Матфей 8 - Аллагьасул Калима

8 бетӀер ГӀисаца вацӀцӀалъизавула барасалъ унтарав цо чи

¹ МагӀардаса гъоркье гӀемераб халкъ бачӀана ГӀисада хадуб.

² Гьале барасалъ унтарав цо чи, гьесда аскӀовеги вачӀун, накабаздаги чӀун, гьардезе лъугьана: – Я, БетӀерчӀахъад! Дуе бокьани, дуда кӀолаха дун вацӀцӀалъизавизе.

³ ГӀебеде битӀун гьесда кверги хъван, ГӀисаца абуна: – Дие бокьун буго мун вацӀцӀалъизе. ВацӀцӀалъе мун! ТӀад букӀараб чанхъги гъенон ун, гьебсагӀат вацӀцӀалъана гьев чи.

⁴ ГӀисаца гьесда абуна: – Вореха, гьаб ишалъул хӀакъалъулъ дуца лъиданиги бицунге. Мусал Къануналда рекъон, мунго вацӀцӀалъун вукӀин гӀадамазда лъазе, кашишасухъеги ун, гьесда дурго черх бихьизабе ва дудасаго къурбанги хъвезабе.

ГӀисаца сахлъизавула нусилбетӀерасул рагьтӀател

⁵ ГӀиса Капернаумалде щведал, румазул рагъухъабазул цо нусилбетӀерас, аскӀовеги вачӀун, гьарана:

⁶ – Я, БетӀерчӀахъад! Дир цо рагьтӀател вуго палижалъ ккун вагъаризе кӀоларого. Кутакаб гӀазабалда вуго гьев.

⁷ Гьев сахлъизавизе вачӀинин абуна ГӀисаца гьесда.

⁸ НусилбетӀерас абуна: – Я, БетӀерчӀахъад! Мун къавулъе лъугьине мустахӀикъав чи гуро дун. Цо рагӀи абе дуца, гьелдалъун сахлъила дир рагьтӀател.

⁹ Дунги вуго тӀадехун ругезул амру тӀубазабулев, дир ихтияралда ругел рагъухъабазе рагӀудалъун амру-буюрухъ гьабулев чи. Айилан цоясда абуни, гьев уна. ВачӀайилан цогидасда абуни – вачӀуна. Пуланаб иш тӀубазабейилан абуни, рагьтӀателас гьеб тӀубазабула.

¹⁰ Гьединал рагӀабаз гӀажаиблъизавуна ГӀиса. Жиндаго хадур рачӀунел рукӀараздехун вуссун, гьес абуна: – Гьале дица нужеда абулеб буго: Исраилил халкъалда гьоркьобгицин лъилниги дандчӀвачӀо дида гьединаб божи-иман.

¹¹ Машрикъалдаса ва магърибалдаса гӀемерал гӀадамал рачӀина ва Зобалазул ПарччахӀлъиялда Ибрагьимидаги, ИсхӀакъидаги, Якъубидаги аскӀор квана-гьекъезе гӀодор чӀела.

¹² Аллагьас ПарччахӀлъиялъе рижун рукӀарал гӀадамалги гьениса бецӀаб къотӀноре рехила. ГӀодилел ва цаби къерщезарулел хутӀила гьел.

¹³ Дов нусилбетӀерасда ГӀисаца абуна: – Гьанже дурго рокъове а. Мун божун вугеб жо лъугьина дуе. РагьтӀател гьебсагӀатго сахлъанила.

ГӀисаца Пётрил якьад сахлъизаюла

¹⁴ Цинги Пётрил бакӀалде щведал, гьесул якьад цӀа-кан бахун бусада егун ятана ГӀисада.

¹⁵ ГӀисаца гьелъул квер ккуна. ЦӀа-канги ун, якьад тӀаде яхъана ва гьесие квен-тӀехалда квалквадизе лъугьана.

¹⁶ МаркӀачӀубер рукӀкӀарабго, ГӀисахъе рачун рачӀана жундуз ккурал гӀемерал гӀадамал. Амру гьабун рачахъана гьес жундул. Киналго унтаралги сахлъизаруна.

¹⁷ Гьеб гьедин ккана Ишая аварагасда Аллагьас абураб гьадинаб калима ритӀухълъизе: «Гьесин росун арал нижер гӀузраби, нижер унтабиги раччун ана гьес».

«Дида цадахъ вилълъа»

¹⁸ Жиндаго сверухъ халкъалъул руккел бихьидал, ГӀисаца муридазда абуна ралъдал доб рахъалде рахине кколин нилъилан.

¹⁹ АскӀове вачӀун цо динияв гӀалимчияс абуна гьесда: – Я, НасихӀатчи, мун киве аниги, дуда цадахъ вилълъина дунги.

²⁰ ГӀисаца гьесда абула: – Царал жиндирго рукӀун буго, хӀанчӀил бусен буго, амма ГӀадамил Лъимадул бетӀер бегьизе бакӀ гьечӀо.

²¹ Цоги муридас абуна гьесда: – Я, БетӀерчӀахъад! Дир хварав эмен вукъизе ине изну кье дие.

²² ГӀисаца гьесда абуна: – Хвараца рукъизе хварал чагӀиги тун, мун дида цадахъ вилълъа, – ян.

ГӀисаца гьури къотӀизабула

²³ ГӀиса росода рекӀараб мехалъ, муридалги ана гьесда цадахъ.

²⁴ Гьале кутакаб гьури бахъана, ралъад гьалаглъана, карачалабаз раса тӀерхьинабизехъин букӀана. Гьебмехалъ ГӀиса кьижун вукӀана.

²⁵ – Я, БетӀерчӀахъад! Нилъ гъанкъизехъин руго! Хвасар гьаре! – янги абун, муридаз ворчӀизавуна гьев.

²⁶ ГӀисаца гьезда абуна: – Я, иман дагьаб уммат! Щай нуж хӀинкъулел? ТӀадеги вахъун амру гьабун гьес гьури къотӀизабуна. Ралъад гӀодобе буссана. ТӀубанго сихӀ къотӀун дуниялги хутӀана.

²⁷ Гьуриги ралъадги жиндие мутӀигӀав гьавго кинав чийилан гӀажаиблъун хутӀана гӀадамал.

ГӀисаца сахлъизавула жундуз ккурав кӀиго чи

²⁸ Ралъад бахун добехун бугеб гадареназул ракьалде щведал, ГӀисада ватана жундуз ккурав кӀиго чи, хабалазул нохъаздаса къватӀиве вачӀунев. Гьеб рахъалдасан ине лъиданиги кӀолареб хӀалалда гӀасилъун рукӀана гьел.

²⁹ Гьале гьел ГӀисаде ахӀдезе лъугьана: – Ле, Аллагьасул Вас, нижедасан щиб дуе къваригӀараб? Заман щвелалдего нижее гӀакъуба-гӀазаб кьезейищ мун вачӀун вугев? – абун.

³⁰ Болъоназул кӀудияб рехьедги бугоан доба рикӀкӀадегӀан кваналеб.

³¹ КӀиявго чиясулъ ругел жундуз ГӀисада гьарана: – Дуца ниж рачахъулел ругел ратани, гьадаб болъоназул рохьдолъе ритӀе, – ян.

³² Айилан абуна ГӀисаца гьезда. Гьедин ун болъоназулъе лъугьана гьел жундул. Гьале тӀолабго рехьед цо борхатаб бакӀалдасан ралъдалъе кӀанцӀун, лъадалъ гъанкъана.

³³ Болъоназул гӀухьби гьениса лъутун ана. Шагьаралдеги рачӀун, жундуз ккурав дов кӀиявго чиги рехсон, гӀадамазда бицана гьеб кинабго.

³⁴ Гьебмехалъ шагьаралъул тӀолабго халкъ ГӀисада аскӀобе бачӀана. Гьев вихьаравго, жидер ракьалдаса нахъе айилан гьарана гьез.