Матфей 26 - Аллагьасул Калима

26 бетӀер Ягьудиязул кашишзаби ургъула ГӀиса тӀагӀинавизе

¹ Гьеб хабар бицун лъугӀараб мехалъ, жиндирго муридазда ГӀисаца абуна:

² – Нужеда лъалаха кӀиго къоялдасан Пасхаялъул байрам букӀине бугеблъи. Гьеб къоялъ ГӀадамил Лъимадуе хилиплъизе руго ва гьев хъанчида вазе вуго.

³ Кайафа абун жинда цӀар бугев бищунго кӀудияв кашишасул кӀалгӀаялъуре данделъун рукӀана гьебмехалъ чӀахӀиял кашишзабиги халкъалъул чӀухӀби-хӀакимзабиги.

⁴ Гьез хӀукму гьабуна, хӀилла-рекӀкӀалдалъун кквезеги ккун, ГӀиса чӀвазавизе кколилан.

⁵ Амма байрамалъул къоялъ бегьиларин, халкъалъул дандечӀей багъаризе бегьулилан абулеб букӀана гьез.

Цо чӀужугӀаданалъ ГӀисае гьабураб лъикӀлъи

⁶ Барасалъ унтарав Симон абулев чиясул бакӀалда Бетаниялда кваназе гӀодов чӀун ГӀиса вугеб мехалъ,

⁷ цӀакъ къиматаб ва бацӀцӀадаб махӀгьуинаб нахул цӀураб щагӀил сурахӀиги босун ячӀарай цо пуланай чӀужугӀаданалъ, гьеб гьесул ботӀроде чӀехьола.

⁸ Гьеб бихьараб мехалъ, ГӀисал муридазул ццин бахъана: – Щай гьабгощинаб нах гӀадада хвезабулеб?

⁹ Гьеб нахги хирияб багьаялде бичун, гьелъухъ щвараб гӀарац мискинзабазе садакъаде кьезе бегьилаан.

¹⁰ Гьезул пикру бичӀчӀун, ГӀисаца гьезда абуна: – Щай нужеца гьей къварид гьаюлей? Дие лъикӀлъи гьабулейлъидал гьей йигей.

¹¹ Мискинзаби кидаго ратила нужеда аскӀор. Дунин абуни, кидаго гуро нужгун вукӀунев.

¹² Дир черхалда тӀаде махӀгьуинаб нахги тӀун, гьей чӀужугӀаданалъ хабалъейин дун къачӀалев вугев.

¹³ ХӀакълъун абулеб буго дица нужеда: тӀолабго дуниялалда гьеб Рохалил хабар лъазабунщинаб бакӀалда бицен букӀине буго, гьай гӀаданги ва гьалъ дие гьабураб лъикӀлъиги ракӀалде щвезабун.

Ягьуда Искариот ГӀисае хилиплъула

¹⁴ Гьебмехалъ анцӀила кӀиявго чапарасда гьоркьов вукӀарав Ягьуда Искариот абулев чияс, чӀахӀиял кашишзабазухъе ун, гьезда гьикъана:

¹⁵ – ГӀиса дица нужер кверде кьуни, щиб нужеца дие кьелеб? – ан. Лъеберго гӀарцул гъурущ кьезе къотӀи гьабуна гьез Ягьудае.

¹⁶ Гьелдаса нахъе Ягьудаца балагьулеб букӀана ГӀиса гьезул кверде кьезе санагӀалъи бугеб бакӀги заманги.

Пасхаялъул квен

¹⁷ РеччичӀел Панкъазул Байрамалъул тӀоцебесеб къоялъ, ГӀисахъе рачӀун, муридаз гьикъана: – Пасхаялъул квен киб кваназе дуе бокьилеб? Нижеца хӀадур гьабила гьеб.

¹⁸ ГӀисаца абуна: – Шагьаралда вугев цо пуланав чиясухъе ун, гьесда абе нужеца, жиндир болжалги гӀагарлъун бугелъул, Пасхаялъул байрам жиндирго муридазда цадахъ дур бакӀалда тӀобитӀилин абизе ритӀанин ниж нижер МугӀалимасилан.

¹⁹ ГӀисаца абурабги тӀубазабун, гьез пасхаялъул квенги хӀадур гьабуна.

²⁰ Дуниял рукӀкӀараб мехалъ вачӀун, анцӀила кӀиявго муридасда цадахъ кваназе гӀодов чӀана ГӀиса.

²¹ Кваналел рукӀаго, гьес абуна: – ХӀакълъун абулеб буго дица нужеда: нужер цояв дие хилиплъила.

²² Кутакалда пашманлъана гьел. Цин-циял рахъун цӀехана: – Я, БетӀерчӀахъад! Дун гуро гурищ? – абун.

²³ ГӀисаца гьезда абула: – Дида цадахъ гьаб гъадринибе квер бегьулев вугев чи хилиплъизе вуго дие.

²⁴ ГӀадамил Лъимадул иш ккезе буго ТӀухьдузда хъван бугеб куцалда. Амма квешаб балагь рещтӀине бугебха ГӀадамил Лъимер тушбабазул кверде кьурав чиясде. Дуниялалда вижичӀевани лъикӀан гьесие.

²⁵ Гьесие хилиплъарав Ягьудаца гьикъана гьебмехалъ: – Дун гуро гурищ, Рабби? – ян. ГӀисаца гьесда абуна: – Дуца абулеб бугоха гьедин.

²⁶ Гьедин кваналел рукӀаго, ГӀисаца, цо чедги кодобе босун, тӀаде дугӀаги гьабун, бек-бекун муридазухъе кьолаго, абуна: – Босе, кванай. Гьаб буго дир черх.

²⁷ Цинги, чогърол цӀураб щурунги кодобе босун, Аллагьасе реццги гьабун, гьезухъе кьолаго, ГӀисаца абуна: – Кинацаго гьекъе гьаб щурумалъуса.

²⁸ Гьаб буго киназулго мунагьал чуризе гӀоло тӀолеб дир би – ЦӀияб КъотӀи щулалъиялъе тӀолеб би.

²⁹ Дица нужеда абулеб буго: дир Инсул ПарччахӀлъиялда цӀияб чагъир нужеда цадахъ гьекъолеб къо тӀаде гӀунтӀизегӀан, дица гьаб цӀолбол цӀураб жа тӀокӀаб гьекъезе гьечӀо.

³⁰ Цинги гьез туркаби ахӀана, гьениса рахъун ун, Зайтуналъул магӀарде рахана.

«Дуца дидаса инкар гьабила»

³¹ Гьебмехалъ ГӀисаца гьезда абула: – Дида аскӀоб яхӀ рехараб жо гьабизе буго къаси нужеца кинацаго. ТӀехьалда хъван бугелъул: «Дица вехь чӀвала, гӀиял рехъенги рахъ-рахъалде тӀурун ина».

³² Хун тун хадув чӀаголъараб мехалъ нужедаса цеве щвела дун Галилеялде.

³³ Пётрица гьесда абуна: – Киназго яхӀ реханиги, дица киданиги яхӀ рехиларо.

³⁴ ГӀисаца гьесда абуна: – ХӀакълъун абулеб буго дица дуда: гьанже радакье хӀелеко бахъиналде лъабцӀул инкар гьабизе буго дуца дидаса.

³⁵ Пётрица гьесда абуна: – Дуда цадахъ хвезе кканиги, дица дудаса инкар гьабизе гьечӀо, – ян. Гьедин абулеб букӀана киналго цогидал муридазги.

Гетсемания ахикь ГӀисал гьари-дугӀа

³⁶ Цинги ГӀиса гьезда цадахъ Гетсемания абулеб бакӀалде уна. Гьес муридазда абула: – Нуж гьанир гӀодор чӀун рукӀа, дове ун, Аллагьасе гьари-дугӀа гьабун дун вачӀинегӀан.

³⁷ Пётрги Зебедайил кӀиявго васги рачана ГӀисаца жиндаго цадахъ, ва гьев ккана къваридаб ва пашманаб ургъалилъе. Гьебмехалъ ГӀисаца гьезда абула:

³⁸ – Хвалил гӀазаб буго дир рекӀее. Нуж гьанир дида цадахъ рукӀа ва рорчӀуда чӀа.

³⁹ Цинги, дагьав довегӀанги ун, кӀалагъоркьеги речӀчӀун, гьари-дугӀаялда абулеб букӀана гьес: – Я, дир Эмен! Бегьулеб батани, гьеб хвалил лълъар гьекъезабуге дида. Амма дие бокьухъе гуреб, дуего бокьухъе букӀине биччанте.

⁴⁰ ТӀадвуссун вачӀиналде, муридал кьижун ратана. Гьес Пётрида абуна: – Цо сагӀаталъ дида цадахъ кьижичӀого чӀезе кӀолеб букӀинчӀебищ нужеда?

⁴¹ Воре, нуж рорчӀуда чӀа! Гьари-дугӀаялде русса, нужго къосинарунгутӀизе. Инсанасул рухӀ – лебалаб, черх – загӀипаб.

⁴² Нахъеги довегӀанги ун, гьари-дугӀа гьабуна: – Я, дир Эмен! Гьеб хвалил лълъар дица гьекъечӀого гӀолареб батани, дуе бокьухъе букӀине биччанте.

⁴³ Гьанжеги тӀадвуссун щведал, ГӀисада гьел ратула, беразул тӀелхал бакӀлъун, кьижун ккун.

⁴⁴ Гьелги жалго тун, нахъеги довегӀанги ун, лъабабизеги гьари-дугӀаялда долго рагӀаби абизе лъугьана ГӀиса.

⁴⁵ Цинги тӀадвуссун вачӀун, гьес муридазда абуна: – Нуж жеги рахӀаталда кьижунищ ругел? Гьале тӀаде гӀунтӀана доб ГӀадамил Лъимер мунапикъзабазул кверде кьолеб сагӀат.

⁴⁶ Гьа, рахъа, доле хиянатчи тӀаде щолев вугин.

ГӀиса ккун вачун уна

⁴⁷ ГӀисаца гьедин абулаго, гьале тӀаде щвана Ягьуда – дол анцӀила кӀигояздасан цояв. Гьесда цадахъ хвалчабигун, тӀилалгун тӀаде бачӀунеб букӀана чӀахӀиял кашишзабазги чӀухӀби-хӀакимзабазги битӀараб гӀемераб халкъ.

⁴⁸ Хиянатчияс гьезда лъазабун букӀана: «Дица убач гьабурав чи ГӀиса вукӀина. Цинги ккве нужеца гьев».

⁴⁹ Ягьуда битӀун ГӀисада аскӀове уна. – Ассаламу гӀалайкум, Рабби! – янги абун, ГӀисада убач гьабула.

⁵⁰ ГӀисаца гьесда абула: – Дурго мурад тӀубазабе, гьудул, гьанже. ГьебсагӀат тӀадречӀчӀун гӀадамаз ГӀиса къан ккола.

⁵¹ Гьебмехалъ ГӀисал цо муридас лъалиниса бахъун хьвагӀараб хвалчаца цо чиясул (гьев вукӀана бищунго кӀудияв кашишасул рагьтӀател) гӀин къотӀун рехула.

⁵² ГӀисаца гьев муридасда абуна: – Хвалчен лъалиниб лъе! Хвалчен бахъарав хвалчадалъун хвезе вуго.

⁵³ Дие кумекалъе гьабсагӀат малаикзабазул анцӀила кӀигоялдаса цӀикӀкӀун бо битӀеян дирго Инсуда гьаризе дида кӀоларебиланищ дуда ракӀалде кколеб?

⁵⁴ ТӀухьдузда хъвавухъе лъугьинарогури гьебмехалъ.

⁵⁵ ГьебсагӀаталъ ГӀисаца гьел гӀадамаздехун вуссун абуна: – Хвалчабигун, тӀилалгун хъачагъасде гӀадин кӀанцӀанагури нуж дун кквезе. Щибаб къоялъ халкъалъе вагӀза-насихӀат гьабулев Мукъадасаб Рокъов гӀодов чӀун вукӀунаангури дун, гьениб нужеца диде квер борхичӀо.

⁵⁶ Амма гьаб кинабго лъугьунеб буго аварагзабазул ТӀухьдузда хъвараб ритӀухълъизелъун. Гьебмехалъ киналго муридал, вукӀаралъув гьевги тун, лъутун уна.

ГӀиса тӀадегӀанаб судалда цеве чӀезавула

⁵⁷ Гьез ГӀиса вачана Кайафа абулев бищунго кӀудияв кашишасул бакӀалде. Гьенир данделъун рукӀана диниял гӀалимзаби ва чӀухӀби-хӀакимзаби.

⁵⁸ Пётрги вукӀана нахъа-нахъа чӀун вачӀунев, ва гьездаго хадув цун, бищунго кӀудияв кашишасул азбаралъухъе щвана гьев. Жаниве лъугьун, гӀодов чӀана.

⁵⁹ Гьебмехалъ чӀахӀиял кашишзабазги тӀолабго тӀадегӀанаб судалъги балагьулеб букӀана ГӀиса чӀвазе къотӀиялъе гӀураб гӀайиб гьесде гӀунтӀизабизе гьересинугӀлъи.

⁶⁰ Амма гьеб гьезухъе щолеб букӀинчӀо, гьересинугӀлъиялъе гӀезегӀанго гӀадамал гьенире рачӀунел рукӀаниги. Амма ахиралда кӀиго чи вачӀун,

⁶¹ гьез бицана, гьас абулеб букӀанин Аллагьасул Мукъадасаб Рукъ щущазабизе ва лъабго къоялде цӀидасан гьеб базе кӀолин жиндаян.

⁶² Гьебмехалъ, тӀаде вахъун, бищунго кӀудияв кашишас ГӀисада гьикъана: – Дуда данде нугӀлъи гьабун гьаз бицунеб бугеб жоялъе жаваб кьезе рагӀигойищ дур гьечӀеб?

⁶³ ГӀиса вуцӀцӀун чӀун вукӀана. Бищунго кӀудияв кашишас гьесда абуна: – ХӀакъав Аллагьасул цӀар бахъун гьарулеб буго дица дуда: Аллагьасул Вас МасихӀ мун ватани, вугилан абе нижеда.

⁶⁴ ГӀисаца гьесда абуна: – Дуцаго абулеб бугоха гьедин, амма дица нужеда абулеб буго: гьанжеялдаса хадув ГӀадамил Лъимер нужеда вихьила Къудратав Аллагьасул кваранаб рахъалда гӀодов чӀун ва зобалазул накӀкӀул парчабазда тӀад вачӀунев.

⁶⁵ Гьебмехалъ бищунго кӀудияв кашиш, жиндаго тӀад букӀараб ретӀелги тӀутӀун балаго, ахӀдезе лъугьана: – Гьас гӀасиял-пасикъал жал рицунел руго. ТӀокӀалги сундуе нилъее нугӀзал къваригӀарал? Гьале гьабсагӀат рагӀанагури гьасул гӀасиял-пасикъал рагӀаби. Щиб пикру нужер бугеб?

⁶⁶ Киназго абуна гьев чӀвазе къотӀизе кколилан.

⁶⁷ Цинги гьел ГӀисал бадире тударизе, гьев вухизе лъугьана.

⁶⁸ – Мун авараг ватани, лъица кьабурабали бице, МасихӀ! – анги абун, гьесул кӀаркьен чӀвалаан.

Пётрица ГӀисадаса инкар гьабула

⁶⁹ Азбаралъув гӀодов чӀун вукӀарав Пётрида аскӀое ячӀун, цо гъаравашалъ абуна: – Мунги вукӀанагури Галилеялдаса ГӀисада цадахъ.

⁷⁰ Киназдаго цебе нагӀадала ккун, Пётрица абуна дуца бицунеб жо щибилан.

⁷¹ Пётр кавудухъехун унаго, гьений йикӀарай цоги гъаравашалда вихьана гьев. Гьенир аскӀор ругезда гьелъги абуна гьав чи Назареталдаса ГӀисада цадахъ вукӀанилан.

⁷² Гьев чи жинда лъаларилан гьедун нагӀадала ккуна Пётрица гьанжеги.

⁷³ ГӀемер мехго балелде гьенир рукӀарал гӀадамаз, аскӀоре рачӀун, Пётрида абуна: «Гьайгьай, мунги дозул чи вуго. МацӀалъухъ балагьун лъалеб буго мун ватӀа вахъизе».

⁷⁴ Гьебмехалъ Аллагьасул цӀар бахъун гьедаризе лъугьана гьев чи жинда лъаларилан. ГьебсагӀат рагӀана гӀегӀедулеб хӀелкил гьаракь.

⁷⁵ Пётрида ракӀалде щвана радакье хӀелеко бахъиналде, лъабцӀулго инкар гьабилин дуца дидасайилан ГӀисаца жиндаго абун рукӀарал рагӀаби. КъватӀиве ун гӀек-гӀекиялда гӀодана Пётр.