Матфей 4 - Аллагьасул Калима

4 бетӀер Илбисалъ хӀалбихьула ГӀиса къосинавизе

¹ Цинги гьеб РухӀалъ ГӀиса гӀицӀаб авлахъалде вачана. Илбисалъ хӀалбихьана гьев къосинавизе кӀвелародайилан.

² Гьенив кӀикъого къоялъ ва кӀикъого сордоялъ кӀал ккун вукӀарав ГӀиса ахирги вакъана.

³ БачӀун илбисалъ абуна гьесда: – Мун Аллагьасул Вас ватани, чадазде сверайилан амру гьабе гьал ганчӀазе.

⁴ Гьелъие жаваб гьабун, ГӀисаца абуна: – ТӀехьалда хъван буго: «ЦохӀо чадица гуребин чиясе чӀаголъи кьезе бугеб, Аллагьасдасан бачӀараб щибаб рагӀиялъин».

⁵ Цинги Мукъадасаб шагьар Иерусалималде вачун, илбисалъ ГӀиса Мукъадасаб Рукъалъул сиялда тӀад лъола.

⁶ Гьелъ абула: – Мун Аллагьасул Вас ватани, гъоркье кӀанцӀе! ТӀехьалда хъван бугелъул: «Аллагьас малаикзабазе дур рахъалъ амру гьабун буго» ва: «Гьез мун кодов ккун восила, ганчӀидацин дур хӀетӀе тункичӀого букӀине».

⁷ ГӀисаца абуна: – «Дурго БетӀергьан Аллагьасул хӀалбихьуге!» – янги хъван буго ТӀехьалда.

⁸ Гьанже илбисалъ ГӀиса цӀакъго борхатаб мегӀералъул тӀогьиве вачуна ва дуниялалъул киналго пачалихъалги ва гьезул кинабго кӀодолъи-къудратги бихьизабула гьесда.

⁹ Цинги ГӀисада абула гьелъ: – Гьаб кинабго дуе кьела дица, бетӀер къулун дуца дие сужда гьабуни.

¹⁰ ГӀисаца гьелда абула: – ТӀагӀа дида цебеса, шайтӀан! ТӀехьалда хъван буго: «ЦохӀо Аллагьасе – дурго БетӀергьанасе – гурони сужда гьабуге. ЦохӀо Гьесие гьабе гӀибадат!»

¹¹ Гьебмехалъ илбисалъ ГӀиса живго тола. Гьале малаикзаби рачӀана гьесие хъулухъалъе.

Галилеялда ГӀисал вагӀза-насихӀат

¹² ЯхӀя гвандинив тӀамун вугилан рагӀидал, ГӀиса Галилеялде ана.

¹³ Амма Назареталда чӀечӀо гьев. Забулонил ва Нафталимил ракьалда, Галилеялъул ралъдал рагӀалда бугеб Капернаум шагьаралде ун, гьенив чӀана.

¹⁴ Гьеб гьедин ккана Ишая аварагасда Аллагьас абураб гьадинаб калима ритӀухълъизе:

¹⁵ «Забулонил ракь ва Нафталимил ракь! Ралъдахъе унаго нухда бугеб ракь! Иордан гӀурул доб рахъалда бугеб ракь! Галилея – цогидал халкъазул ракь!

¹⁶ БецӀлъуда букӀараб нужер халкъалъе гвангъараб нур загьирлъана, нужер улкаялда хвалил рагӀдукь рукӀаразе рогьалил бакъ баккана».

¹⁷ Гьелдаса хадуб халкъалъе вагӀза-насихӀат гьабизе байбихьана ГӀисаца. – Нуж кантӀе, Аллагьасде русса! – ян абулеб букӀана гьес. – Зобалазул ПарччахӀлъиялъул заман тӀаде гӀунтӀун бугебин!

ГӀисал тӀоцересел муридал

¹⁸ Галилеялъул ралъдал рагӀалдасан унаго, ГӀисада вихьана ччугӀие гьин рехулев кӀиго вац: Пётр абун гьес тӀокӀцӀар лъурав Симонги гьесулго вац Андрейги. Гьел рукӀана ччугӀихъаби.

¹⁹ – Дида цадахъ рилълъа, – ян абуна гьезда ГӀисаца. – Дица нуж лъугьинарила гӀадамал кколел ччугӀихъабилъун.

²⁰ Гьенибго гьинги тун, гьебсагӀат гьел ГӀисада цадахъ уна.

²¹ Гьениса унаго кӀиго чи вихьана гьесда. Гьел рукӀана Зебедайил вас Якъубги гьесулго вац Иоаннги. Жидерго эмен Зебедайгун цадахъ лъугьун ччугӀа кквезе гьин къачӀалел рукӀана гьел росода тӀад. Дида цадахъ рилълъайилан ахӀана гьездеги ГӀисаца.

²² Росода тӀад эменги вукӀаралъув тун, гьебсагӀатго гьелги ана ГӀисада цадахъ.

ТӀолабго Галилеялда хьвадулев вукӀана ГӀиса

²³ Цинги гьев хьвадана тӀолабго Галилеялда: гьезул синагогабазда гӀадамазе вагӀза-насихӀат гьабулаан, Зобалазул ПарччахӀлъиялъул хӀакъалъулъ Рохалил хабар лъазабулаан, кинабго унта-щокълъиялдаса гӀадамал сахлъизарулаан.

²⁴ ТӀолабго Сириялда тӀибитӀана гьесул цӀар. Гьесухъе рачун рачӀунаан унтуца гӀазаб кьолеб бугелги, шайтӀабаца ккуралги, унти бачӀунелги, палижалъ ккуралги, – батӀи-батӀияб гӀузру бугел гӀемерал гӀадамал. Гьел киналго сахлъизаруна ГӀисаца.

²⁵ Гьесда хадур рачӀунел рукӀана Галилеялдасаги, АнцӀшагьаралдасаги, Иерусалималдасаги, Ягьудиялдаса ва Иордан гӀурул добаб рахъалдаса цӀакъ гӀемерал гӀадамал.