Матфей 27 - Аллагьасул Калима

27 бетӀер ГӀиса Пилатида цеве чӀезавула

¹ Дуниял рогьарабго, чӀахӀиял кашишзабазги халкъалъул чӀухӀби-хӀакимзабазги – киназго ГӀисада дандечӀараб хӀукму гьабуна гьев чӀвазе къотӀизе.

² Вухь-вухьун вачун ГӀиса кьуна Пилат сардарасухъе.

³ ГӀисае хилиплъарав Ягьудаца, гьев чӀвазе хӀукму гьабун букӀин лъайдал, жинцаго гьабуралдаса ракӀ бухӀун, доб лъеберабго гӀарцул гъурущ чӀахӀиял кашишзабазухъеги чӀухӀби-хӀакимзабазухъеги нахъе кьуна.

⁴ Гьес абуна: «ГӀайибго гьечӀеб бидул хӀакъги мунагьги ккана диде». Гьез абуна: «Нижеца щиб гьабеянха мун вугев? Дур иш буго гьеб».

⁵ Мукъадасаб Рокъобе рехун гьеб гӀарацги тун, Ягьуда нахъе ана ва живго жинцаго гъанкъана.

⁶ Гьеб гӀарацги кодобе босун, чӀахӀиял кашишзабаз абуна чиясул бидухъ щвараб гӀарац, Къануналда рекъон, Мукъадасаб Рукъалъе садакъаде кьезе бегьуларилан.

⁷ Цинги гьез, цоцазда дандбан, хӀукму гьабуна гьеб гӀарцухъ «ЩагӀихъанасул хур» абулеб бакӀ бичун босизе ва гьеб апарагзаби рукъизе хабалазе тезе.

⁸ Гьединлъидал гьеб бакӀалда жакъа къоялделъагӀанги «Бидул хур» абун цӀар хутӀун буго.

⁹ Гьедин ритӀухълъана Иеремия аварагасул гьадинал рагӀаби: «Ва гьезие щвана лъеберго гӀарцул гъурущ, гьез багьа чӀезабурасухъ кьураб мухь, гьединаб букӀана Исраилил наслуялъул цо-цо гӀадамаз гьесухъ чӀезабураб багьа. Гьеб гӀарцухъги щагӀихъанасул хур босана гьез.

¹⁰ Гьедин лъазабуна дида БетӀергьанас».

¹¹ Сардарасда цеве чӀезавуна ГӀиса. Сардарас ГӀисада гьикъана: – Мунищха кколев жугьутӀазул ПарччахӀ? ГӀисаца жаваб кьуна: – Дуца абулеб бугоха гьедин.

¹² Амма чӀахӀиял кашишзабазги чӀухӀби-хӀакимзабазги жинде гӀайиб гӀунтӀизабулеб мехалъ, ГӀисаца жаваб кьечӀо.

¹³ Гьебмехалъ Пилатица гьесда абуна: – Дуда рагӀулеб гьечӀищ гьаз, дуде гӀайиб гӀунтӀизабун, гьабулеб бугеб нугӀлъи?

¹⁴ Цо рагӀи абунцин ГӀисаца жаваб кьечӀелъул, сардар цӀакъ гӀажаиблъун-хӀикмалъун хутӀана.

ХӀукму гьабула Барабба виччазе ва ГӀиса хъанчида вазе

¹⁵ ГӀадат букӀана халкъалъе бокьарав цо туснахъ сардарас байрамалъул къоялъ къватӀиве виччалеб.

¹⁶ Гьеб заманаялда туснахъалъув вукӀана Барабба абун цо цӀар рагӀарав такъсирчи.

¹⁷ Халкъ бакӀарараб мехалъ Пилатица гьикъана: – Нужехъе къватӀиве щив виччазе нужее бокьилеб: Бараббайищ яги МасихӀилан жинда абулев ГӀисайищ?

¹⁸ (Пилатида лъалеб букӀиндалха жахӀда-хӀусудалъ хӀал гьабун жиндихъе кьурав чи гьев вукӀин.)

¹⁹ ХӀукму къотӀизе тахида гӀодов чӀун Пилат вугеб мехалъ, чӀужуялъ чи витӀун вачӀана, нолъ ГӀисал рахъалъ бихьараб квешаб макьуялъ гӀазаб кьолеб бугин жиндие, дуца гьев щибго гӀайиб гьечӀев валиясе расги гьабугейилан абизе.

²⁰ Амма чӀахӀиял кашишзабазги чӀухӀби-хӀакимзабазги халкъ мукӀур гьабун букӀана Барабба къватӀиве виччаян ва ГӀиса чӀвазе къотӀеян гьаризе.

²¹ Сардарас гьезда гьикъана: – Гьел кӀиязулго кинавав къватӀиве виччазе нужее бокьилеб? – Барабба, – ян абуна гьез.

²² Цинги Пилатица гьезда гьикъана: – Гьедин батани, МасихӀилан жинда абулев ГӀисада щибха гьабилеб? Гьел киназго абуна: – Хъанчида вазе ккола гьев!

²³ Пилатица гьебмехалъ абуна: – Гьас гьабураб квешлъигӀаги щиб? Амма гӀадамал тӀадеги цӀакъ ахӀдезе лъугьана: – Хъанчида вазе ккола гьев!

²⁴ Гьабизе кӀолеб жо гьечӀеблъи бихьун, хӀатта гъалмагъир ккезехъин букӀин бичӀчӀун, Пилатица, лъимги бачӀинабун, кверал чурана, гьел гӀадамазда бихьуледухъ. Цинги гьес абуна: – Щибго гӀайиб гьечӀев гьав чиясул бидул хӀакъ дида тӀад гьечӀо. Гьаб иш нужер буго.

²⁵ Кинабго халкъалъ жаваб кьуна: – Гьесул бидул хӀакъ нижедаги нижер лъималаздаги тӀад буго.

²⁶ Гьебмехалъ Пилатица Барабба гьезухъе виччана. ГӀиса цӀалаца вухеян ва хъанчида ваян амру гьабуна.

БагӀараб гӀабаги зазил хьухьун гьабураб тажги

²⁷ Цинги сардарасул рагъухъабаз ГӀиса вачана претория абулеб кӀалгӀаялъул азбаралъуве. Рагъухъабазул тӀубараб полк бахъинабун букӀана гьенибе.

²⁸ ТӀаса ретӀелги бахъун, бецӀбагӀараб ххамил гӀаба ххола ГӀисада тӀад.

²⁹ Зазил хьухьун гьабураб тажги лъола гьесул ботӀрода, кваранаб квералъухъе гӀансаги кьола. Цинги, гӀад-хочӀие гьавун, гьесда цере накабазда чӀола: «ЖугьутӀазул парччахӀ чӀахъаги!» – ян ахӀулаго.

³⁰ Гьел ГӀисаде тударула, гӀонсоца бетӀер бухула.

³¹ ХӀалхьезегӀан инжит-хӀакъирги гьавун, доб гӀабаги тӀаса бахъун, жиндирго ретӀел ретӀуна гьесда тӀад. Ва хъанчида вазе вачун уна.

ГӀиса хъанчида вала

³² Гьев вачун унаго, хуриса вачӀунев вукӀарав Киренеялдаса цо Симон абулев чи данде ккана. Гьесда баччизабуна гьез ГӀисае гьабураб хъанч.

³³ Гьел щвана Голгота абулеб бакӀалде. Гьелъул магӀна ккола «Гвангвара гохӀ».

³⁴ КьогӀлъизабураб чагъир кьуна гьесие гьекъезе. Цо кӀалдибеги босун, ГӀисаца инкар гьабуна гьелдаса.

³⁵ Гьевги хъанчида ван, можоро тӀамун гьесул ретӀел жидедаго гьоркьоб бикьана рагъухъабаз.

³⁶ Хъаравуллъи гьабун гьенирго чӀана гьел.

³⁷ «ЖугьутӀазул парччахӀ ГӀиса», – абун, гьесде гӀунтӀизабураб гӀайиб тӀад хъвараб хъарщиги чӀвана гьесул бетӀералда тӀадехун.

³⁸ КӀиго хъачагъги вукӀана гьесда цадахъ хъанчида ван: цояв кваранаб рахъалда, цояв квегӀаб рахъалда.

³⁹ Цересан унел гӀадамаз, гьев хӀакъир гьавун абулеб букӀана: – Ле, щущазабун Мукъадасаб Рукъгун, лъабго къоялде гьеб цӀидасан балев багьадур, мунго хвасар гьаве!

⁴⁰ Мун Аллагьасул Вас ватани, хъанчидаса гӀодове рещтӀа!

⁴¹ Гьединго чӀахӀиял кашишзабиги, диниял гӀалимзабиги ва чӀухӀби-хӀакимзабиги, гьев хӀакъир гьавун гаргадулел рукӀана:

⁴² – Цогидал хвасар гьарилилан вукӀанин, живго хвасар гьавун бажаруларев чи. Исраилил умматалъул парччахӀила жив! РещтӀа абе гьанже хъанчидаса гъоркье, гьебмехалъ божила нилъ гьесда.

⁴³ Аллагьасе живго аманат гьавун вукӀанин, Аллагь гьасдаса рази ватани, гьанже гьес хвасар гьавеян абе. Аллагьасул Вас вугилан гурищ гаргадилев вукӀарав?

⁴⁴ Гьесда цадахъ хъанчида рарал хъачагъалги рукӀана гьединго ГӀисаде хьанделел.

ГӀисал рухӀ босун уна

⁴⁵ Къалъул гӀужалда тӀолабго ракь бецӀлъана. Гьеб бецӀлъи тӀаса инчӀо сагӀат лъабго тӀубазегӀан.

⁴⁶ СагӀат лъабго тӀубалеб мехалъ, цо гучаб гьаракь гьабун, ахӀана ГӀисаца: – Эли, Эли! Лема шевактани! – абун. (Гьелъул магӀна букӀана: «Дир Аллагь! Дир Аллагь! Щай дуца дун рехун тарав?»)

⁴⁷ Гьенир рукӀарал цо-цояз, гьеб рагӀараб мехалъ абулеб букӀана Иляс аварагасде ахӀи балеб бугин гьесилан.

⁴⁸ Гьебмехалъ векерун ун гьезул цояс, цӀекӀаб чагъиралдаги ччун, чӀорто босун бачӀана ва, гӀорол тӀогьибги бухьун, бегьана гьесухъе.

⁴⁹ Цо-цояз абулеб букӀана: «ЧӀа, гьанже бихьилин гьев хвасар гьавизе Иляс авараг вачӀунищали».

⁵⁰ Цоги нухалъ гучаб гьаракьги гьабун, хвана ГӀиса.

⁵¹ Гьале Мукъадасаб Рокъоб хирияб бакӀалда бигъун букӀараб пардав тӀарадаса ахаде щвезегӀан кӀихӀи бихъун ана, ракь багъарана, кьураби риххун ана,

⁵² хабал кьватӀун ана, хваралъуса чӀаголъун, гьениса къватӀире лъугьун рачӀана церего хварал гӀемерал вализаби.

⁵³ ГӀиса хваралъуса вахъараб мехалъ, гьесда цадахъ Мукъадасаб шагьаралде рачӀана гьелги, ва гьенир гӀезегӀан чагӀазда рихьана гьел.

⁵⁴ Ракь багъариги цогидал хӀикматал ишалги рихьараб мехалъ, аскаралъул нусилбетӀерги ГӀиса цӀунун гьесда цадахъ рукӀарал рагъухъабиги цӀакъ хӀинкъана. Гьез абуна: – ХӀакъикъаталдаги гьав чи Аллагьасул Вас вукӀун вуго.

⁵⁵ Галилеялдаса рахъарал гьесда цадахъ рачӀун, ГӀисае хъулухъалъе чӀарал гӀемерал руччабиги рукӀана гьенир, нахъегӀан чӀун ралагьун. Гьезда гьоркьор рукӀана:

⁵⁶ Магдалаялдаса Марямги, Якъубил ва Юсупил эбел Марямги, Зебедайил васазул эбелги.

ГӀиса хабалъ вукъула

⁵⁷ МаркӀачӀубер рукӀкӀараб мехалъ, гьениве вачӀана Ариматея шагьаралдаса Юсуп абулев цо бечедав чи. ГӀисал мурид вукӀана гьевги.

⁵⁸ Пилатихъе ун гьес гьарана ГӀисал жаназа букъизе кьеян. Пилатица изну кьуна.

⁵⁹ Юсупица ГӀисал жаназа нахъе босула, бацӀцӀадаб хӀебтил мусруги бан,

⁶⁰ гьеб букъула кьурулъ бикӀун жиндиего хӀадурун букӀараб хабалазул нохъода цӀияб хабалъ. Нохъодул кӀалтӀе цо кӀудияб гамачӀги гиризабун тун, гьев нахъе ана.

⁶¹ ГӀиса хабалъ лъолеб мехалъ, дандритӀухъе гӀодорчӀун рукӀана Магдалаялдаса Марямги ва дойцояй Марямги.

⁶² Гьеб букӀана рузман къо. Нахъисеб къоялъ данделъун чӀахӀиял кашишзабиги фарисеялги Пилатихъе ана ва гьез абуна:

ГӀисал хоб цӀунизе хъаравулзаби тола

⁶³ – Я, бетӀерчӀахъад! Нижеда ракӀалде щвана гьанже: чӀаго вугеб мехалъ гьадав гьерсихъанас абулаан хун лъабго къоялдасан хваралъуса вахъине вугилан.

⁶⁴ Гьединлъидал лъабго къо инегӀан досул хоб цӀунизе хъаравулзаби тӀаме. Досул муридаз, бикъун гьеб жаназагун, гӀадамазда абизе бегьула ГӀиса чӀаголъун вугилан. Досулалдасаги кӀудияб гьереси букӀина гьеб.

⁶⁵ Пилатица гьезда абуна: – Гьаниса рачун хъаравулзабигун, нужеего бокьухъе цӀуне гьеб хоб.

⁶⁶ Инеги ун, гьез хоб цӀунизе тадбир гьабуна: ганчӀида мугьру чӀвана ва гьенир хъаравулзаби тана.