Матфей 28 - Аллагьасул Калима

28 бетӀер ГӀиса хабалъ ватичӀо

¹ Шамат къо индал, анкьил тӀоцебесеб къоялъул рогьалилъ, ГӀисал хабаде рахине рачӀана Магдалаялдаса Марямги ва дойцояй Марямги.

² Зобалаздасан гьениве рещтӀун вуго Бичасул малаик. Хабал картӀида цун лъун букӀараб гамачӀги нахъе босун, гьелда тӀад гьев гӀодов чӀедал, кутакалда ракь багъарана.

³ Пириялъул гӀадаб сурат букӀана гьев малаикасул, гӀазухъахӀаб ретӀелги букӀана гьесда тӀад.

⁴ Гьесукьа хӀинкъун хъаравулзаби сородана ва хварал чагӀи гӀадин лъугьана.

⁵ Гьел руччабазда малаикас абуна: – Нуж хӀинкъуге! Хъанчида ван хвезавурав ГӀиса нужеца валагьулев вукӀин лъала дида.

⁶ Гьев гьанив гьечӀо. Гьес абухъе, хваралъуса вахъана ГӀиса. Гьанире рачӀа гьев вукъун вукӀараб бакӀалде ралагьизе.

⁷ ГьабсагӀат ун нужеца ГӀисал муридазда абе, гьев хваралъуса вахъун вугин, нужедаса цеве Галилеялде щвезе вугин ва гьенив вихьилин нужеда гьев. Гьале гьадин абулеб буго дица.

Гьел руччабазда вихьула ГӀиса

⁸ Гьеб хобалдаса рикӀкӀалъизе гӀедегӀана гьел, ва хӀинкъиялъги рохиялъги куркьбал гъурал руччаби рекерун ана муридазда гьеб хабар лъазабизе.

⁹ Гьале, рорчӀамиянги абун, гьезда данде вачӀана ГӀиса. АскӀоре ун, гьел руччаби, ГӀисае сужда гьабун, гьесул хӀатӀазда хурхана.

¹⁰ ГӀисаца гьезда абуна: – Нуж хӀинкъуге! Инеги ун, дир вацазда абе Галилеялде аян. Дова вихьила гьезда дун.

Хъаравулзабаз бицунеб буго

¹¹ Гьел руччаби нахъе аралго, дол хъаравулзабазда гьоркьоса цо чанго чи шагьаралде ана ва чӀахӀиял кашишзабазда бицана доба ккарабщиналъул хӀакъалъулъ.

¹² Гьебмехалъ чӀахӀиял кашишзабиги чӀухӀби-хӀакимзабиги данделъана щиб гьабилебали дандбазе. Цинги, гӀурабгӀан гӀарацги хъаравулзабазе кьун,

¹³ гьезда абуна: – Нужеца бице: «Ниж кьижун ккараб мехалъ сардилъ рачӀун ГӀисал муридаз жаназа бикъун ана», – ян.

¹⁴ Нагагь сардарасде гьеб хабар щвани, нижеца рекъезабила гьесулгун иш ва нужее гьелъул щибго къварилъи ккезе биччаларо.

¹⁵ Босун гьеб гӀарацгун, гьел рагъухъабазги жидеда малъухъе гьабуна. Ва жугьутӀазда гьоркьоб жакъа къоялде щвезегӀанги тӀибитӀун буго гьеб хабар.

ГӀиса Галилеялда вихьула муридазда

¹⁶ ГӀисал анцӀила цо мурид, Галилеялде ун, гьес бихьизабун букӀараб магӀарде рахана.

¹⁷ ГӀиса вихьидал, гьел суждаялда чӀана, цо-цоязул рекӀелъ щаклъиги бижана.

¹⁸ АскӀове вачӀун ГӀиса гьезда гаргадизе лъугьана. Гьес абуна: – Зобалазул ва ракьалъул тӀолабго ихтияр дихъе щвана.

¹⁹ Гьединлъидал киналго халкъазухъе ун, дир рагӀи тӀибитӀизабе, ва Инсулги, Васасулги, Илагьияб РухӀалъулги цӀаралдалъун, лъадалъ ччун рахъун, гьезул мунагьал чуризаре.

²⁰ Дица нужее гьабунщинаб амру тӀубазабизе малъе гьездаги. Дуниял ахирлъизегӀан щибаб къоялъ дун нужеда цадахъ вугевлъиги лъай. Амин!