Иоанние Аллагьас загьир гьарурал ишал 12 - Аллагьасул Калима

12 бетӀер ЧӀужугӀаданги аздагьоги

¹ Ва зобалазда загьирлъана кӀудияб гӀаламат – бакъ тӀад ретӀарай, моцӀ хӀатӀикь бугей чӀужугӀадан. Гьелъул ботӀрода букӀана анцӀила кӀиго цӀвайил таж.

² Лъимаде йигей гьей, хӀарачӀваялъул унти захӀмалъун, ахӀдолей йикӀана.

³ Цоги гӀаламат загьирлъана зодиб. Гьале анкьго бетӀерги бугеб, анцӀго лълъарги бугеб цӀакъго кӀудияб багӀараб аздагьо, гьелъул бутӀрузда букӀана анкьго таж.

⁴ РачӀ хьвагӀун, гьелъ цӀвабзазул лъабил бутӀа зодиса ракьалде гъинабуна. Гьабурабго лъимер къулчӀизе къачӀан, лъимер гьабулей йигей гьей гӀадамалда цебе чӀана доб аздагьо.

⁵ Ва гьелъие гьавуна маххул тӀилица киналго халкъал жинца рехъаде рачине ругев вас. Гьелъул гьеб лъимер Аллагьасухъе босун ана, гьесул тахида цебе лъезе.

⁶ Гьей гӀаданги гӀицӀаб авлахъалде лъутун ана. Гьениб гьелъие къачӀан букӀараб бакӀалда Аллагьас гьелъул тӀалаб гьабила азаралда кӀинусиялда лъабкъого къоялъ.

⁷ Ва зобалазда рагъ ккана – МикагӀил ва гьесие мутӀигӀал малаикзаби аздагьоялда данде рагъулел рукӀана, аздагьо ва гьелъие мутӀигӀал жундул дозда данде рагъулел рукӀана.

⁸ Амма гьел бергьинчӀо, зобалазда тӀокӀалъ бакӀцин хутӀичӀо гьезие.

⁹ Ва Илбисиланги ШайтӀаниланги цӀар лъураб, жинца тӀолабго дуниял къосинабулеб кӀудияб аздагьо – некӀсияб борохь ракьалде рехана ва гьелъие мутӀигӀал жундулги рехана гьелдаго цадахъ.

¹⁰ Дида рагӀана зодиб цо кутакаб гьаракьалъ абулеб: «Гьанже бачӀана нилъер Аллагьасдасан хвасарлъиги, ихтиярги, парччахӀлъиги ва гьесул МасихӀил ихтиярги, щайгурелъул иман лъуразде гӀайиб гӀунтӀизабураб тушман зобалаздаса гӀодобе рехун бугелъул; къасиги-къадги Аллагьасда цебе гьезде гӀайиб гӀунтӀизабулаан гьелъ.

¹¹ Гьеб аздагьоялдаса гьел бергьана КьагӀрил биялдалъунги ва жидерго нугӀлъиялъул рагӀудалъунги, щайгурелъул холел ругониги, гьел жидерго гӀумруялда барахщинчӀелъул.

¹² Гьединлъидал, зобал ва зобалазда ругелщиналги, нужеца рохел гьабе! Амма, ракьги ралъадги, нужедени балагь бачӀина, – жиндие дагьаб заман хутӀун букӀинги лъан, гӀасиго ццин бахъун, илбис нужехъе рещтӀун бугелъул».

¹³ Жиб ракьалде рехараблъи лъайдал, дов вас гьавурай чӀужугӀаданалда хадуб лъугьана гьеб.

¹⁴ КӀудияб цӀудул кӀиго кваркьи кьун букӀана гьей гӀаданалъе, гӀицӀаб авлахъалда гьелъие къачӀан букӀараб ва аздагьоялъухъе щолареб бакӀалде йоржине. Гьениб гьелъул тӀалаб гьабила лъабго соналъги анлъго моцӀалъги.

¹⁵ Аздагьоялъ жиндирго кӀалдисан гьелда хадуб гӀор гӀадин лъим чвахизабуна, гьеб гӀуруца гьей йосун инародайилан.

¹⁶ Амма ракьалъ гьелъие квербакъана; жиндирго кӀал рагьун, ракьалъ жанибе къулчӀана аздагьоялъ кӀалдисан лагӀун букӀараб гӀор.

¹⁷ Ва гьеб аздагьоялъул кутакалда ццин бахъана гьей чӀужугӀаданалда. Ва Аллагьасул амруялги тӀуразарулел ва ГӀисал хӀакъалъулъ жидеца нугӀлъиги гьабулел гӀадамазда – дой гӀаданалъул наслуялдасан хутӀарал чагӀазда – данде багъизе ана гьеб. Ва гьеб аздагьо ралъдал рагӀалда чӀана.