Матфей 14 - Аллагьасул Калима

14 бетӀер ЯхӀя аварагасул хвалил хӀакъалъулъ

¹ Гьеб заманаялда Галилеялъул ханлъун вукӀарав Гьеродида рагӀана ГӀисал хӀакъалъулъ.

² Гьес жиндирго нукарзабазда абуна: – ЯхӀя авараг ватизе ккола гьев, хваралъуса вахъун вачӀун, гьединлъидал гьес рихьизарулел руго гьел мугӀжизаталги.

³ Гьев Гьеродица кквезеги ккун, рахсалги ран, гвандиниве рехун вукӀана ЯхӀя авараг. Гьелъие сабаблъун ккана Гьеродил вац Филиппил йикӀарай чӀужу Гьеродиада.

⁴ ЯхӀяца гьесда абулеб букӀиндалха дуца гьей ячине бегьуларилан.

⁵ ЯхӀя чӀвазе бокьун букӀана Гьеродие. Амма халкъалъукьа хӀинкъана, киназго гьев авараглъун рикӀкӀунев вукӀиндал.

⁶ Гьерод гьавураб къо кӀодо гьабулеб рохалилъ Гьеродиадал яс цее яхъун кьурдана. Гьелдаса разилъарав Гьеродица

⁷ гьей ясалда гьедун абуна, дуе бокьараб сайигъат кьезе хӀадурав вугин, цӀар чӀвай дургоян.

⁸ Эбелалъ малъун гьей ясалъ абуна, гьаниб гъадрида жаниб лъун, ЯхӀя аварагасул бетӀер кьейилан.

⁹ Хан пашманлъана. Амма гьалбадеридаги рагӀун гьедараб гьа хвезабизе бокьичӀого, кьейилан амру гьабуна гьес.

¹⁰ Гвандиниве чи витӀун ЯхӀял бетӀер къотӀизабуна Гьеродица.

¹¹ Гъадриниб лъун босун бачӀана бетӀер ва ясалъухъе кьуна, гьелъги жиндирго эбелалъухъе босун ана.

¹² Цинги ЯхӀял муридаз гьесул жаназа, нахъеги босун, хабалъ букъана, ва лъугьа-бахъаралъул хӀакъалъулъ ГӀисада бицине ана гьел.

ГӀисаца щуазарго чи гӀорцӀизавула

¹³ Гьеб хабар рагӀидал ГӀиса, росодаги рекӀун, гӀадан-чи гьечӀеб бакӀалде ана халкъалдаса ватӀалъун. Гьев аравлъи лъараб мехалъ шагьараздаса гӀадамал ракъдадасан ана гьесда хадур.

¹⁴ Ракъдаде лъугьараб мехалъ ГӀисада гьениб бихьана гӀемераб халкъ. ГӀиса гьезда гурхӀана ва унтарал сахлъизаруна.

¹⁵ Бакъанимех гӀагарлъулеб букӀана. ГӀисада аскӀоре рачӀун гьесул муридаз абуна: – ГӀадан-чиго гьечӀеб бакӀ бугин гьаб, сордоги тӀаде щолеб бугин, нахъе айилан абе гьал гӀадамазда, росабалъе ун жидеего квен-тӀех босизе.

¹⁶ ГӀисаца гьезда абуна: – Гьел кирениги ине ккеларо. Нужеца кваназаре гьел.

¹⁷ Муридаз абуна жидехъ щуго чедги кӀиго ччугӀаги гурони гьечӀилан.

¹⁸ Гьеб жиндихъе босун рачӀаян абуна ГӀисаца гьезда.

¹⁹ Харда тӀад гӀодор чӀаян гьел гӀадамаздаги лъазабун, ГӀисаца щуябго чедги кӀиябго ччугӀаги кодобе босана, зобалаздехун вуссун квантӀе дугӀа гьабуна ва бек-бекун муридазухъе кьуна. Гьезги гӀадамазе бикьана.

²⁰ Киналго гӀорцӀизегӀан кванана, нахъе хутӀарал кесказулги анцӀила кӀиго гьегь цӀезабуна.

²¹ Руччабиги лъималги малъичӀого, щуазаргогӀанасев чи вукӀана гьенив.

ГӀиса лъеда тӀасан вилълъун вачӀуна

²² Гьеб халкъ нахъе биччалалде ГӀисаца муридал ритӀана, росодаги рекӀун, ралъдал добцояб рахъалде цере-цере айилан.

²³ Халкъги нахъе биччан, ГӀиса живго цохӀо магӀарде вахана Аллагьасе гьари-дугӀаялъе. МаркӀачӀубер рукӀкӀараб мехалъги живго цохӀо гьенив вукӀана ГӀиса.

²⁴ Дозул раса хӀорил рагӀалдаса чанго километралъ рикӀкӀалъун букӀана. Данде гьури букӀун карачелаз раса хьвагӀезабулеб букӀана.

²⁵ Жеги хъахӀлъи рехилалдего ралъдал лъеда тӀасан вилълъун ГӀиса гьезда хадув ана.

²⁶ Лъеда тӀасан вилълъун вачӀунев гьесда бер чӀвайдал, муридал хӀинкъун хаган хутӀана. Хваразул рухӀ бугин гьебиланги абун, гӀемерго хӀинкъиялъ ахӀдезе лъугьана.

²⁷ – Дун вуго! Нуж расги хӀинкъуге! КъвакӀун чӀа! – ян ахӀана гьебсагӀат гьезде ГӀисаца.

²⁸ – Я, БетӀерчӀахъад! Нижеда цеве вугев чи мун ватани, лъеда тӀасан дуда данде вачӀине амру гьабе диеги, – ян абуна Пётрица гьесда.

²⁹ – ВачӀа! – ян абуна ГӀисаца. Росониса къватӀиве вахъун, лъеда тӀасан ун ГӀисада аскӀове щвана Пётр.

³⁰ Амма кутакаб гьури речӀчӀун бачӀунеб бихьун, гьев хӀинкъана, гъанкъизехъин вукӀана. – Я, БетӀерчӀахъад! Дун хвасар гьаве! – ян ахӀдана гьев ГӀисаде.

³¹ – Ле иман дагьав инсан! Щай дур рекӀелъе щаклъи лъугьараб? – анги абун, гьебсагӀат квер бегьун ккуна ГӀисаца гьев.

³² Гьел кӀиялго росонире лъугьиндал, гьури къатӀана.

³³ – ХӀакъикъаталдаги мун Аллагьасул Вас вуго! – ян, гьесие бетӀер къулана росода рукӀараз.

Геннесареталдаги сахлъизарула унтарал гӀадамал

³⁴ Добаб рагӀалдеги рахун гьел щвана Геннесареталъул ракьалде.

³⁵ Гьеб бакӀалъул гӀадамазда ГӀиса лъана. Гьев вачӀун вугилан тӀолабго сверухълъиялда лъазабизе чагӀи ритӀана. Киналго унтарал росун, рачун рачӀана гьесухъе.

³⁶ Дур гӀабаялъул гӀертелалда квер хъвазегӀаги тейилан гьарулеб букӀана гьез. Гьелда квер хъваралщиналги сахлъулел рукӀана.