Иоанние Аллагьас загьир гьарурал ишал 15 - Аллагьасул Калима

15 бетӀер Анкьго малаикги ахирисеб анкьго балагьги

¹ Цинги дида зодиб бихьана цоги цӀакъго кӀудияб ва хӀикматаб гӀаламат – ахирисеб анкьго балагьги босун вачӀунев вукӀана анкьго малаик. Гьел ахирисел рукӀана, щайгурелъул гьелдалъун лъугӀулеб букӀиндал Аллагьасул ццин бахъин.

² Дида бихьана жаниб цӀа рекӀараб цӀорол ралъадалда релълъараб бакӀ. Жанаваралдаса, гьелъул сураталдаса ва гьелъул цӀар бихьизабулеб тарихалдасаги бергьарал гӀадамал, Аллагьасе рецц гьабулел арфабиги кодор ккун, гьеб цӀорол ралъдада аскӀор чӀун рукӀана.

³ Гьез ахӀулеб букӀана Аллагьасул лагъ Мусал кечӀ ва КьагӀрил кечӀ: «ХӀалкӀолъи кӀудияв БетӀергьан Аллагь, гӀажаибал ва чӀахӀиял руго дур ишал! Халкъазулго парччахӀ, гьел дур нухал ритӀухъалги руго, хӀакъалги руго!

⁴ Я, БетӀергьан, дур цӀаралъукьа щив хӀинкъуларев? Ва гьелъие рецц гьабуларевги щив вугев? Мун гӀадин вацӀцӀадав цогиги гьечӀо. Ва дур судалъул хӀукмаби загьирлъидал, киналго халкъал рачӀун, гьабила дуе сужда!»

⁵ Цинги дун валагьана, ва дир беразе зодиб загьирлъана Аллагьасул кӀалгӀа, гьелъул нуцӀа рагьун бугоан. Аллагь жанив вукӀиналъул гӀаламатлъун кколеб чадирги букӀана гьениб.

⁶ Анкьго балагьги босун, гьеб кӀалгӀаялъуса къватӀиве лъугьун вачӀана анкьго малаик. Гьезда букӀана бацӀцӀадаб ва кенчӀолеб ретӀел, карандасан борчун букӀана меседил рачел.

⁷ Цинги доб ункъабго рухӀчӀаголъиялъул цоялъ анкьавго малаикасухъе кьуна абадияв-даимав Аллагьасул ццидал цӀураб анкьго меседил щурун.

⁸ Аллагьасул къудраталъулги хӀалкӀолъиялъулги кӀкӀуйдул цӀуна гьеб кӀалгӀа. Анкьго малаикасухъ бугеб анкьго балагь лъугӀизегӀан, лъиданиги кӀвечӀо гьеб кӀалгӀаялъуве лъугьине.