Иоанние Аллагьас загьир гьарурал ишал 3 - Аллагьасул Калима

3 бетӀер Сардисалда ругел иман лъуразул агьлуялде хитӀаб

¹ Сардисалда ругел иман лъуразул агьлуялде витӀарав чапарасухъе хъвай: «Аллагьасул анкьго кӀудияв малаик жинда аскӀов вугес, жиндихъ анкьго цӀваги бугес гьадин абулеб буго: Дида лъала дур ишал. Дур рахъалъ абулеб буго мун чӀаго вугилан, амма хун вугевха мун.

² Макьидаса вигьа ва дулъ хвечӀого хутӀараб, амма кватӀичӀого хвезе бугебщинаб щулалъизабе – дур ишал щвалде щвараллъун рихьулел гьечӀо дир Аллагьасда.

³ ХӀасил, духъе щварабги ва дуда рагӀарабги ракӀалде щвезабе, гьеб цӀуне ва кантӀе. Мун вигьинчӀони, цӀогьор гӀадин вачӀина дун, ва дуда лъазе гьечӀо дун кида духъе вачӀиневали.

⁴ Амма дур гьенив Сардисалда вуго ретӀел хъублъизабичӀев чанго чи, гьел дида цадахъ хъахӀаб ратӀлилъ хьвадизе руго, гьелъие мустахӀикъал ругелъул.

⁵ Бергьаравги, гьелго гӀадин, хъахӀаб ратӀлилъ вукӀине вуго. ГӀумруялъул тӀехьалдаса гьесул цӀарги киданиги хъвагӀаларо дица. Гьесул цӀар рехсела дирго Инсудаги гьесул малаикзабаздаги цебе.

⁶ ГӀундул ругезда рагӀизе биччанте иман лъуразул жамагӀатазда Илагьияб РухӀалъ щибилан абулеб бугебали».

Филадельфиялда ругел иман лъуразул агьлуялде хитӀаб

⁷ Филадельфиялда ругел иман лъуразул агьлуялде витӀарав чапарасухъе хъвай: «Жив вацӀцӀадас, Жив хӀакъас, Давуд парччахӀасул кӀул кодоб бугес (гьес ричӀараб лъиданиги рахазе кӀоларо, гьес рахараб лъиданиги ричӀизеги кӀоларо) гьадин абулеб буго:

⁸ Дида лъала дур ишал. Балагьея, дица дуда цебе нуцӀа рагьана, лъиданиги кӀоларо гьеб къазе. ЗагӀипав чи вукӀаниги, дир рагӀи цӀунана дуца ва дир цӀаралдаса инкарги гьабичӀо.

⁹ Балагьея, дица духъе кьела илбисалъул агьлуялда гьоркьоса цо-цо чагӀи. Гьез абула жал ругин Аллагьасул халкъ, (амма гьел Аллагьасул халкъ гуро, гьерсихъаби руго). РачӀун дур хӀатӀазда цере накабазда чӀезе тӀамила дица гьел, ва гьебмехалда лъала гьезда мун дие вокьулевлъи.

¹⁰ Сабру гьабейилан бугеб дир амру дуца цӀунидал, дицаги цӀунила мун, – ракьалда ругезул хӀалбихьизе тӀолабго дуниялалде балагьалъул къо бачӀараб мехалъ.

¹¹ Дун кватӀичӀого вачӀина. Дуе щвараб шапакъат вачӀун лъицаниги бахъичӀого хутӀизе, духъго бугеб щулаго ккве.

¹² Бергьаравги дица гьавила дирго Аллагьасул кӀалгӀаялъул хӀубилъун. Гьев тӀокӀав киданиги гьениса къватӀиве лъугьинаро. Дица гьеб хӀобода хъвала дирго Аллагьасул цӀар, дирго Аллагьасул шагьаралъул – дир Аллагьасдасан зодисан рещтӀине бугеб цӀияб Иерусалималъул – цӀар ва дирго цӀияб цӀарги.

¹³ ГӀундул ругезда рагӀизе биччанте иман лъуразул жамагӀатазда Илагьияб РухӀалъ щибилан абулеб бугебали».

Лаодикеялда ругел иман лъуразул агьлуялде хитӀаб

¹⁴ Лаодикеялда ругел иман лъуразул агьлуялде витӀарав чапарасухъе хъвай: «Жинда божизе бегьулес, РитӀухъав ва ХӀакъав нугӀас, Аллагьас бижанщиналъул аваллъун вугес гьадин абулеб буго:

¹⁵ Дида лъала дур ишал. Дулъ я бухӀи гуро, я цӀорой гуро. Дулъ бухӀиниги цӀоройниги букӀарабаниха!

¹⁶ Хинлъи гурони, дулъ я бухӀи, я цӀорой гьечӀелъул, дица мун дирго кӀалдиса къватӀиве тун рехила.

¹⁷ Дуца абулеб буго мун бечедго вугин, цӀакъго ресалда вугин ва сундениги хӀажалъунги гьечӀин. Дуда бичӀчӀулеб гьечӀо мун талихӀ къосарав, хӀакъирав, пакъирав, бецав ва гӀицӀав чи вукӀин.

¹⁸ Дица дуе гӀакълу кьела дихъа бичун босейин цӀаялъ бацӀцӀад гьабураб месед – мунго бечелъизе; дихъа бичун босейин хъахӀаб ретӀел – дурго инжитаб гӀицӀлъи бахчизе; дихъа даруги бичун босейин – дурго бадиб бахине. Гьебмехалда канлъи бихьила дуда.

¹⁹ Диего рокьулезда гӀайибги чӀвала дица, тамихӀги гьабула. Гьединлъидал дуца хӀаракат бахъе ва тавбу гьабе.

²⁰ Гьале нуцӀихъе вачӀун вуго дун, заруца бухулеб буго дица гьеб! Дир гьаракь рагӀун нуцӀа рагьарасухъе гьоболлъухъ ина. Цинги цадахъ гӀодор чӀун дунги гьевги квана-гьекъела!

²¹ Дун бергьиндал дир Инсуца дунги жиндирго тахида тӀад гӀодов чӀезавурав гӀадин, дицаги бергьарав дидаго аскӀов дирго тахида гӀодов чӀезавила.

²² ГӀундул ругезда рагӀизе биччанте иман лъуразул жамагӀатазда Илагьияб РухӀалъ щибилан абулеб бугебали».