Матфей 20 - Аллагьасул Калима

20 бетӀер ЦӀолбол ахикь хӀалтӀаразул мисал

¹ Зобалазул ПарччахӀлъи релълъуна, радал хехго вахъун, жиндирго цӀолбол ахикь хӀалтӀизе гӀадамал ралагьизе арав цо бечедав чиясда.

² Къое цо-цо динар кьезе къотӀиги гьабун, хӀалтӀухъаби ккун руго гьес ва цӀолбол ахикье ритӀун руго.

³ Лъабго сагӀаталдасан нахъеги базаркъотӀносан унаго, цоги чагӀиги ратун руго гьенир, хӀалтӀи щвелародайилан рахъун чӀун.

⁴ Нуж разияб мухьги кьелин, дир цӀолбол ахикье хӀалтӀизе айилан ритӀун руго гьас гьелги. Ун руго гьел гьенире.

⁵ Къалъул гӀужалдехунги ва къалъудаса лъабго сагӀат араб мехалъги базаркъотӀнове ун, додинго ритӀун руго гьес хӀалтӀухъаби.

⁶ Бакъанидехунги ун вуго гьав чи базаркъотӀнове. Дагьалги гӀадамал ратун руго гьенир рахъун чӀун. – Къойица гьанир чӀалгӀаде рахъун чӀун щибулел нуж ругел? – ан гьикъун буго гьас гьезда.

⁷ Жал лъицаниги хӀалтӀизе рачунел гьечӀилан абун буго гьез. Гьездаги абун буго гьес жиндир цӀолбол ахикье айилан.

⁸ МаркӀачӀубер рукӀкӀараб мехалъ, жиндие хъулухъ гьабулев чиясда гьес абун буго дол хӀалтӀухъабиги ахӀун, ахиралда ритӀараздасан байбихьун тӀоцере ритӀаразде щвезегӀан гьезие мухь кьейилан.

⁹ Бакъанимехалда хӀалтӀизе байбихьаразеги цо-цо динар щун буго.

¹⁰ Радалго хӀалтӀизе квер баразда ракӀалда букӀун буго жидее цӀикӀкӀун кьелилан. Амма гьезиеги цо-цо динар гурони щун гьечӀо.

¹¹ Гьебмехалъ ахил бетӀергьанасде гъулгъудизе лъугьун руго гьел:

¹² – Ахикье ахиралда рачӀарал гӀадамал цо сагӀаталъ гурони хӀалтӀичӀо. Нижин абуни, радалалдаса бакъинегӀан бухӀараб бакъукь хӀалтӀана. Гьезиеги нижееги бащад кьуна дуца мухь.

¹³ Гьезул цоясдехун вуссун ахил бетӀергьанас абун буго: – Ле, гьудул! Дуе гьабураб къотӀи хвезабунищ дица? Мун разилъун вукӀинчӀищ цо динаралъухъ хӀалтӀизе?

¹⁴ Дуего кьураб мухьги босун нахъе щай унарев? Дие бокьун буго дуе кьуралда бащад тӀарамагъада витӀарасеги кьезе.

¹⁵ Дирго буголъиялда бокьараб гьабизе ихтияр гьечӀебищ дир? Яги дир сахаватлъиялда бер бахиллъунищ мун вугев?

¹⁶ Гьедин цере рукӀарал ахиралде ккела, ахиралда рукӀарал цере ккела.

ГӀазаб-гӀакъубаялъул хӀакъалъулъ – лъабабизеги

¹⁷ Иерусалималде унаго нухда ГӀисаца анцӀила кӀиявго мурид батӀаго ахӀана ва гьезда абуна:

¹⁸ – Гьале нилъ Иерусалималде унел руго. Гьенив ГӀадамил Лъимер чӀахӀиял кашишзабаздаги диниял гӀалимзабаздаги кодове кьела, гьезги чӀвазе къотӀила.

¹⁹ Цинги инжит-хӀакъир гьавизе, цӀалаца вухизе ва хъанчида вазе цогидаб халкъалъул гӀадамазда кодове кьела гьев. Ва хун лъабабилеб къоялъ чӀаголъила.

Якъубилги Иоаннилги эбелалъе ГӀисал жаваб

²⁰ Гьебмехалъ ГӀисада аскӀое ячӀуна Зебедайил васазул эбел. Гьелда аскӀор рукӀана кӀиявго васги. Гьелъ гӀодое къулун цо жо гьарулеб букӀана.

²¹ – Щиб дуе бокьун бугеб? – ан гьикъана ГӀисаца. Гьелъ абуна: – Мун ПарччахӀлъун ккараб мехалъ, гьав дир кӀиявго вас дуца дудаго аскӀор цояв кваранаб рахъалда, цогидавги квегӀаб рахъалда, гӀодор чӀезарилин рагӀи кье дие.

²² ГӀисаца гьелъул васазда абуна: – Нужедаго лъалеб гьечӀо нужеца гьарулеб бугеб жо. КӀвеладай нужеда дица гьекъезе ккараб лълъар гьекъезе? КӀвелилан жаваб кьуна гьез.

²³ ГӀисаца абуна: – Дица гьекъезе ккараб лълъар гьекъезе ккезе буго нужеца. Амма дир кваранабги квегӀабги рахъалда гӀодор чӀезариялъул иш дида бараб гьечӀо, дир Инсул хӀукмуялда бараб буго.

²⁴ Гьеб хабар рагӀарабго, хутӀарав анцӀавго мурид дов кӀиявго вацасде ццидахун лъугьана.

²⁵ АскӀореги ахӀун, ГӀисаца гьезда абуна: – Нужеда лъалагури цогидал халкъазул парччахӀзабаз халкъалда тӀад ханлъи гьабулеблъи, чӀухӀби-хӀакимзабаз гӀадамазда тӀад жидерго ихтияр билълъанхъизабулеблъи.

²⁶ Амма нужеда гьоркьоб гьедин букӀине бегьуларо. Нужеда гьоркьоса лъиениги бищунго кӀудиявлъун вукӀине бокьани, гьев цогидазе хъулухъалъе чӀа абе.

²⁷ Нужеда гьоркьоса бищунго цеве вукӀине бокьаравги цогидазе лагълъун вукӀа абе.

²⁸ ГӀадамил Лъимерги жиндие лъицаниги хъулухъ гьабизелъун гуро вачӀарав. Гьев вачӀун вуго цогидазе хъулухъ гьабизе ва гӀемеразе гӀоло рецӀалие жиндирго рухӀ кьезе.

Иерихоналдаса унаго ГӀисаца кӀиго бецав чи сахлъизавула

²⁹ Иерихон шагьаралдаса къватӀире гьел рахъунеб мехалъ, халкъалъул руккел букӀана ГӀисада хадуб бачӀунеб.

³⁰ Гьале нухлул рагӀалда гӀодов чӀун вукӀарав кӀиго бецав чи, ГӀиса аскӀосан унев вукӀин рагӀун, ахӀдезе лъугьана: – Я, БетӀерчӀахъад! Я, Давудил вас! ГурхӀа мун нижеда! – ян.

³¹ ГӀадамаз абуна гьезда руцӀцӀун чӀайилан, амма гьел дагьабги гьаракь борхун ахӀдезе лъугьана: – Я, БетӀерчӀахъад! Я, Давудил вас! ГурхӀа мун нижеда! – ян.

³² Гьенив лъалхъун, ГӀисаца гьел аскӀоре ахӀана ва дица щиб гьабизе нужее бокьун бугебилан гьикъана.

³³ Гьез абуна: – Я, БетӀерчӀахъад, нижер беразда канлъи бихьизе бокьун буго.

³⁴ Гьев кӀиясдаго гурхӀун, ГӀисаца гьезул беразда квер бахъана. ГьебсагӀат беразда канлъи бихьун, ГӀисада цадахъ рилълъана гьел.