Матфей 18 - Аллагьасул Калима

18 бетӀер «Бищун кӀудияв щив?»

¹ – ПарччахӀлъиялда ругезул гьоркьов бищун кӀудияв щив? – ан гьикъана гьебмехалъ, ГӀисада аскӀоре рачӀун, муридаз.

² ГӀисаца, аскӀобе ахӀун, цо лъимер гьезда гьоркьоб эхетизабуна.

³ Гьес абуна: – ХӀакълъун абулеб буго дица нужеда: гӀакълу-пикру хисичӀони ва лъимал гӀадин лъугьинчӀони, Зобалазул ПарччахӀлъиялде лъугьинаро нуж киданиги.

⁴ Живго гьитӀинлъизавурав ва гьеб лъимер гӀадин лъугьарав чи бищунго кӀудиявлъун вукӀине вуго Зобалазул ПарччахӀлъиялда.

⁵ Цо гьадинаб лъимер, дие гӀоло, лъицаниги къабул гьабуни, гьеб бащалъизе буго дун къабул гьавиялда.

⁶ Амма диде иман лъуразда гьоркьоса цониги лъимер гӀадинав пулан мунагьалде цӀалев чиясде балагь бачӀина. Гьесие лъикӀаб букӀинаан, гьобоги горбода бухьун, гъваридаб ралъдалъ гъанкъизавуни.

«Мун мунагьалде цӀалев вугони…»

⁷ Вай, инсан мунагьалде цӀалеб жоялъул дуниялалда бугеб балагьги гӀазабги! Щаян абуни, мунагьалде цӀалеб жо камун дуниял хутӀуларелъул. Гьединго балагьги гӀазабги жив сабаблъун цогидав мунагьалде цӀалев чиясеги!

⁸ Дур квералъ, яги бохалъ мун мунагьалде цӀалев вугони, къотӀун нахъе рехе гьеб. Цояб квер камун, яги цояб бох камун абадияб рокъове лъугьин лъикӀ дуе, кӀиябго квергун, яги кӀиябго бохгун свин гьечӀеб цӀадаве рехизегӀан.

⁹ Дур бералъ мун мунагьалде цӀалев вугони, бахъун нахъе рехе гьеб. Цо бергун абадияб рокъове лъугьин лъикӀ дуе, кӀиябго бергун жужахӀалъул цӀадаве рехизегӀан.

Билараб чахъдал мисал

^10-11 Воре, нужеца сан гьавичӀого тоге лъимер гӀадин вугев гӀадатияв цониги пулан. Щаян абуни, дица нужеда абулеб буго: гьединазул малаикзабазда кидаго кӀола зобалазда вугев дир Инсуда бадире ралагьизе.

¹² Кин нужеда ракӀалде кколеб: масала, цо пуланав чиясул буго нусго чахъу. Гьезул цояб билани, доб ункъоялда анцӀила ичӀабгоги магӀарда тун, гьеб билараб чахъу балагьизе инарищ гьев?

¹³ Нагагь гьесда гьеб батани, хӀакълъун абулеб буго дица нужеда, риличӀого ругел дол ункъоялда анцӀила ичӀго чахъдадаса цӀикӀкӀун вохула гьев батараб чахъдадаса.

¹⁴ Гьедин зобалазда вугев нужер Инсуеги бокьуларо лъимер гӀадин вугев гӀадатияв цониги пулан тӀагӀине.

Диналъул вацасул мунагьалъул хӀакъалъулъ

¹⁵ Дурго диналъул вацасухъа ккани мун къварид гьавулеб мунагь, чи гьечӀеб бакӀалда бадибчӀвай гьабе гьесие. Гьев духъ гӀенеккани, дуе дурго вац нахъе щола.

¹⁶ Гьев духъ гӀенеккичӀони, цо яги кӀиго чиги вачун, а мун гьесухъе. ТӀехьалда хъван бугелъул: «Лъилниги рагӀи ритӀухълъизе ккани, къваригӀуна кӀиго яги лъабго чиясул нугӀлъи».

¹⁷ Гьезухъги дур вац гӀенеккичӀони, иман лъуразул агьлуялда бице. Гьезухъги гьев гӀенеккичӀони, дуца гьев рикӀкӀе Аллагь лъаларевлъун яги магъало бакӀарулев чилъун.

¹⁸ ХӀакълъун абулеб буго дица нужеда: ракьалда нужеца гьукъарабщинаб зобалаздаги гьукъила. Ракьалда нужеца изну кьурабщиналъе зобалаздаги изну кьела.

¹⁹ Цоги абулеб буго дица нужеда: нужер кӀигояв рекъон дуниялалда нужеца щиб гьараниги, Зобалазда вугев дир Инсуца тӀубазабила гьеб.

²⁰ Щай абуни, дир цӀаралъе гӀоло кӀиго яги лъабго чи данделъани, гьезда гьоркьов дунги вукӀуна.

Налъуласда гурхӀуларев чиясул хӀакъалъулъ

²¹ АскӀовеги вачӀун, Пётрица гьикъана ГӀисада: – Дун къварид гьавулел мунагьал дир вацасухъа гӀемер ккани, чан нухалъ дун гьесда тӀасалъугьине кколев? Анкьго нухалъищ?

²² ГӀисаца гьесда абуна: – Дица дуда абулеб буго: анкьго нухалъ гурин, анкьцӀали нухалъилан.

²³ Зобалазул ПарччахӀлъиги релълъинабизе бегьула жиндирго лагъзадерихъа налъи бакӀаризе лъугьарав цо парччахӀасда.

²⁴ Налъи бакӀаризе байбихьараб мехалъ, гьесухъе вачун вачӀун вуго анцӀазарго талант гьесие налъуда бугев цо пуланав лагъ.

²⁵ Налъи бецӀизе гьесул рес гьечӀеблъиги лъан, парччахӀас буюрун буго гьев живгоги вичейин, гьесул чӀужу-лъималги ричейин, бугебщинаб боцӀи-рикъзиги бичейин, жиндие гӀарац чӀезабеян.

²⁶ Гьебмехалъ лагъ, кӀалагъоркье гьесда цевеги речӀчӀун, гьардезе лъугьун вуго: – Сабру гьабе! Дица бецӀила гьеб кинабго.

²⁷ ПарччахӀ гьев лагъасда гурхӀун вуго, гьеб налъиги бецӀичӀониги гьесие хӀалал гьабун буго.

²⁸ Гьениса вачӀунаго, гьев лагъасда ватун вуго жиндие нусго динар кьезе букӀарав живгогӀадав цоги лагъ. Налъи бецӀизе кколилан, щекъерги ккун, гъанкъулев вукӀун вуго гьас дов.

²⁹ КӀалагъоркье гьасда цевеги речӀчӀун, гьарун буго дов налъулас, сабру гьабейин, жинца бецӀилин дуе налъи.

³⁰ Амма гьав разилъун гьечӀо, гвандинив тӀамизавун вуго, тӀубанго налъи бецӀизегӀан жанив чӀезавун вуго.

³¹ Дов жанив тӀамурав лагъасул гьалмагъзаби цӀакъ пашманлъун руго гьеб бихьидал, инеги ун жидерго бетӀергьанасда бицун буго ккарабщиналъул хӀакъалъулъ.

³² Гьебмехалъ дов лагъги ахӀун, гьесда абун буго парччахӀас: – Ле, хӀалихьатав лагъ, дуца гьарараб мехалъ дуда букӀараб тӀолабго налъи тӀасалъугьун тана дица.

³³ Дун дуда гурхӀарав гӀадин, мунги гурхӀизе ккелароанищ мунго гӀадав лагъасда?

³⁴ Ццин бахъун гьев парччахӀас буюрун буго тӀолабго налъи бецӀизегӀан досие гӀазаб кьейилан.

³⁵ Гьедин гьабила нужееги Зобалазда вугев дир Инсуца, нужер щивав чи ракӀ-ракӀалъго вацасда тӀасалъугьинчӀони.