Матфей 15 - Аллагьасул Калима

15 бетӀер Аллагьасул амруялги умумузул гӀадаталги

¹ Гьебмехалъ ГӀисахъеги рачӀун, Иерусалималдаса диниял гӀалимзабаз ва фарисеяз абуна:

² – Дур муридаз нилъер умумузул динияб гӀадат щай цӀунулареб? Кваналелде кверал чурулел гьечӀогури гьез.

³ ГӀисаца гьезда абуна: – Нужерго гӀадат цӀунизе бокьун, нужецаго щай Аллагьасул амру тӀубазабулареб?

⁴ Аллагьас абун буго: «Дурго инсулги эбелалъулги адаб-хъатир гьабе!» Хадубги: «Жиндирго инсул яги эбелалъул хӀакъалъулъ квешаб рагӀи абурав чи чӀвазе ккола», – ян.

⁵ Нужеца малъулеб буго: «Дидасан нужее щвезе кколеб букӀараб жо дица Аллагьасе назру гьабунилан жиндирго инсуда яги эбелалда абурав чияс

⁶ инсулги эбелалъулги адаб-хъатир гьабизе кколаро», – ян. Гьедин нужеца нужерго гӀадаталдалъун хвезабулеб буго Аллагьасул амру.

⁷ Вай, нужее ххвелал гьаризе бокьулеб куц! Нужер хӀакъалъулъ Ишая аварагасул тӀехьалда цӀакъ битӀун абун бугебха:

⁸ «Гьел гӀадамазул кӀалалъ Дир цӀар гӀемер рехсола, Амма гьезул ракӀални рикӀкӀад руго Дидаса.

⁹ ГӀадада ккела гьезул Дие гьабураб тӀагӀат, ГӀадамазул гӀадатал цӀунизе халкъ тӀамидал».

¹⁰ Нахъеги халкъги аскӀобе ахӀун, ГӀисаца абуна:

¹¹ – Дихъ гӀенекке нуж: кӀалдиса жанибе аралъ гуро инсан хъублъизавулев, кӀалдиса къватӀибе бачӀаралъин. Гьеб бичӀчӀа нужеда!

¹² Гьебмехалъ, аскӀоре рачӀун, муридаз абуна ГӀисада: – Дур рагӀабаз фарисеял ццидахинарун рукӀин лъалищ дуда?

¹³ ГӀисаца гьезие жаваб гьабуна: – Зобалазда вугев дир Инсуца ахикь чӀечӀебщинаб гъветӀ кьолболъа бахъун рехизе буго.

¹⁴ ЖахӀалго те гьел. Гьел руго бецал чагӀи, квер ккун хадур цӀалел бецукал. Бецукас ккун бецук вачунев вугони, кӀиялгоги гвандинире рортила гьел.

¹⁵ Пётрица гьарана дол рагӀабазул магӀна бицеян.

¹⁶ – ГьедигӀанго жо бичӀчӀуларел чагӀийищха нужги, – ян хӀикмалъана ГӀиса.

¹⁷ Нилъеца кӀалдибе босараб жо чохьонибе кколеблъи ва гьенисан къватӀибе унеблъи лъаларебищха нужеда?

¹⁸ Амма кӀалдисан къватӀибе бачӀуна рекӀелъ бугеб жо. Гьеле гьелъин чи хъублъизавулев.

¹⁹ Щаян абуни, инсанасул рекӀелъан рачӀуна квешал къасдалги, чӀвай-хъвейги, зиначилъиги, хъахӀбалъиги, цӀогьги, гьересинугӀлъиги, бугьтанги.

²⁰ Гьеб киналъго хъублъизавула инсан. Амма кваналелде кверал чуричӀогойилан гьев хъублъуларо.

Цогидаб халкъалъул гӀаданалъги ГӀисаде иман лъола

²¹ Гьениса вахъун ГӀиса унев вукӀана Тиралъул ва Сидоналъул улкабазде.

²² Ханааналдаса цо гӀадан ячӀана ГӀисада аскӀое ва гӀодилаго ахӀдезе лъугьана: – Я, БетӀерчӀахъад! Я, Давудил Вас! ГурхӀа мун дида. Дир яс йиго шайтӀабаз ккун кутакаб гӀазабалда гъоркь.

²³ Гьелъие жаваб гьабун цо рагӀицин абичӀо ГӀисаца. АскӀоре рачӀун муридаз гьарана, гьадай гӀадан ахӀделаго нилъеда хадуй ячӀуней йигин, дой нахъе йитӀеян.

²⁴ Гьезие жаваб гьабун ГӀисаца абуна: – Дун Исраилил умматалъухъе витӀун вуго вехьасухъа риларал чахъаби гӀадин ругел гьелъул гӀадамал ралагьизе.

²⁵ АскӀое ячӀун, ГӀисада цее накабаздаги чӀун, гьарулеб букӀана дой гӀаданалъ: – Я, БетӀерчӀахъад! Кумек гьабе дие, – ян.

²⁶ – Лъималазул кӀалдиса бахъун чед гьабзазе базе бегьуларо, – ян абуна гьелда ГӀисаца.

²⁷ Гьей гӀаданалъ абуна: – Я, БетӀерчӀахъад! Гьебни битӀараб буго. Амма жидерго бетӀергьабазул столалдаса рортарал кескал рукъалъул гьабзазеги щолагури.

²⁸ Гьебмехалъ ГӀисаца гьелда абуна: – Я, чӀужугӀадан! Кутакаб божи-иман буго дур рекӀелъ. РекӀел мурад тӀубайги дур! ГьебсагӀат сахлъана гьей гӀаданалъул яс.

ГӀемерал гӀадамал сахлъизарула ГӀисаца

²⁹ Гьениса вахъун ун, Галилеялъул ралъдал рагӀалдасан вачӀун, цо магӀарде вахана ГӀиса ва гьенив чӀана.

³⁰ ГӀемераб халкъ бачӀана ГӀисада хадуб гьенибеги. Гьезда гъорлъ рукӀана рекъал, гӀажизал, бецал, мацӀ лъаларел ва цогидабги гӀузру-сакъат бугел гӀадамал. Гьесул хӀатӀазда цере лъолел рукӀана гьединал гӀадамал, ва гьес гьел сахлъизарулаан.

³¹ МацӀ лъаларел кӀалъалел ругелъул, бецазда канлъи бихьулеб бугелъул, гӀажизал сахлъулел ругелъул, рекъал лъикӀго рилълъанхъулел ругелъул, тӀолабго халкъ гӀажаиблъун хутӀун букӀана. Исраилил Аллагьасе рецц гьабулеб букӀана гьез.

ГӀисаца ункъазарго чи гӀорцӀизавула

³² Жиндирго муридалги аскӀоре ахӀун, ГӀисаца гьезда абуна: – Гьал гӀадамазда гурхӀун вуго дун. Гьале лъабабго къоялъ дида аскӀор чӀун руго. Кваназе жоги хутӀун гьечӀо гьазухъ. Гьал кваначӀого риччазеги бокьун гьечӀо дие: нухда рухӀ дагьлъун гӀодор ккезе бегьула.

³³ Муридаз гьесда абуна: – ГьадигӀан гӀемераб халкъ гӀорцӀизе гӀураб чед гьаб гӀалхуда киса бахъилеб нижеца?

³⁴ Чан чед нужехъ бугебилан гьикъана ГӀисаца гьезда. Анкьго чедги цо чанго ччугӀаги бугилан абуна гьез.

³⁵ Цинги ГӀисаца гьел гӀадамазда абуна кваназе гӀодор чӀайилан.

³⁶ Доб анкьабго чедги чанго ччугӀаги кодобе босун, тӀаде дугӀаги гьабун, ГӀисаца бек-бекун жиндирго муридазухъе кьуна, гьезги халкъалъе бикьана гьеб.

³⁷ Киналго гӀорцӀизегӀан кванана гьенир, нахъе хутӀарал чадил мочӀабазулги анкьго гьегь цӀуна.

³⁸ Руччабиги лъималги малъичӀого, ункъазарго чи вукӀана гьенив кваналев.

³⁹ Халкъги нахъе биччан ГӀиса, росодаги рекӀун, Магаданалъул ракьалде ана.