Матфей 24 - Аллагьасул Калима

24 бетӀер Дуниялалда ккезе бугелъул хӀакъалъулъ Мукъадасаб Рукъ щущазабизе буго

¹ ГӀиса Мукъадасаб Рокъоса къватӀиве лъугьун нахъе унаго, муридал гьесда аскӀоре рачӀана гьаб Мукъадасаб Рукъалъул кӀодолъи бихьуларищилан.

² ГӀисаца гьезда абуна: – Гьаб кинабго бихьулищ? ХӀакълъун абулеб буго дица нужеда: ганчӀида лъураб цониги гамачӀ хутӀиларо гьаниб кӀалагъоркье чӀвачӀого.

Балагьал гӀемерлъизе руго

³ Цинги Зайтуналъул магӀарда гӀодов чӀун ГӀиса вугеб мехалъ, батӀаго гьесда аскӀоре рачӀун, муридаз гьарана: – Гьаб дуца абулеб бугебщинаб иш кида лъугьине бугебали ва мун вачӀиналъулги дуниял ахирлъиялъулги гӀаламатал кин загьирлъулелали бице нижеда.

⁴ ГӀисаца абуна: – Воре, цо лъицаниги къосинаризе гурин нуж!

⁵ Чанги вукӀине вугелъулха жив МасихӀ вугилан вачӀунев чи. Чангиял гьез къосинаризеги руго.

⁶ Рагъал ккун ругилан ва ккезехъинги ругилан рагӀизе буго нужеда. Воре, нуж хӀинкъуге гьелдаса. Гьеб цебеккунго лъугьине ккола, ва гьеб жеги ахирзаман гуро.

⁷ Цо халкъ цоги халкъалде, цо ханлъи цоги ханлъиялде тӀаде кӀанцӀила. БакӀ-бакӀалда ракъи баккила, ракь багъарила.

⁸ Гьеб кинабго ккола лъимер гьабизе хӀара чӀваялъул гӀадинаб унтиялъул байбихьи.

⁹ Гьебмехалъ нуж рачина гӀазаб-гӀакъуба кьезе ва чӀвазе. Дун сабаблъун тӀолабго гӀаламалда рихина нуж.

¹⁰ Гьебмехалъ гӀемерисел гӀадамал къосина, цоцазе хилиплъила, цоцазда рихина.

¹¹ ГӀемерал гьересиаварагзаби рахъина, гьез гӀемерисел къосинарила.

¹² Пасалъи цӀикӀкӀиндал, гӀемерисезул рокьи ссун ина.

¹³ Амма ахиралде щвезегӀан сабру гӀурав чи хвасарлъила.

¹⁴ Ва ПарччахӀлъиялъул хӀакъалъулъ гьаб Рохалил хабар тӀолабго дуниялалдаго лъазабила, киналго халкъазе нугӀлъун букӀине. Гьебмехалъин ахир букӀунеб.

¹⁵ Даниял аварагасда Аллагьас бицараб чӀунтелалъул къабихӀлъи хирияб бакӀалда бихьила нужеда, – цӀалулесда лъалин гьелъул магӀна –

¹⁶ гьебмехалъ мугӀрузде лъута абе Ягьудиялда ругелал.

¹⁷ Гьеб къоялъ тӀохда вугев, рокъоса къваригӀараб-тараб босизе, гъоркье рещтӀунгеян абе.

¹⁸ Хурив вугевги жиндирго ретӀел босизе нахъвуссунгеян абе.

¹⁹ Вай, къинал руччабазе ва каранда хахулел лъимал ругел улбузе букӀинаха дол къояз кӀудияб къварилъи-гӀазаб!

²⁰ Хасало яги шамат къоялъ лъутизе ккогегиян гьари-дугӀа гьабулел рукӀа нуж.

²¹ Щаян абуни, гьебмехалъ рещтӀине буго дуниял бижаралдаса гьанжелъагӀан букӀинчӀеб ва хадубккун букӀине къотӀиги гьечӀеб кӀудияб балагь.

²² Гьел къоял къокълъизаризе Аллагьасул къадар букӀинчӀебани, цониги рижи хвасарлъизе букӀинчӀо. Амма жинцаго тӀаса рищарал гӀадамазе гӀоло гьел къоял къокъ гьаризе хӀукму буго.

²³ Гьебмехалъ нужеда лъицаниги абуни, МасихӀ гьале гьанив вугилан, яги дова вугилан, воре, нуж гьелда божуге.

²⁴ Щаян абуни, гӀемер рукӀине руго гьебмехалъ гьересимасихӀалги гьересиаварагзабиги. Чанги кӀуди-кӀудиял гӀаламатал ва мугӀжизатал рихьизарила гьез, бажарани, тӀаса рищарал муъминзабигицин къосинаризе бокьун.

²⁵ Гьеб кинабго цебеккунго лъазабун толеб буго дица нужеда!

²⁶ Доле МасихӀ гӀицӀаб авлахъалда вугин абуни, гьениреги унге нуж, гьале рокъов жанив вахчун вугин гьевилан рагӀани, гьелдаги божуге.

²⁷ Бакъбаккудаса бакътӀерхьуде щвезегӀан тӀолабго зоб гвангъизабулеб пири гӀадин вачӀина ГӀадамил Лъимер.

²⁸ Балкан бугеб бакӀалде чудкал ракӀарула.

ГӀадамил Лъимер кӀиабизеги вачӀине вуго

²⁹ Дол къоязул гӀакъуба-къварилъиялдаса хадуб гьебсагӀатго бакъул нур тӀагӀун ина, ва моцӀрол канлъиги ссун ина. ЦӀваби зодиса гӀодоре гъенон рачӀина, ва къвакӀарал зобалги гьаргьадила.

³⁰ Ва гьебмехалда зодиб лъугьина ГӀадамил Лъимадул гӀаламат. Ва дуниялалъул киналго халкъал гӀодила, гьезда вихьила накӀкӀазда гьоркьосан бергьараб къудраталда ва кӀодолъиялда ГӀадамил Лъимер вачӀунев.

³¹ Гьебмехалъ ссур пулеб гьаракь бахъина. Жинца тӀаса бищараб агьлу зобалазул гьаб рагӀалдаса бахъараб добцояб рагӀалде щвезегӀан – ункъабго рахъалдаса бакӀаризе жиндирго малаикзабиги ритӀила гьес.

Инжиралъул гъотӀол мисал

³² Нужеца мисалалъе босе инжиралъул гъветӀ. Гьелъул гӀаркьалабазда гӀекӀ базе ва тӀамах бижизе байбихьараб мехалъ, нужеда лъала рии тӀаде щолеб бугеблъи.

³³ Гьелдаго релълъун, гьел гӀаламатал рихьараб мехалъ, нужеда лъала гьеб нуцӀикӀалтӀе щун бугеблъи.

³⁴ ХӀакълъун абулеб буго дица нужеда: дуниялалда гьаб наслу букӀаго лъугьине буго гьеб кинабго.

³⁵ Зобалги ракьалги тӀагӀаниги, дир рагӀаби нахъе хутӀизе руго.

³⁶ Амма цониги инсанасда лъаларо гьеб къо, гьеб сагӀат кида тӀаде щвезе бугебали. Я зобалазул малаикзабазда лъаларо, я Васасда лъаларо, гьеб лъала гӀицӀго Инсуда.

«Нуж рорчӀуда чӀа!»

³⁷ НухӀ аварагасул заманаялда букӀараб гӀадин букӀине буго ГӀадамил Лъимер вачӀараб мехалъги.

³⁸ ТӀупан тӀелалде, кваналел-гьекъолел, лъудби рачунел, россабазе унел рукӀана дол къоязда гӀадамал, НухӀ гамида жаниве лъугьинегӀан.

³⁹ ТӀупан тӀун, гьелъ росун инегӀан, щибниги лъалеб жо букӀинчӀо гьезда. Гьедин букӀина ГӀадамил Лъимер вачӀиндалги.

⁴⁰ Гьебмехалъ хурив векьарилев вугев кӀигоясул цояв вачина, цогидав хутӀила.

⁴¹ Гьабихъ гӀатӀ ххенолей йигей кӀиго чӀужугӀаданалъул цояй ячина, цогидай хутӀила.

⁴² Гьединлъидал нуж рорчӀуда чӀа, нужеда лъаларелъул нужер ТӀадегӀанав кида вачӀиневали.

⁴³ Рукъалъул бетӀергьанасда лъалеб бугони цӀогьор вачӀунеб заман, рорчӀи ккун, гьес цӀогьор жаниве лъугьине виччаларевлъи лъала нужеда.

⁴⁴ Гьединлъидал нужги хӀадурго рукӀа, ракӀалдаго гьечӀеб заманаялъ вачӀине вугелъул нужехъе ГӀадамил Лъимер.

⁴⁵ Жиндир рагьтӀателазе бетӀерлъи гьабеян ва гьезие ригь-ригьалда квен-тӀехги чӀезабеян тарав рагьтӀател,

⁴⁶ гьесул бетӀергьан тӀадвуссун вачӀараб мехалда ритӀухъго ва цӀодорго хӀалтӀулев вукӀин гьесда лъани, – гьардарав гурищ гьединав рагьтӀател.

⁴⁷ ХӀакълъун абулеб буго дица нужеда: бетӀергьанас гьединав рагьтӀателасда божун тела жиндир тӀолабго магӀишат.

⁴⁸ Амма гьедин тарав квешав рагьтӀател, жиндирго бетӀергьан тӀадвуссун вачӀине гӀезегӀан заман бугин ракӀалдеги ккун,

⁴⁹ живго гӀадал рагьтӀателал рухизе-кьабизе лъугьани ва гьекъолдухъабигун кваналев-гьекъолев чӀани, щиб ккелеб?

⁵⁰ Гьесда ракӀалдаго гьечӀеб къоялъ ва вачӀиниланго ккечӀеб сагӀаталъ тӀаде рехун вачӀина гьесул бетӀергьан.

⁵¹ КӀихӀи хъвалхьина гьес гьев рагьтӀател. Ххвелал гьарулесул можоро бахъараб гӀадин ккела гьесул иш. ГӀодилел ва цаби къерщезарулел хутӀила гьединал гӀадамал.