Иоанние Аллагьас загьир гьарурал ишал 16 - Аллагьасул Калима

16 бетӀер Аллагьасул ццидал цӀураб анкьго щурун

¹ Дида рагӀана гьеб кӀалгӀаялъусан кутакаб гьаракьалдалъун гьев анкьавго малаикасда абулеб: «Инеги ун, нужеца ракьалде чвалхе гьеб анкьабго щуруналъуб бугеб Аллагьасул ццин».

² Ва инеги ун тӀоцевесев малаикас жиндирго щурун ракьалде чвалхана. Жанаваралъул гӀуж бугел ва гьелъул сураталъе сужда гьабурал гӀадамазул чурхдузда лъугьана цӀакъ захӀматал ва ракӀ гъанцӀулел ругънал.

³ КӀиабилев малаикас жиндирго щурун ралъдалъе чвалхана: чӀварав чиясул гӀадинаб биялде сверана ралъад, ва гьениб бугеб кинабго рухӀчӀаголъи хвана.

⁴ Лъабабилев малаикас жиндирго щурун гӀораздеги лъадал иццаздеги чвалхана: гьелги биялде сверана.

⁵ Ва лъадал малаикас абулеб рагӀана дида: «Гьаб дур суд ритӀухъаб буго, абадияв-даимав вацӀцӀадав Аллагь!

⁶ Вализабазулги аварагзабазулги би гӀодобе тӀуралъухъ, дуца гьезда би гьекъезабуна. ЦӀакъ битӀун ккана гьезие гьеб!»

⁷ Къурбан хъолеб бакӀалда аскӀосан абулеб рагӀана дида: «БитӀараб буго! ЦӀакъго ритӀухъабги хӀакъабги хӀукму къотӀана дуца, хӀалкӀолев БетӀергьан Аллагь!»

⁸ Ункъабилев малаикас жиндирго щурун бакъуде чвалхана. Ва гӀадамал цӀадуца рухӀизаризе ихтияр кьуна бакъуе.

⁹ ГӀасияб бухӀи-гьелегьиналъул гӀазабалъукь рукӀана гӀадамал. Ва гьез нагӀана кьолеб букӀана киналго гьел балагьал жинда кодор ругев Аллагьасул цӀаралъе. Амма тавбу гьабичӀо гьез, ва Аллагьасе рецц гьабизеги кантӀичӀо.

¹⁰ Щуабилев малаикас жиндирго щурун чвалхана жанаваралъул тахиде. БецӀлъукье ккана гьелъул парччахӀлъи, ва унти-гӀазабалъул хӀал цӀикӀкӀиналъ, жидерго мацӀал хӀанчӀулел рукӀана гӀадамаз.

¹¹ Гьел жидеда тӀаде щварал гӀазабазухъги ва жидеда ругел ругъназухъги зобалазул Аллагьасе нагӀана кьолеб букӀана гьез, амма жидер ишаздаса рекӀекълъичӀо, тавбуги гьабичӀо.

¹² Анлъабилев малаикас жиндирго щурун Пурат абураб кӀудияб гӀурулъе чвалхана, ва гьеб гӀурул лъим бакъвана, бакъбаккул рахъалдасан парччахӀзабазе нухги рагьана.

¹³ Ва дида бихьана къуркъбузда релълъараб лъабго хъубаб жен аздагьоялъул кӀалдисанги, жанаваралъул кӀалдисанги ва гьересиаварагасул кӀалдисанги къватӀибе лъугьун бачӀунеб.

¹⁴ Гьел руго квешал жундул; гьез гӀаламатал рихьизарула. Ва гьел ана тӀолабго дуниялалъул парччахӀзабазухъе, ХӀалкӀолев Аллагьасул кӀудияб къоялъ цолъун, данделъун, гьел рагъде рахъинаризе.

¹⁵ ТӀадегӀанас абулеб буго: «Гьале дун цӀогьор гӀадин вачӀунев вуго. Гьардарав гуревдай тӀад ретӀелги ретӀухъе ворчӀуда чӀарав чи: гьев толохӀочго хьвадизе ккеларо ва гӀадамаздаса намуслъичӀого хутӀила».

¹⁶ Гьел жундуз парччахӀзабазул боял данде ракӀарана жугьутӀазул мацӀалда Гьармагеддон абулеб бакӀалде.

¹⁷ Анкьабилев малаикас жиндирго щуруналъуб букӀараб жо гьаваялде чвалхана. Ва Аллагьасул кӀалгӀаялъуб бугеб тахида аскӀосан кутакаб гьаракьалдалъун: «ТӀубана!» – ян абулеб рагӀана дида.

¹⁸ Ва пири пирхана, гьаркьал рахъана, зоб гъугъадана, кутакалда ракь багъарана; ракьалда гӀадамал рижаралдаса нахъе жеги киданиги букӀинчӀеб къагӀидаялъ багъарана ракь.

¹⁹ КӀудияб шагьар Вавилон лъабго бутӀаялде бихъун ана, ва цогидал халкъазул шагьарал щущан тӀатӀала ккана. Гьедин Аллагьасда ракӀалде щвана кӀудияб Вавилон: гьес гьелъие гьекъезе кьуна жиндирго ццидал цӀураб щурун.

²⁰ Ва киналго чӀинкӀиллъаби лъутун ана, ва мугӀрулги ратичӀо.

²¹ Зодисан гӀадамазда тӀаде бана щибалъул бакӀлъи кӀикъоялда анцӀго килограмм бугеб горо. Гьеб балагьалъул гӀасилъи бихьун, гӀадамаз Аллагьасде гӀайиб гьабулеб букӀана.