Матфей 25 - Аллагьасул Калима

25 бетӀер АнцӀго ясалъул мисал

¹ Гьебмехалъ Зобалазул ПарччахӀлъи релълъине буго бахӀарасда дандчӀвазе сардилъ нахул чирахъалгун бахӀаралъул бакӀалде арай анцӀго ясалда.

² Гьезул щугояй тохай йикӀун йиго, щугояй цӀодорай йикӀун йиго.

³ Тохал ясаз чирахъал росун руго, чирахъазухъе тӀезе нах цадахъ босун гьечӀо.

⁴ ЦӀодоразин абуни, пурччби цӀун нахги босун буго чирахъазда цадахъ.

⁵ БахӀарав кватӀун вуго, гьесда дандчӀвазе арал киналго ясалги гъапуллъун ккун руго, цинги кьижун ккун руго гьел.

⁶ Сордо бащалъараб мехалъ, цо ахӀи бахъун буго, гьале бахӀарав вачӀунев вугин, гьесда дандчӀвазе рахъаян.

⁷ Гьебмехалъ, тӀаде рахъун, киналго ясал чирахъал рекъе-решезаризе лъугьун руго.

⁸ Тохал ясаз цӀодоразда абун буго жидер чирахъазухъе тӀезе нах кьейин, гьел свинехъин ругилан.

⁹ ЦӀодорал ясаз гьезда абун буго, кӀиязего хвараб гьабичӀого, нужерго чирахъазе нах босизе нуж тукаде ун лъикӀилан.

¹⁰ Нахуда хадур гьел араб мехалъ, бахӀарав вачӀун вуго. ХӀадурго чӀун ратаралги цадахъ рачун, бахӀарав бертадул рокъове лъугьун вуго. Нахъасан нуцӀаги рахан буго.

¹¹ Цинги рачӀун руго дол ясал. – Я, бетӀерчӀахъад! Я, бетӀерчӀахъад! НуцӀа ричӀе нижее, – ян ахӀдезе лъугьун руго гьел.

¹² – ХӀакълъун абулеб буго дица нужеда: дида лъалел чагӀи гуро нуж! – абун жаваб кьун буго бахӀарас.

¹³ Гьединлъидал, рорчӀуда чӀа нуж: я къо, я сагӀат лъаларелъул нужеда.

Меседил гъурщазул мисал

¹⁴ Цоги гьеб релълъинабизе бегьула сапаралъ иналде, ахӀун рагьтӀателалгун, гьезухъе цӀунизе жиндирго боцӀи-рикъзи кьурав цо пуланав чиясда.

¹⁵ Цоясухъе гьес кьун буго щуазарго месед, цогиясухъе – кӀиазарго месед, лъабабилесухъе – азарго месед, – щивасухъе гьесул бажари-гьунаралда рекъон. Цинги сапаралъ ун вуго.

¹⁶ Щуазарго месед щварас, гьебсагӀат инеги ун, гьелдасан щуазаргоги месед хайирлъизабун буго.

¹⁷ КӀиазарго щварас гьединго кӀиазаргоги месед хайирлъизабун буго.

¹⁸ Азарго месед щварас, инеги ун, бухъун гвендгун, ракьулъ бахчун буго жиндирго бетӀергьанасул месед.

¹⁹ Гьелдаса гӀемераб заман индал, тӀадвуссун вачӀун, гьезул бетӀергьанас рагьтӀателал ахӀун руго доб меседалъул хӀисаб-суал гьабизе.

²⁰ Щуазарго месед жиндихъе кьун букӀарав рагьтӀателас, вачӀун гьесда абун буго: «Гьале, бетӀерчӀахъад, дуца дихъе кьун букӀараб щуазарго месед, гьале гьелдасан хайирлъараб щуазарго меседги».

²¹ Гьесул бетӀергьанас абун буго гьебмехалъ: «ХӀалчӀахъаги дур, дир лъикӀав ва ритӀухъав рагьтӀател, гьитӀинаб божилъиялъе дуца дида цебе ритӀухълъи бихьизабидал, кӀудиябги божун тела дуда. Дурго бетӀергьанасулгун рохел гӀахьал гьабе».

²² КӀиазарго месед жиндихъе кьун букӀарав дов рагьтӀателас вачӀун гьесда абун буго: «Гьале, бетӀерчӀахъад, дуца дихъе кьун букӀараб кӀиазарго месед, гьале гьелдасан хайирлъараб кӀиазарго меседги».

²³ Гьесул бетӀергьанас абун буго гьебмехалъ: «ХӀалчӀахъаги дур, дир лъикӀав ва ритӀухъав рагьтӀател, гьитӀинаб божилъиялъе дуца дида цебе ритӀухълъи бихьизабидал, кӀудиябги божун тела дуда. Дурго бетӀергьанасулгун рохел гӀахьал гьабе».

²⁴ Азарго месед жиндихъе кьун букӀарав рагьтӀателас вачӀун гьесда абун буго: «Я, бетӀерчӀахъад! Дида лъалаан мун дуцаго бекьичӀеб лъилъулев, дуцаго кӀутӀичӀеб бищулев, согӀав чи вукӀин.

²⁵ Дукьа хӀинкъун, дица доб азарабго месед ракьулъ бахчун тун букӀана. Гьале нахъе босе дурго гьаб».

²⁶ «Гьай, квешав ва кӀвахӀалав рагьтӀател! – ан абун буго гьесул бетӀергьанас. – Дуда лъалеб букӀун буго дицаго бекьичӀеб лъилъулев, дицаго кӀутӀичӀеб бищулев чи дун вукӀин.

²⁷ Гьединлъидал дуца гьаб дир месед базаргабазухъе къарзалъ кьезе кколаан. Жакъа тӀадвуссун вачӀараб мехалъ, хайиргун цадахъ нахъе щвелаангури гьеб дихъе».

²⁸ Цинги абун буго, гьасухъаги босун, гъоб азарабго месед дов анцӀазарго месед бугесухъе кьейилан.

²⁹ «Кодолъи бугевщинасе, гӀунги тӀокӀлъиледухъ, тӀадеги кьезе буго, кодолъи гьечӀесухъа бугебги бахъизе буго.

³⁰ Гьев пайда гьечӀев рагьтӀател дове бецӀаб къотӀнове рехе. ГӀодилел ва цаби къерщезарулел рукӀина дора гӀадамал».

МасихӀица суд гьабила

³¹ Киналго малаикзабигун цадахъ жиндирго хӀалкӀолъигун ГӀадамил Лъимер вачӀараб мехалъ, къудраталъул тахида гӀодов чӀела гьев.

³² Киналго халкъал данделъила гьесда цере гьебмехалъ, ва вехьас чахъабиги цӀцӀаниги ратӀа гьарулел гӀадин, цоцаздаса ратӀа гьарила.

³³ Чахъаби гьес жиндирго кваранаб рахъалда чӀезарила, цӀцӀани квегӀаб рахъалда чӀезарила.

³⁴ Гьебмехалъ ПарччахӀас кваранаб рахъалда ругезда абила: «Ле, дир Инсул баркат лъурал гӀадамал, дуниял бижаралдаса нахъего нужее къачӀан букӀараб ПарччахӀлъи босизе рачӀа.

³⁵ Щайин абуни, дун вакъун хутӀидал – нужеца кваназавуна, къечон хутӀидал – гьекъезавуна, сапаралда вукӀун, къотӀнов хутӀидал – рокъове вачун, гьоболлъи гьабуна.

³⁶ ТолохӀочон хутӀидал – нужеца дие ретӀел кьуна; дун унтараб мехалъ – нуж диде раккизе рачӀана; дун туснахъалъуве ккедал – нуж дихъе хьвадана».

³⁷ Гьел муъминзабаз абила: «Я, БетӀерчӀахъад! Вакъун ватун – кида нижеца мун кваназавурав? Къечон ватун – кида гьекъезавурав?

³⁸ КъотӀнов ватун – кида нижеца мун рокъове вачарав? ТолохӀочон ватун – кида нижеца дуе ретӀел кьураб?

³⁹ Унтун яги туснахъалъув ватун – кида ниж духъе рачӀарал?»

⁴⁰ ПарччахӀас, гьезие жаваб кьун, абила: «ХӀакълъун абулеб буго дица нужеда: дир бищунго гӀисинал вацазул цоясениги нужеца гьабурабщинаб, гьеб буго дие гьабураб лъикӀлъи».

⁴¹ КвегӀаб рахъалда ругезда абила гьес гьебмехалъ: «Дида аскӀоса нахъе а, нагӀана кьураб агьлу! Илбисалъеги гьелъул рахъ ккурал малаикзабазеги къачӀан бугеб абадияб цӀадулъе а.

⁴² Дун вакъун хутӀидал – кваназавичӀо нужеца, къечон хутӀидал – гьекъезавичӀо.

⁴³ Сапаралда вукӀун дун къотӀнов хутӀидал – рокъове вачун, гьоболлъи гьабичӀо нужеца, дун гӀицӀтолохӀоч хутӀидал – ретӀине ретӀел кьечӀо, дун унтараб мехалъ ва туснахъалде ккедал – дихъе рачӀинчӀо нуж».

⁴⁴ Гьебмехалъ дозги гьесда абила: «Я, БетӀерчӀахъад! Вакъун хутӀун – кида мун нижеда ватарав? Къечон хутӀун – кида ватарав? КъотӀнов хутӀун, яги гӀицӀтолохӀоч хутӀун, яги унтун, яги туснахъалде ккун – кида мун нижеда ватарав? Кида нижеца дуе хъулухъ гьабичӀеб?»

⁴⁵ Гьес жаваб кьела: «ХӀакълъун абулеб буго дица нужеда: бищунго гӀисиназул цоясениги гьабичӀебщинаб, гьеб буго нужеца дие гьабичӀого тараб лъикӀлъи».

⁴⁶ Гьединазе букӀина абадияб тамихӀ, ритӀухълъаразе букӀина абадияб гӀумру!