги гьоркьоса къотӀичӀого гьез ахӀулеб буго: «ВацӀцӀадав! БатӀияв! Къудратав! ХӀалкӀолев БетӀергьан Аллагь! Жив хӀакъав, абадияв ва даимав!»

⁹ Тахида гӀодов чӀарасе, абадул абадиялъ чӀагоясе гьел рухӀчӀаголъабаз рецц гьабула, гьесул къудраталъул бицуна, гьев кӀодо гьавула. Гьебго заманалда

¹⁰ къоло ункъавго хӀаким кӀалагъоркье речӀчӀула тахида гӀодов чӀарасда цере ва абадул абадиялъ чӀагоясе сужда гьабула. Тахалда цере жидерго тажалги лъун, гьез абула:

¹¹ «Мун нижер БетӀергьан Аллагь, кинабго жо дуца бижидал, кинабго дуе бокьухъе бижун бугелъул, мун мустахӀикъав вуго дуе рецц гьабизеги, къудратав ва хӀалкӀояв вугилан абизеги».