Матфей 10 - Аллагьасул Калима

10 бетӀер ГӀисаца халкъалъухъе чапарзаби ритӀула

¹ АнцӀила кӀиго муридги ахӀун, ГӀисаца гьезие ихтияр кьуна жундул рачахъизе ва кинабго унти, кинабго щокълъи гӀадамазда тӀаса инабизе.

² Гьале гьев анцӀила кӀиявго чапарасул цӀарал: Пётр абун ГӀисаца тӀокӀцӀар кьурав Симон ва гьесул вац Андрей, Зебедайил Якъуб ва гьесул вац Иоанн,

³ Филипп ва Бартоломей, Фома ва магъало бакӀарулев чи Матфей, Алфейил Якъуб ва Фаддей,

⁴ Симон Кананит ва хадув ГӀисае хилиплъарав Ягьуда Искариот.

⁵ Гьев анцӀила кӀиявго чапар витӀана ГӀисаца, гьадинаб насихӀатги гьабун: – Гьересиаллагьзабазе гӀибадат гьабулел гӀадамазухъе унеб нухдеги лъугьунге нуж, самариязул шагьараздеги хӀетӀе чӀоге.

⁶ Нуж а нух къосун хутӀарал чахъаби гӀадин бугеб Исраилил халкъалъухъе.

⁷ Инеги ун лъазабе Аллагьасул ПарччахӀлъи тӀаде гӀунтӀун бугилан.

⁸ Унтарал сахлъизаре, хварал чӀаголъизаре, барасалъ черх бацарал рацӀцӀалъизаре, жундул рачахъе; нужееги чӀобого щвана, нужецаги чӀобого кье.

⁹ Я месед, я гӀарац, я пахьул шагьаби цадахъ росуге;

¹⁰ таргьа-къвачӀаги босуге, хисизе ретӀелги босуге, хьиталги росуге, гӀунтӀизе гӀунсбиги росуге. ХӀалтӀухъанасе квен хӀалалаб бугелъул.

¹¹ Пуланаб шагьаралде яги росулъе щведал, нужго тӀад рещтӀине мустахӀикъав чи валагье ва нахъе инегӀан гьесухъ гьоболлъухъ чӀа.

¹² Рокъоре жанире лъугьунаго саламги кье.

¹³ Саламалъе мустахӀикъаб рукъ гьеб бугони, биччанте салам гьезде щвезе, гьечӀони – гьеб нужедего буссине биччанте.

¹⁴ Ваамма нуж къабулги гьаричӀони, нужер рагӀабазухъ гӀинги тӀамичӀони, гьеб рокъоса яги шагьаралдаса къватӀире рахъунаго нужерго хьитаздаса хӀурги кӀутӀун те.

¹⁵ ХӀакълъун абулеб буго дица нужеда: къиямасеб къоялъ Содомалъул ва Гоморраялъул халкъ гӀемерго лъикӀ букӀина гьеб шагьаралъул халкъалдаса.

¹⁶ БацӀазда гъорлъе чахъаби гӀадин ритӀулел руго дица нуж. Борхьал гӀадин цӀодорго рукӀа, маккал гӀадин хӀеренго рукӀа.

¹⁷ ГӀадамаздаса цӀуне. Гьез нуж тӀадегӀанаб судалде ахӀила, жидерго синагогабазда жанир цӀалаца рухила.

¹⁸ Дун сабаблъун нуж наибзабазухъе ва парччахӀзабазухъе рачина, гьезда цебеги цогидал халкъазда цебеги дир муридал рукӀиналъе нугӀлъи гьабизе.

¹⁹ Судалде ахӀидал щибдай бицинаян ургъел ккоге нужеда. ГьебсагӀат нужерго рекӀелъе бачӀараб жо абе.

²⁰ Щайгурелъул, нуж гуро гьебмехалъ кӀалъазе ругел, нужер рекӀелъе нужер Инсудасан рещтӀараб РухӀин кӀалъазе бугеб.

²¹ Вацас вац кьезе вуго чӀвазе, инсуца вас кьезе вуго; жидерго эбел-инсуда данде рахъун лъималаз гьелги кьезе руго чӀвазе.

²² Дун сабаблъун киналго гӀадамазда рихина нуж. Амма ахиралде щвезегӀан сабру гӀурав чи хвасарлъила.

²³ Цо шагьаралда нужее гӀазаб-гӀакъуба кьуни, цоги шагьаралде лъуте. ХӀакълъун абулеб буго дица нужеда: ГӀадамил Лъимер къудратгун вачӀинегӀан ГӀизраилалъул киналго шагьаразде щвезе бажариларо нужехъа.

²⁴ Жиндирго мугӀалимасдаса тӀадегӀанав вукӀунаро мутагӀил, лагъги вукӀунаро жиндирго бетӀергьанасдаса тӀадегӀанав.

²⁵ Жиндирго мугӀалимасда ващалъани, гӀола мутагӀиласе, жиндирго бетӀергьанасда ващалъани, гӀола лагъасеги. Рукъалъул бетӀергьанасда жундузул ханилан цӀар лъун бугони, гьесул рукъалъул агьлуялда кигӀан квешаб цӀардай лъела.

²⁶ Гьедин бугониги, гьезукьа хӀинкъуге нуж! Щайгурелъул кинабго балъгоябщинабги загьирлъулелъул, бахчун тарабги тӀатунелъул.

²⁷ Гьаб сардил бецӀлъукье дица нужеда бицунеб бугеб рагӀи бакъул канлъухъе бице нужеца; нужер гӀинзукье дица щурулеб бугебабги тӀохаздеги рахун лъазабе нужеца.

²⁸ Нужер черх чӀвазе кӀолезукьа хӀинкъуге нуж, – рухӀ чӀвазе кӀоларелъул гьезда. Нуж хӀинкъа нужер рухӀги черхги жужахӀалъубе рехизе кӀолев Аллагьасукьа.

²⁹ Цо пахьул шагьиялъухъ гурищ щолеб кӀиго къадако. Амма нужер Инсул хӀукму гьечӀони, гьезул цонигияб хун ракьалде бортун бачӀунаро.

³⁰ Нужер хӀакъалъулъ абуни, бетӀералда чан рас батаниги, гьелги рикӀкӀунин ругел.

³¹ Гьединлъидал нуж хӀинкъуге: киналго къудкуздаса хириял руго нуж.

³² ГӀадамазда цебе дир рахъ ккурав чиясул дицаги зобалазда вугев дир Инсуда цебе рахъ кквезе бугебха.

³³ ГӀадамазда цебе диде инкар гьабурав чиясдаса зобалазда вугев дир Инсуда цебе дицаги инкар гьабила.

³⁴ Нужеда ракӀалде ккоге дун ракьалде рекъелги босун вачӀун вугевилан. Рекъелги босун гурев, хвалченги босун вачӀун вуго дун.

³⁵ Дун вачӀун вуго васасдаги инсудаги гьоркьоб, ясалдаги эбелалдаги гьоркьоб, нусалдаги якьадалдаги гьоркьоб рикьи ккезабизе.

³⁶ Инсанасул тушман ккола гьесул рукъалъул агьлу.

³⁷ Дидаса цӀикӀкӀун жиндирго эбел-эмен рокьулев чи ярагьунаро дие. Дидаса цӀикӀкӀун жиндирго лъимал рокьулев чиги ярагьунаро дие.

³⁸ Живго тӀад вазе хъанчги баччун, дида цадахъ вилълъунарев чиги ярагьунаро дие.

³⁹ Жиндирго гӀумру цӀунун чӀарав чи гьелдаса махӀрумлъила; дие гӀоло гӀумруялдаса махӀрумлъарас гьеб хвасар гьабила.

⁴⁰ Нуж къабул гьарурав чи ккола дунги къабул гьавурав чилъун, дун къабул гьавуравги ккола дун витӀарав Аллагь къабул гьавурав чилъун.

⁴¹ Гьев авараг вугилан абун, авараг къабул гьавурав чиясе аварагасе гӀадинаб кири щвела. Гьев муъминчи вугилан абун, муъминчи къабул гьавурав чиясе муъминчиясе гӀадинаб кири щвела.

⁴² Дир мурид вугилан абун, цо пуланав, пакъирав чиясе гел цӀун цӀорораб лъим кьуравги, хӀакълъун абулеб буго дица нужеда, кириялдаса махӀрумлъиларо.