Матфей 9 - Аллагьасул Калима

9 бетӀер ГӀисаца сахлъизавула палижалъ ккурав чи

¹ Добго росодаги рекӀун, ралъадги бахун, ГӀиса жиндирго шагьар Капернаумалде тӀадвуссана.

² Гьале туртида лъун гьесухъе восун вачӀана палижалъ ккурав чи. Гьезул божи бихьун, ГӀисаца унтарасда абуна: – ХӀинкъуге, дир вас, мунагьаздаса вацӀцӀалъилин мун!

³ Гьебмехалъ цо-цо диниял гӀалимзабаз пикру гьабуна, Аллагьасде гӀасилъун вугин гьавилан.

⁴ Гьезул пикруги бичӀчӀун, ГӀисаца абуна: – Щай нужеца квешаб пикру нужерго рекӀелъе биччалеб?

⁵ Кинаб бигьаяб: «Мун мунагьаздаса вацӀцӀалъанилан» абизейищ, яги: «ТӀаде вахъун вилълъанхъейилан» абизейищ?

⁶ Амма нужеда лъан букӀа: ГӀадамил Лъимадул ихтияр буго гьаб ракьалда гӀадамазул мунагьал тӀасалъугьун тезе. Цинги гьес унтарасда абуна: – ТӀаде вахъа. Дурго турутги босун, рокъове а, – ян.

⁷ ТӀадеги вахъун, жиндирго рокъове ана гьев чи.

⁸ Гьеб бихьидал, халкъалъул руккел кутакалда хӀинкъула, инсанасе гьединаб ихтияр кьурав Аллагьасе рецц гьабизе лъугьуна.

ГӀисаца Матфей муридлъун восула

⁹ Гьениса нахъе унаго, ГӀисада нухлул хӀакъ бакӀарулеб бакӀалда гӀодов чӀун вихьана Матфей абулев цо гьеб ишалъе тӀамурав чи. ГӀисаца гьесда абуна: – Дида цадахъ вилълъа, – ян. Вахъун ГӀисада цадахъ уна гьев.

¹⁰ Гьале гьесул рокъов кваналев вукӀана ГӀиса. РачӀун гьесда ва гьесул муридазда цадахъ гӀодор чӀун рукӀана гӀемерал магъало бакӀарулел чагӀи ва цогидабги мунагь-хӀакъалъул агьлу.

¹¹ Гьеб бихьидал, фарисеяз ГӀисал муридазда абуна: – Магъало бакӀарулел чагӀаздаги ва цогидаб мунагь-хӀакъалъул агьлуялдаги цадахъ гӀодовги чӀун щай гьав нужер мугӀалим кваналев?

¹² Гьеб рагӀидал, ГӀисаца гьезда абуна: – Сахазе гурев тохтир хӀажалъулев, унтаразейин.

¹³ Гьанже нуж ун лъикӀ, Аллагьасул гьадинал рагӀабазул магӀна лъазабизе: «Нужер къурбанал рокьун гьечӀо дие, нужедаго гьоркьоб гурхӀел-рахӀму бокьун буго». Аллагьасде руссине муъминзаби ахӀизе гуро дун вачӀун вугев, мунапикъзаби ахӀизейин.

КӀал кквеялъул хӀакъалъулъ

¹⁴ ЯхӀял муридал рачӀана ГӀисада аскӀоре: – Нижецаги фарисеязги кӀал ккола, гьал дур муридаз кӀал щай кколареб? – ан гьикъана гьез.

¹⁵ ГӀисаца гьезда абуна: – БахӀарав аскӀов вугебгӀан мехалъ гьес берталъе ахӀарал гьудулзаби къваридго-пашманго рукӀине бегьилищ? РачӀина бахӀарав гьезухъа вахъун арал къоялги, гьеле гьебмехалъ кквела гьез кӀалги.

¹⁶ ЦӀияб ххамил рукъи басрияб ратӀлида баларо лъицаниги, – цӀияб букъун хадуб, басриябги бихъун ина, каратӀги дагьабги кӀодолъила.

¹⁷ Гьединго басрияб рахълъеналъубе цӀияб чагъирги тӀоларо. Гьелъ рахълъен багьизабила, чагъирги гӀодобе чвахила, рахълъенги хвела. ЦӀияб чагъир цӀияб рахълъеналъубе тӀуни, цонигиялъе зарал ккеларо.

ГӀисаца унтарайги сахлъизаюла хварайги чӀаголъизаюла

¹⁸ Гьедин гьезие хабар бицунев ГӀиса вукӀаго, аскӀовеги вачӀун, цо хӀакимас накалда чӀун гьарана гьесда: – ГьабсагӀат хвана дир яс. ВачӀун дуца цо квер хъвани, чӀаголъила гьей.

¹⁹ Вахъун гьесда цадахъ ана ГӀиса, муридалги рахъана гьесда хадур.

²⁰ АнцӀила кӀиго соналъ би къотӀичӀого ва черх бацӀцӀалъичӀого йикӀарай цо чӀужугӀаданалъ къотӀносан унев вукӀарав ГӀисал гӀабаялдасан далун букӀараб цо гӀертелалда нахъасан ячӀун квер хъвана.

²¹ ГӀисал ратӀлидагӀаги квер хъвазе щвани, жий сахлъилин ракӀалде кколаан гьелда.

²² Нахъехун вуссиндал гьей йихьарав ГӀисаца абуна: – ХӀинкъуге, дир яс, дурго божи-иманалъ хвасар гьаюнин мун. ГьебсагӀатго сахлъана гьей гӀадан.

²³ Дов хӀакимасул бакӀалде гьал щведал, щвантӀих пулел чагӀи рачӀун ратана гьенире. Руччабиги ругоан магӀаби гьарулел.

²⁴ ГӀисаца гьезда абуна: – Нуж нахъе а. Гьей яс хун гьечӀо, кьижун ккун йиго, – ян. Гьел гьасда тӀад релъанхъизе лъугьана.

²⁵ ГӀадамал къватӀире ритӀидал, гьей ясалда аскӀовеги ун, ГӀисаца гьелъул квер ккуна, – яс тӀаде яхъун ячӀана.

²⁶ Гьеб лъугьа-бахъиналъул хабар тӀибитӀана гьеб рахъалъул кинабго халкъалда гьоркьоб.

ГӀисаца гӀемерал чагӀи сахлъизарула

²⁷ ГӀиса гьениса тӀадвуссун унаго, кӀиго бецав чи вачӀунев вукӀана хаду-хадув. – Я, Давудил Вас ГӀиса! ГурхӀа мун нижеда! – ян ахӀулеб букӀана гьез.

²⁸ Рокъове щведал, кӀиявго бецав чи вачӀана гьесда аскӀове. ГӀисаца гьезда гьикъана: – Нужеца гьарараб жо дида гьабизе кӀвеялда божулищ нуж? – ан. – Божула, БетӀерчӀахъад, – абун жаваб кьуна гьез.

²⁹ – Нуж божараб жо лъугьаги нужее, – янги абун, гьезул беразда квер хъвана ГӀисаца.

³⁰ Канлъи бихьун, берал рагьун рачӀана гьезул. Воре, лъиданиги бицунгейилан лъазабуна ГӀисаца гьезда.

³¹ Амма гьеб рахъалъул тӀолабго халкъалда гьоркьоб тӀибитӀизабуна гьез ГӀисал хӀакъалъулъ хабар.

³² Гьел къватӀире индал, ГӀисахъе вачун вачӀана жундуз ккурав мацӀ лъаларев чи.

³³ ГӀисаца жен бачахъидал, гаргадизе кӀвана гьесда. Исраилил халкъалда гьоркьоб гьединаб лъугьа-бахъин киданиги ккун букӀинчӀилан гӀажаиблъун хутӀана гӀадамал.

³⁴ Фарисеязни абулеб букӀана жундул рачахъизе гьесие жундузул ханас кумек гьабулеб бугилан.

³⁵ ГӀиса шагьаразде ва росабалъе хьвадулев вукӀана. Гьезул синагогабазда гӀадамазе вагӀза-насихӀат гьабулаан, ПарччахӀлъиялъул хӀакъалъулъ Рохалил хабар лъазабулаан, кинабго унтиялдаса, кинабго щокълъиялдаса гӀадамал сахлъизарулаан.

³⁶ Халкъалъул руккел бихьун, гьев гурхӀана, чара хун ва бакъхӀан, вехь гьечӀеб гӀи гӀадин, гьел рукӀиндал.

³⁷ Гьебмехалъ жиндирго муридазда абуна гьес: – Хуриб хӀалухъен гӀемер бижун буго, хӀалтӀухъаби дагь руго.

³⁸ Гьеб лъилъизе кверщел кодоб бугев БетӀергьанасда гьаре лъилъарухъаби ритӀеян.