Матфей 11 - Аллагьасул Калима

11 бетӀер ЯхӀя аварагас ГӀисахъе муридзаби ритӀун рачӀуна

¹ АнцӀила кӀиявго муридасе насихӀат гьабун лъугӀараб мехалъ, ГӀиса гьеб рахъалъул шагьаразде ана халкъалда дарс малъизеги вагӀза гьабизеги.

² Туснахъалда вукӀарав ЯхӀяда рагӀана МасихӀил ишазул хӀакъалъулъ.

³ – Мунищ дов нижехъе вачӀине кколев чи, яги цогидав вачӀинегӀанищ ниж ралагьун чӀезе кколел? – абун гьикъизе жиндирго муридзаби ритӀана гьес ГӀисахъе.

⁴ ГӀисаца гьезие жаваб кьуна: – Инеги ун, нужеца ЯхӀяда бице нужеда рагӀулеб бугебги бихьулеб бугебги:

⁵ бецазда канлъи бихьулеб бугин, бохдулъа ракъварал рилълъанхъулел ругин, барасалъ унтарал рацӀцӀалъулел ругин, гӀинкъазда рагӀи рагӀулеб бугин, хварал чӀаголъулел ругин, мискинзабазда Рохалил хабар бицунеб бугин.

⁶ Дир рахъалъ щакдаричӀев чи талихӀав вугиланги абе.

⁷ Гьел нахъе араб мехалъ ГӀисаца гӀадамазда бицана ЯхӀял хӀакъалъулъ: – Щиб бихьизе нуж добмехалъ гӀицӀаб авлахъалде ун рукӀарал? Гьороца хьвагӀезабулеб муцӀи бихьизейищ?

⁸ Щив вихьизе ун рукӀарал? Беричаб ратӀлилъ вугев чи вихьизейищ? ЧӀухӀараб ретӀел ретӀарал гӀадамал дора парччахӀзабазул кӀалгӀабазухъ руго.

⁹ Щив вихьизеха ун рукӀарал? Авараг вихьизейищ? Аварагасдасагицин кӀудияв чи вихьизе ун рукӀанилан абулеб буго дица нужеда!

¹⁰ Гьесул хӀакъалъулъин ТӀухьдузда хъван бугеб: «Гьале, мун вачӀиналде дуе нух къачӀазе дирго илчи вуго дица цеве витӀулев».

¹¹ ХӀакълъун абулеб буго дица нужеда: эбелалъ чехь къинлъун гьаруразда гьоркьов ЯхӀя авараг бищунго кӀудияв вуго. Амма Зобалазул ПарччахӀлъиялда ругезул бищунго гьитӀинавгицин гьесдаса кӀудияв вуго.

¹² Жидерго мурадалде щвезе хӀалица нух бахъулезе ЯхӀя аварагасул заманаялдаса бахъараб жакъа къоялде щвезегӀанги бокьун буго Зобалазул ПарччахӀлъи кверде босизе.

¹³ ЯхӀя авараг вахъинегӀан халкъалъе нухлъун рукӀана Мусал Къанунги аварагзабазул вагӀзабиги.

¹⁴ Гьез бицунелда нуж божулел ругони, ЯхӀя вуго кӀиабизе тӀадвуссун вачӀине кколев вукӀарав Иляс авараг.

¹⁵ ГӀундул ругезда рагӀизе биччанте гьеб!

¹⁶ Лъида релълъарал ругилан абилеб дица гьаб заманаялъул гӀадамал?

¹⁷ Нижеца зурма пуна – Нуж кьурдизе рахъинчӀо, МагӀил бакънал рачана – Нуж гӀодизе лъугьинчӀо, – ян къотӀноре рахъун жидерго гьалмагъзабазде ахӀдолел лъималазда релълъуна гьел.

¹⁸ ВитӀун вачӀана я кваналарев, я гьекъоларев ЯхӀя авараг. ШайтӀабаз ккурав чи вугилан абуна гьез гьесде.

¹⁹ ВачӀана кваназеги кваналев, гьекъезеги гьекъолев ГӀадамил Лъимер. Гьез абулеб буго: «Гьале чехьквеш, гьекъолдухъан, магъало бакӀарулел чагӀазулги мунагь-хӀакъалъул агьлуялъулги гьудул», – абун. Амма Аллагьасул ГӀакъиллъи жиндирго ишаздалъун ритӀухълъана.

Балагьги гӀазабги Аллагьасде руссинчӀел шагьаразе

²⁰ КигӀан гӀемерал мугӀжизатал жиндица рихьизаруниги, кантӀун Аллагьасде руссинчӀел шагьаразул гӀадамазда гӀайиб чӀвазе лъугьана ГӀиса:

²¹ – Балагьги гӀазабги дуе, Хоразин шагьар! Балагьги гӀазабги дуе, Байтсаида шагьар! Тиралъулгун Сидоналъул гӀадамазда рихьун рукӀаралани нужеда рихьарал гӀадинал мугӀжизатал, тӀутӀу-хъухъураб парталги ретӀун, ботӀроде рахъуги бан, церего руссинаан гьел Аллагьасде.

²² Дица нужеда абулеб буго: Тиралъулги Сидоналъулги халкъалъе къиямасеб къоялъ нужееялдаса бигьа букӀине бугебха!

²³ Дудаги, Капернаум, зобалазде бахине гьабилинищ ракӀалде кколеб бугеб? ЖужахӀалъул кӀкӀалахъе рехила мун! Дуда рихьарал гӀадинал мугӀжизатал Содомалда рихьун рукӀаралани, жакъаги букӀинаан гьеб шагьар.

²⁴ Амма, дица абулеб буго, Содомалъул халкъалъе къиямасеб къоялъ дур халкъалъеялдаса бигьа букӀине бугебха!

«Дуе рецц буго, дир Эмен!»

²⁵ Гьебмехалъ ГӀисаца абуна: – Дуе рецц буго, дир Эмен, зоб-ракьалъул БетӀергьан, дуца, цӀодораздаса ва гӀакъилаздаса балъгоги гьабун, лъимер гӀадиназе гьаб кинабго загьир гьабуралъухъ.

²⁶ Уха, дир Эмен, гьелъулълъидалха бугеб дур цӀобалъул гӀатӀилъи!

²⁷ Кинабго дие дир Инсуца кьураб буго. Инсуда гурони, лъиданиги лъаларо жиндирго Вас. Васасда ва Эмен жидее загьир гьавизе Васасе бокьарал гӀадамазда гурони, лъиданиги лъаларо Эмен.

²⁸ ХӀалтӀул захӀмалъи баччаралги гьир бакӀлъаралги, дихъе рачӀа нуж, дица хӀалхьи кьела нужее.

²⁹ Дие гӀоло горбода рукь лъезе рачӀа, дидаса мисал босе: дун вуго хӀеренаб ва хӀалимаб ракӀалъул чи. Гьебмехалъ нужер рекӀееги хӀалхьи бачӀина.

³⁰ Нужер горбода дица лъолеб рукьги бигьаяб бугелъул, нужер мугъзада дица лъолеб гьирги тӀадагьаб бугелъул!