Марк 8 - Аллагьасул Калима

8 бетӀер ГӀисаца ункъазарго чи гӀорцӀизавула

¹ Гьел къоязда нахъеги цӀакъ гӀемераб халкъ бакӀарана ГӀисада аскӀобе. Квен-тӀехги гьечӀого гьел хутӀидал, жиндирго муридалги аскӀоре ахӀун, ГӀисаца гьезда абуна:

² – Гьал гӀадамазда гурхӀун вуго дун. Гьале лъабабго къоялъ дида аскӀор чӀун руго. Кваназе жоги хутӀун гьечӀо гьазухъ.

³ КваначӀого дица риччани, рокъоре унаго, рухӀ дагьлъун ккезе бегьула гьел, цӀакъго рикӀкӀадаса рачӀаралги ругелъул гьезда гьоркьор.

⁴ Муридаз гьесда абуна: – Гьаниб гӀалхуда гьазие гӀураб чед лъица балагьилеб, киса бахъилеб? – абун.

⁵ Чан чед нужехъ бугебилан гьикъана ГӀисаца гьезда. Анкьго чед бугилан абуна гьез.

⁶ Цинги ГӀисаца гьел гӀадамазда абуна кваназе гӀодор чӀайилан. Гьеб анкьабго чедги кодобе босун, тӀаде дугӀаги гьабун, ГӀисаца бек-бекун жиндирго муридазухъе кьуна, халкъалъе бикьейилан. Гьезги гьеб халкъалъе бикьана.

⁷ Дагьа-макъаб ччугӀаги букӀана гьезухъ. Додинго тӀаде дугӀаги гьабун, гьебги кьуна ГӀисаца муридазухъе, халкъалъе бикьеян.

⁸ ГӀорцӀизегӀан кванана гьел гьенир; нахъе хутӀарал чадил мочӀабазулги анкьго гьегь цӀуна.

⁹ Гьенир кванарал гӀадамазул вукӀана ункъазаргогӀанасев чи.

¹⁰ Гьелги нахъе ритӀун, ГӀиса гьебсагӀаталъ жиндирго муридалгун цадахъ, росодаги рекӀун, Далманутаялъул ракьалде ана.

Гьаб умматалъе гӀаламат букӀине гьечӀо

¹¹ Гьенир ГӀисахъе рачӀун, цо-цо фарисеял лъугьана гьевгун дагӀбадизе. Гьесул хӀалбихьизелъун, гьез тӀалаб гьабуна зодисан гӀаламат бихьизабеян.

¹² Угьун хӀухьелги биччан, ГӀисаца абуна: – Щай гьаб умматалъ гӀаламат тӀалаб гьабулеб? ХӀакълъун абулеб буго дица: гьаб умматалъе гӀаламат букӀине гьечӀо.

¹³ Гьел гӀадамалги рукӀаралъур тун, ГӀиса нахъеги росоде вахана ва ралъдал добцояб рахъалде ана.

Фарисеязулги гьеродилазулги реччеялъул хӀакъалъулъ

¹⁴ Квен цадахъ босизе кӀочон тун батана муридазда; цо гурони чед батичӀо гьезухъ.

¹⁵ ГӀисаца гьезда лъазабуна: – Вореха, фарисеязулги гьеродилазулги реччеялдаса цӀунун чӀа нуж.

¹⁶ Цоцазда гаргадизе лъугьана гьел: – Нилъехъ чед гьечӀилан абураб магӀна букӀине ккола гьелъул.

¹⁷ Гьезул пикру бичӀчӀун, ГӀисаца абуна: – Чед гьечӀилан щай нуж гаргадулел? Нужго кинал гьедигӀан бичӀчӀи гьечӀел ва нахъгӀунтӀуларел? КигӀан согӀлъун нужер ракӀал ругел?

^18-19 Берал ругониги бихьулареб кин? ГӀундул ругониги рагӀулареб кин? Нужеца ракӀалде щвезабе: дица щуазарго чиясе бек-бекун щуго чед кьун хадуб хутӀарал чадил мочӀабазул чан гьегь цӀураб? АнцӀила кӀиго гьегь цӀунилан жаваб кьуна гьез.

²⁰ – Анкьго чед ункъазарго чиясе бикьараб мехалъ, хутӀарал мочӀабазул чан гьегь цӀураб? Анкьго гьегь цӀунилан жаваб кьуна гьез.

²¹ – Гьанжеги бичӀчӀичӀебищ нужеда? – ян гьикъана ГӀисаца гьезда.

Бетсаидаялда цо бецав чиги сахлъизавула

²² Цинги гьел щвана Бетсаидаялде. Вачун вачӀуна цо бецав чи. Гьесда квер хъвайилан гьарула гьез ГӀисада.

²³ ГӀисаца кверги ккун гьев чи росулъа къватӀиве вачана ва гьесул кӀиябго бадибеги ту-тун, беразда квералги рахъун, гьесда гьикъана щибниги бихьулеб бугищилан.

²⁴ Сверухъ хал-шалги гьабун, гьес абуна: – АскӀосан унел гӀадамал рихьулел руго дида гъутӀби гӀадин.

²⁵ ГӀисаца нахъеги беразда кверал рахъараб мехалъ, гьев чи цеве валагьана, – бералги сахлъун, кинабго жо баянго бихьулеб батана гьесда.

²⁶ ГӀисаца гьев гьенисанго рокъове витӀана ва гьадаб росулъан унгеянги лъазабуна.

Пётрица иман лъуна ГӀиса МасихӀ вукӀиналде

²⁷ Гьениса вахъун жиндирго муридалгун цадахъ ГӀиса ана Филиппил Къайсарият шагьаралда гӀагарлъухъ ругел росабалъе. Нухда ГӀисаца гьезда гьикъана: – Щивлъун дун гӀадамаз рикӀкӀунев? – абун.

²⁸ Гьез жаваб кьуна: – Цояз абулеб буго мун ЯхӀя авараг вугилан, цояз абулеб буго Иляс авараг вугилан. Цогидаз абулеб буго аварагзабаздасан цояв кколилан.

²⁹ Цинги ГӀисаца гьезда гьикъана: – Нужеца щивлъунха дун рикӀкӀунев? – абун. Пётрица жаваб кьуна: – Мун вуго МасихӀ.

³⁰ Лъиданиги гьеб бицунгейилан лъазабуна ГӀисаца гьезда.

ГӀисае букӀине бугеб гӀазаб-гӀакъуба

³¹ Цинги гьес бицине байбихьана ГӀадамил Лъимаца гӀемераб гӀазаб-гӀакъуба хӀехьезе ккезе бугин, чӀухӀби-хӀакимзабазги, чӀахӀиял кашишзабазги, диниял гӀалимзабазги гьесдаса инкар гьабизе бугин, чӀвазе вугин ва лъабабилеб къоялъ хваралъуса вахъинеги вугин.

³² Гьеб кинабго ГӀисаца гьезда рагьун бицана. Амма довегӀанги вачун Пётр лъугьана гьедин абугейилан гьесда дандечӀун кӀалъазе.

³³ Гьебмехалъ, кьурун вуссун, жиндирго муридазухъ валагьана гьев. Цинги, Пётрги вуцӀцӀинавун, абуна: – ТӀагӀа дида аскӀоса, Илбис! Аллагьасулаб тун, инсанасулаб лъугьун буго дур рекӀелъе.

³⁴ Гьениб букӀараб халкъги жиндирго муридалги аскӀоре ахӀун, ГӀисаца абуна: – Дида цадахъ вилълъине бокьарав чи ватани, гьес жиндирго напсалдаса инкар гьабе, жиндаго тӀаде ккараб хъанчил гӀазабги бачче ва дида хадув вачӀа.

³⁵ Щаян абуни, жиндирго гӀумру цӀунизе бокьулев чи гьелдаса махӀрумлъила, диеги Рохалил хабаралъеги гӀоло гӀумруялдаса махӀрумлъизе разилъарас гьеб хвасар гьабила.

³⁶ Жиндирго рухӀги рецӀалие кьун, тӀолабго дуниялалъул кверщел хъатикье щвеялъул щиб пайда бугеб инсанасе?

³⁷ Жиндирго рухӀалъухъ хисизе жо щиб бугеб инсанасул?

³⁸ Гьаб мунагьаб ва пасатаб умматалда цеве дунги дир рагӀабиги сан гьаричӀев чи ГӀадамил Лъимацаги сан гьавизе гьечӀо, жиндирго Инсул нуралъ гвангъун, мукъадасал малаикзабигун цадахъ гьев вачӀунеб мехалъ.