Матфей 1 - Аллагьасул Калима

1 бетӀер ГӀиса МасихӀил цӀаразул рахас

¹ Ибрагьимил наслуялъул Давудил кьибилалъул вас ГӀиса МасихӀил умумузул цӀаразул рахас гьадинаб буго:

² Ибрагьимие гьавуна ИсхӀакъ, ИсхӀакъие гьавуна Якъуб, Якъубие гьаруна Ягьуда ва гьесул вацал.

³ Ягьудае Тамарица гьаруна Перецги Зараги, Перецие гьавуна ХӀецрон, ХӀецроние гьавуна Рам,

⁴ Рамие гьавуна ГӀаминадаб, ГӀаминадабие гьавуна НахӀшон, НахӀшоние гьавуна Шалмон,

⁵ Шалмоние Рагьабица гьавуна БогӀаз, БогӀазие Рутица гьавуна Йобед, Йобедие гьавуна Йишай,

⁶ Йишаие гьавуна парччахӀ Давуд. Уриял йикӀарай чӀужуялъ парччахӀ Давудие гьавуна Сулайман;

⁷ Сулаймание гьавуна Регьобоам, Регьобоамие гьавуна Абиягь, Абиягьие гьавуна Аса;

⁸ Асае гьавуна Иегьошапат, Иегьошапатие гьавуна Иегьорам, Иегьорамие гьавуна Уззия;

⁹ Уззияе гьавуна Иотам, Иотамие гьавуна Агьаз, Агьазие гьавуна Гьезекиягь;

¹⁰ Гьезекиягьие гьавуна Манассегь, Манассегьие гьавуна Амос, Амосие гьавуна Иосиягь;

¹¹ жугьутӀал Вавилоналде гочинарилалде Иосиягьие гьаруна Йехониягь ва гьесул вацал;

¹² Вавилоналде гочун хадув Йехониягьие гьавуна Шеалтиэл, Шеалтиэлие гьавуна Зеруббабел,

¹³ Зеруббабелие гьавуна Абиуд, Абиудие гьавуна Элиаким; Элиакимие гьавуна Азор;

¹⁴ Азорие гьавуна Садок, Садокие гьавуна Ахим, Ахимие гьавуна Элиуд;

¹⁵ Элиудие гьавуна Элиазар, Элиазарие гьавуна Маттан, Маттание гьавуна Якъуб;

¹⁶ Якъубие гьавуна жинда МасихӀилан цӀар лъурав ГӀисал эбелалъул – Марямил – рос Юсуп.

¹⁷ Гьедин Ибрагьимидасан Давудиде щвезегӀан анцӀила ункъо наслу лъугьана; Давудидасан байбихьун жугьутӀал Вавилоналде гочинаризегӀанги лъугьана анцӀила ункъо наслу; Вавилоналде гочараб заманалдаса МасихӀиде щвезегӀанги лъугьана гьебго анцӀила ункъо наслу.

ГӀиса МасихӀ дуниялалде вачӀин

¹⁸ ГӀиса МасихӀ дуниялалде вачӀин гьадин ккана: гьесул эбел Марям йикӀана Юсупие абурай яс; амма гьес гьей ячиналдего Аллагьасул Илагьияб РухӀалдалъун гьелъул ургьибе лъимер ккун букӀин лъана.

¹⁹ Гьелъул абурав Юсупица, яхӀ-намус бугев чи вукӀиндал, хӀукму гьабуна гьей халкъалда суризе бокьичӀого, балъгого гьелъулгун ригьин хвезабизе.

²⁰ Гьединаб пикруялда гьев вукӀаго, макьилъ тӀаде вачӀун Бичасул малаикас абуна: – Я, Давудил наслуялъул вас Юсуп! Марям лъадилъун ячине мун хӀинкъуге. Гьелъул ургьибе ккараб лъимер Аллагьасул Илагьияб РухӀалдалъун букӀин лъай дуда.

²¹ Гьелъ дуе вас гьавила; ГӀисаян цӀарги лъезе ккола дуца гьесда, гьес жиндирго халкъ мунагьаздаса хвасар гьабизе бугелъул.

²² Гьеб кинабго ккана цо аварагасда Аллагьас абураб гьадинаб калима ритӀухълъизе:

²³ «Гьале ясгӀаданалъул ургьибе лъимер ккела ва гьелъ вас гьавила. Гьесда цӀарги лъела Имануэл». (Гьелъул магӀна ккола «Аллагь нилъгун вуго» абураб.)

²⁴ Гьале Юсуп макьидаса вигьана, Бичасул малаикас абураб гьабун, жиндирго бахӀарайги рокъое ячана.

²⁵ Амма гьелъ вас гьавизегӀан, аскӀов вегун, гьелда квер хъвачӀо Юсупица. Васасда цӀарги ГӀиса абун лъуна.